CAJIICHAANA E´CATÄ´JÖDÖ ISRAELITA WWÄIÑE 1
1
Yäjemma yaawä dhanwa töweiye cönäjacä Ramataim ña ñädä Zofim ñano, jata chutacano awoono Efrain ñano, töwö chätö cönäjacä Elcana, ñädä Jeroham ne´dö, ñädä Eliú ne´dö, ñädä Tohu ne´dö, ñädä Zuf ne´dö, ñädä Efrateo weichö.
2
Töwö jinñantomo cönäjato aacä; Awadeeto jinñamo etö cönäjacä Ana je, yäjajato etö mmane cönäjacä penina quee. Töwö Penina iñacomoje cönäjacä, yaawäne Ana mmane aquee cönäjacä.
3
Ñäädä dhanwa töwee cönäjacä töjatawonno, Silo ña, weedu wadöi, Cajiichana Wanaadi yaa´demeque, Ashichato tödöe mmaja. Yäätä cönäjato anädäncädä Elí na´como, ñädä Ofni tätö, Finees mmaja, ñäädä cönäjacä Cajiichana Wanaadi´woono wadeuwödö.
4
Yääjemma yaawä Elcana wä ashichato u´tojo anoto chädö cönädöi, iyä we´du wadäi tönnöe cönäjadö, töwö tunue cönäjacä ijunu´jödö töjinñamo Penina wä shecasa´ma, tameedä tönnacomo dhanwacomo wodinñamo wäiñe mmaja.
5
Yaawäne injummadö yeijäcä töwö tunu´e cönäjacä jooje Ana wä, Cajiichana inñedö äntuda yeijädä weichame.
6
Ñäädä chädhato (Penina) tönenno´jo´e töweiye cönäjacä yeichöje wentunje tödöjone, äntudane Cajiichana yeiyetöda.
7
Yääje´ma yaawä anoto wadäi, tö´tä cönäjato Cajiichana e´saca töwä´jimmätädö jadä, ñädä chädhato (Penina) yeichödäje tönenno´jo´e cönäjacä.
8
Töwö iiño Elcana töwädöe conäjacä: "Ana, ¿Ane´quenei mamoa´nä?¿Ane´quenei äwä´shinchäseda manä? ¿Ane´quenei adhewanö jadä wentumje manä? ¿Tujenneda ca wanä äwwä amojadocomo nacomo ejodhecä?.
9
Iyä toni anoto iña conäjadawä, Ana cönammöi töwä´shinchäjeje töwocödö enöjejemmaja Sillon ña, yätä Elí sacerdote watajimajä cönäjaca tatei de´wä iyä Wanaadi maichaca womontojo dö´tä.
10
Töwö wentumje cönäjacä; cönadeuwöi chea Wanaadi wä, cönamoi yaawä töwätämajäque.
11
Töwö tadeddu cuntui cönädöacä: "Wanaadi töwewänä´tamo edhajotoncomo. Wentumje eneea´comjäcä osotoi iyä etajaima, osotoi etömancädäiñeda, yaawä inñedö ua´jäcä osotoi wä, wuade Wanaadi wä yeichödotoje, yaawä anacätäda na´de tujujädö."
12
ñäädä wodi Wanaadi wä yadeuwödawä, Elí cönene´macä inchadö.
13
Täwanö jadädä cönadeu´wacä. Chääjiyö cönätumea dea, dhadeddu mmane ätada cönä´jacä. Yääje yeijäcä töwäda´cwe yeiyatäi Elí cönecanö´acä.
14
Elí cönädöacä yaawä: "¿Ächä´nawo´cotoje töwä´dacwe manä? "¡Mä´dä vino etömacä eduuwa!
15
Ana cönecwajätäi: "N´g yedhajä, öwö ñädä wodi wentumjato. Vino anenödawa, aneeja tän´emö aneenöda mmaja, yaawäne ecatädö mädä öwä dotadö jadädä Cajiichana Wanaadi wä."
16
"Conedamma ätötajätöi osotoi jäcä conemjönö jönöwö; Wentumje weijäcä, wäntunamjödö jooje yeijäcä mmaja, quee cönecwajäacä.
17
Yaawä Elí cönecwajäacä: "Täncanodeda täjai ma; Anecatädö Wanaadi nua´de äwwä."
18
Töwö cönädöacä: "Wöto´ñojo eduuwa öwö dhanonö ta´cwaiñe cönecä´de." quee cönadöacä Ana. Awashinchä töwö cöntämä yaawä; Yää´jeje wentumje´da töweiye cönäjacä.
19
Yawanadawä tönwanno cönä´joicho Wanaadi yademecödö wetä, mädääje töjatacäiñe cönennacaicho dea iyä Rama ña. Yaawä töjiiñamo Ana acä Elcana cönnöcäi, Wanaadi mmaja cönetai iyä ñecatädö.
20
Yaawä nu´ma yeijäje, Ana cönwensuutai, cönennui yaawä inñedö dhanwacä. Samuel je cöne´täi cönä´döacä: "Wanaadi wä necatä´döne yeiyajä".
21
Yääjemma yaawä, tameedä töjiiñamo jadäiñe, Elcana cönämatäi Wanaadi weichojo ta´ca töwäcamajädö nönge, aashichato tödöe mmaja.
22
Ana mmane tä´da cöneiyacä, töwö töiño wä cönädöacä: "Öwö tä´da wa shushu shichucä enomjadö´cwacä; Yawääne wötade, Wanaadi wwä wutuiye nu´dä töweichö wadadädä cha´jadä ei´yede yeichödäje."
23
Iiño Elcana cönädöacä chäwwä: " Eichä äwä miichötameca´döje. Yomocä shushu jo´wäda yädödö cwacä, Wanaadi tönecamma´jödö nödöade." Määdäje Ana cönonomjoi yaawä, tönnedö iiñejencadöje shushu e´nonjadö cwacä.
24
Yaawä shushu e´nonja´jäcä tönnedö tänawä cönannäjöi, töjadä cönadäi Toro aduwawä weduto, 22 to´cwacä ijönujödö mmaja, tooni cancudu vino weijödö mmaja, mädääje cöntämä Wanaadi maichaca Silo ña. Mudecäcäje dea cönä´jacä iiñedöcä.
25
Yäätä Toro cönamiiñäcaicho, Eli wadädä tönnedö cönadäi yaawä.
26
Töwö cönädöacä: " Yedaajä Wanaadi! Amäädä nuudä maadöje mmaja, öwö ñäädä wodi oodaje töwädöe cönä´jadö ädö´tä Cajiichana Wanaadi wä.
27
Mädhä mude´cäcä jäcä oodaje wädöne Wanaadi yetane yaawä ne´catädö jä´cä.
28
Yääje yeijäcä Wanaadi wä wua; Wanaadi anoonöje eiye yaawä, nuudä yeichö wadadädä." Mädääje töwö cönwademecöi Wanaadi.