¹ Kaa rybe Deuxu, riitxeredỹỹnymy Habakuki dee riwahinyre. ² Deuxu Tyhyhykỹ, tiubo tahe ararybekre ixiwiòhedỹỹmy arexitòenymy, kia kai tahe waderalemy teate? Tiu bedeubo tahe arirajuakre: “Aõbinabinahãkỹ!” Kia kai tahe biwahedỹỹnybenyõkre? ³ Aõherekibo aõnaõna binabinahãkỹmy tiwatobixidỹỹnymyhỹte? Aõherekibo teraòmyhỹte aõnaõna òbitimy aõkõ rỹimyhỹre? Diarỹ heka bede ixihuduna-di kia aõnabinabina-di rayrawomy watxireri; Aõbinbina kia ijesu ibutu bede bedemy rỹireri. ⁴ Iurenana heka inyõ arybe wahidỹỹnana rityhynyõhyymyhỹre, kia òbitimy aõnaõna rỹimyhỹre tahe tiu ròtamy ròhònyõhyymyhỹre. Iny binabina mahãdu ròtamy riòlònymyhỹrenyre iny òbitimy rỹimyhỹrenyre-ribi, kia rybe òbitihikỹ tahe urile ramoemoemyhỹre. ⁵ Deuxu Tyhyhykỹ rarybere tasỹreny dee taijoireny dee: “Betehebenyini, hãwa hãwa bedebede awerurarenymy rỹirenyreri-di kia tahe bede riòtiinyrenymy kia ruberumy rỹirenyreri. Kiemy dori diarỹ wiji ariwinykre kia heka kai boho bityhynyõhyybenykre, kia inyõ akoreny relyyrenyke hãrele. ⁶ Diarỹ arehukremy watxireri Babilonia boho-di, kua iny mahãdu binaibnahãkỹ aõbinaluuhukỹ boho, kia ikiemy rexihuhukỹlemy ratximyhỹrenyre rariarenykremy bede bedemy hãwa hãwamy, kia iwitxira mahãdu sureny ixidee rimyrenykemy. ⁷ “Tii boho riuberanymyhỹre brebuna binabinahỹ kia tahe tarybereny wahidỹỹnarenyle rityhynymy riwinymyhỹrenyre. ⁸ Iawarureny heka tetityhyrenyre hãlòe riti mahãdureny-ribi, kia heka teburetyhyrenyre ahula mahãdu bederahymy rỹirenyra-ribi; tii boho irehe-ribi naòrunymy dòimyhỹdenyde, wytyhylemy nawiihikỹ wesemy kia tiu ixidi rehumyhỹrenyreu iròdutyre kia tii ririunymyhỹre. ⁹ Sodadu mahãdu rimymyhỹrenyre, kia rytyhylemy rimyrenykemy risỹnymyhỹrenyre; kia rahãỹnanymyhỹre-wana roberamyhỹrenyre iaõbinareny nihikỹ. Kia iny mahãdu ribrejunymyhỹrenyre heka sõerenyre; kia heka sõetyhyrenyre ỹnyra rutà sõereny ratyre. ¹⁰ Sodadu mahãdu Babilônio risinymyhỹrenyre iòlò mahãdu-di kia hãwa wedu mahãdu urile riitxenanymyhỹrenyre. Kia urile irurureny nihikỹ-di rutxuenymyhỹrenyre; kia rexideòtenyrenymy tawounarenymy kiata ihyy tuu rahãỹnanymyhỹrenyre. ¹¹ Irahudi tahe komy ròimyhỹrenyre, iwse yhy reamyhỹre wesemy; tii boho rerinanyrenyõmyhỹrenyre iwitxira ỹnyxiwemy kia tarurureny sohojile rityhynymyhỹrenyre. ¹² Kai ikiehyymy tatxihyymy tatemyhỹ, Deuxu Tyhyhyỹ. WaDeuxu Tyhyhykỹ, kai heka arubu-di aõkõ tate. Kai heka wawòtedureny waitxesedureny tate. Deuxu Tyhyhykỹ, kai heka babilônio boo tetate kiata tamyreny ruruterena tewahinyte riwararytxynyrenykremy. ¹³ Ka timybo tahe adeòby rỹikre, kaa inybòdỹỹluu mahãdu, kaa iny mahãdu binabinahäkỹ? Iruereny heka inatyhyhykỹmy retehemyhỹrenyre aõnaõna binabina-di; kai heka timy tai ibinamy tahãmy aõkõ idireny tetehemyhỹte iny mahãdu aõnaõna binabinareny-di. Timybo tahe rybeõmy atximyhỹte tiu kaa iny mahãdu binahãkỹ reerynymyhỹrenyreu kia tii boho aõbo iratyrereny awityhyrenyre? ¹⁴ Aõherekibo tahe iny mahãdu-di kawesemy atximyhỹte utura wesemy, kia iwese iròdu iròdu iwedureny ihoõmy ratximyhỹrenyre wesemy? ¹⁵ Kiemy dori babilônio boho iny mahãdu witxira rimymyhỹrenyre iwese waxidu mahãdu utura utura rimymyhỹre wesemy. Tawaxitireny-di kia tadeòrerureny-di iny mahãdu rimymyhỹrenyre kiata su-ò idi retyymyhỹrenyre. Taita rexibedesanymy kia reysamyhỹrenyre. ¹⁶ Xiwena riwahinymyhỹrenyre deòreru deereny kiata waxiti dee raxiwemyhỹrenyre, kiemy dori iòrarurenyki waxidu mahãdu iaõdirenymy ityhymy runymyhỹrenyre kia sõemy irỹsỹnareny ijõdire rirỹsỹrenykremy. ¹⁷ Kia aõbo babilônio boho tiu aõbo iijesureny ixawiõna kia iny mahãdureny-di iixiwobrudỹỹreny ihoõhyylemy aõbo rirubunymy roirenyrekre?