¹ Yääje mma yaawä Saúl acä töwa'deuwödö yä'ca'jäcä Jonatán töweichö cöneejodööjoi David acä, Jonatán David tumjumma cönä'jaacä töweichö ijummadö wa'cä deea. ² Yää anooto Saúl David töjaadä cönnöi yöömö e'saca anenno'ja'da cöneiyacä. ³ Yääje mma yaawä Jonatán David acä cöna'deuwöicho ääweichacoono je töweicho'como jäcä jooje Jonatán tumjumma cönä'jaacä töweichö ijummadö wa'cä deea. ⁴ Jonatán töwoomö cunu'cai David wwä cuntui yaawä, töwaichadö mmaja, tösaudai mmaja, shimaada ejuudu mmaja, tö'dha'mötö mmaja. ⁵ David töttä cönä'jaacä Saúl wä tanontädö woije, aashicha töttä cönä'jaacä. Saúl cöne'täi yaawä soto töwewänä'taamo edhaajätoncomooje. Yää soto wacö'comje cönä'jaacä, Saúl sotoi emjataawäiñe mmaja cönä'ja'dea. ⁶ Yääje mma yaawä Filisteo chaana'ca'jejeiñe cönennacaichea töjaatacäiñe tameedä Israelitacoomo jataadöcoomo cönä'ja'dö waadäi wodiñamo cönejäto töweecanata'ñancädäiñe, töwänwancädäiñe mmaja, cajiichana Saúl quene ta'cwaiñe tösamjudaichomo dha'me töshiiwoichomo dha'me mmaja. ⁷ Wodiñamo cönñe'cwa'to cöneecanta'ña'to deea ä'ca'da tönwanno cöneecanta'ña'to edääje: "Saúl soto cömjajoicho tooni miide David mmaane amoojadä miide cömjajoicho" quee cöneecanta'ña'to. ⁸ Jooje soto wäätömaajä cönä'jaacä, yaacö'je'da cönä'jaacä yääje wecanta'ñänä, töwö cönä'döaacä David nöjaajo'jocoomo metaato amoojadä miide, öwö mmaane tooni miide mma. ¿cajiichaana je yeichö mma ca a'quenai? ⁹ Yää anooto jonnoto'jödöödä Saúl, David cone'da töweichö töneene'ma cönä'jaacä. ¹⁰ Yääje mma yaawä Saúl odo'sha'je cönä'döi Wanaadi woije. Töwö deliraje cönä'döi tä'saca. Yaawä David töjantudai cönñe'cwai anooto waadäi. Tönnöe cönäja'döje dea. Saúl quene sucuuji tänwawä cönä'jaacä. ¹¹ Saúl tusucujiiyö cönenno'jai, töwö chöötajäätödö cönä'jaacä David töwäädö jäcä. Yaawäne' David cönäänejei Saúl jonno aacäde. ¹² Saúl David tönnontä cönä'jaacä Cajiichaana Wanaadi chääjadä yeijäcä, Saúl jonno mmaane tönsancwajo cönä'jaacä Wanaadi. ¹³ Yääje mma yaawä Saúl töjonno cösancwajoi tooni miidecoomo suddau edhaajätoncomooje cöne'täi mädääje soto jadäiñe töweja'ca töwoomonge mmaja cönä'ja'dea. ¹⁴ David chäänönge töwäätä'se'tä cönä'jaacä temeedä töweichö jäcä, Cajiichaana Wanaadi chääjadä yeijäcä. ¹⁵ Yaawä Saúl chäänönge yäätä'se'tädö eneea'jäcä, töwö tönnontä cönä'jaacä yaawä. ¹⁶ Yääje mma yaawä tameedä Israelitacoomo Judeañancomo mmaja David tumjumma cönä'ja'to, chäänönge töneenedöcomooje yämannäjö'jödö weijäcä. ¹⁷ Yaawä Saúl cönä'döaacä David wwä: Mädhä'na önnedö awa'deeto Merab. Öwö wu'a ajinñamooje jäduuje mmaane eichä'de wewäänä'tänä jäcä Cajiichaana Wanaadi wänäi awä. Saúl cöntö'tajä'acä öwö aneema'da wa'de Filisteocoomo nemaato'de quee. ¹⁸ David cönä'döaacä Saúl wwä: "¿änääcö ca öwö jaaja wäjimmä'tädö jeiñe mma, Israelita cajiichaanaichomo jannödööje weichö wetä? ¹⁹ Yaawä ñäädä Merab Saúl nedö David jadä yäädötoojo aca yä'döajäcä, Adriel wwä mma cuntuicho ijinñamooje, ñäädä mehola ñano. ^{20 21} Yaawä Mical, Saúl nedö, David tumjumma cönä'jaacä. Yää eta'jäcä Saúl wwä yaacö'je cönä'jaacä. Saúl cöntö'tajäätöi yaawä: "wu'a'de chäwwä, encu'täneije Filisteocoomo emaiyeto yaawä." quee cöntö'tajäätöi. Yaawä Saúl cönä'döaacä David wwä aacädeeto: "Jannödö amäädä" quee cönä'döaacä. ²² Saúl tösootoi cönaanontäicho yaawä tacaade'da David wwä adha'deutäcä edääje caichäcä'de: "Cajiichaana wacö'jema amäädä shootoi wacö'jeiñe mmaja, ijannödö je ä'döcä'de" quee caichäcä'de. ²³ Mädääje Saúl sotoi cöna'deuwöicho David wwä. Yaawä David cönä'döaacä: "¿chäänönge nichö'taanä äwwäiñe cajiichaana jannödö je wä'dödö, täneejuque'da weichaame töjödataiche'da mmaja?" quee cönä'döaacä. ²⁴ Ñanno Saúl sotoi anonta'como cöneecammaicho David wa'deuwö'jödö. ²⁵ Yaawä Saúl cönä'döaacä: "Edääje David wwä caichäcä'de: 'Jödaata ämjumma'da na, tutude'tomo jäcääne töjo'tädö mma nijumma, ijaatodea soto (100) filisteo anwawäncomo ji'jä.' que caichäcä'de" quee cönä'döaacä Saúl. Mädääje Filisteo wäiñe emaajo'se töwö cönä'jaacä. ²⁶ Mädääje ya'deuwö'jödö cöneecammaicho David wwä, David yaacö'je cönä'jaacä cajiichaana jannödööje töweichö. ²⁷ Saúl nichö'tammecöödö owaajodä dea David cöne'ja'cai tösootoi jadäiñe amoojadä soto (200) Filisteo töjaajodööcomo jemma. Filisteo danwawäcomo jäcäncomo ji'jämjödö cönnejä yaawä Saúl wadäädä. ²⁸ Mädääje Saúl tönnedö Mical cuntui ijinñamooje, Saúl dhowaanäcä cönä'jaacä Cajiichaana Wanaadi David jadä yeichö, Mical David tumjumma yeichö mmaja. ²⁹ Saúl jooje David tönnontä cönä'jaacä, tutu'dedööje cönnöi yeichödäje. ³⁰ Yääje mma yaawä Filisteocoomo cajiichaanaichomo Israelita tönwänä'tä cönä'ja'todaawä, Saúl sotoi e'jodheiñe'cä David aashicha töwewänä'tä cönä'jaacä täneejuque töwö cönä'jaacä soto wacö'jeiñe mmaja.