CAJIICHAANA E´CATÄ´JÖDÖ ISRAELITA WWÄIÑE 2
1
Yääje mma yaawä Ana edääje odaaje cönädöacä: "Yewanö jäcä tacwaiñe wa Jehová nutuudu woije. Töwö yoije dea wäjäduta. Joonada naato ñanno tu´detännamo, chäwwä yeewanaacajödö weijäcä.
2
A´quena yotonnogeda Ashichato Cajiichana, A´quena yotonnogeda änöngato, a´quena tääju nönagato cäwanaadiyö¨como."
3
Ojodhe aweichömma mäntö´tammecäi, wäquimajänä mmaja äntai mänjacanöjoiche. Cajiichana Wanaadi tameedä dhowanäcäna töwö cöweichöcomo ne´menca yaawä.
4
Ñanno dhanwacomo jäädujacomo naiyoatode shimaada ejuudu aiyodö nönge´ma, yaawäne töwö jäduje nödöatode ñanno jädujemjönocomo
5
Ñanno ämijeda töweichameiñe cönetadawacajoicho tuducomo jäcäichädä; ñanno que´ne ämiije cönäjatodö ämiijeda cönädöjoicho. öWö queene ennecajönö yennecane siete tocwacä, yaawä ñäädä woodi jojacomo inñacomo, jädöjeda cönädöjoi.
6
Töwö Wanaadi ämatäna weiñä tunue mmaja. töwö tödenötäna äwaa aca tödöene tönadonca mmaja.
7
Töwö cajiichana Wanaadi wentumme dö´jotäna tönsomaque döjotä mmaja. dho´noncomoje dötä mmaja, yawääne adaijä dötä mmaja nadea.
8
No´sajato acanno wentumjato tönannäe mmaja töwö. wedennä acanno ijummanei tönannäe töwö ajimadö wetä Cajiichanacomo jadäiñe yaawä töwö najäiya taatei ashichato. Yaawäne nono atäi Cajiichana wwono määdä, tamedä yewä töwö cönnöi.
9
Töwö nedachade tösotoi chänönöacomo juducomo, yaawäne ñanno conenjönöcomo mane töjato aca nodöatode täjäduduque eijacha weiñäna.
10
Ñanno Cajiichana juntaca natodö, nätämaminchajatode; yaawä töwö nennojade yetötömadö cajuñanno. Töwö Cajiichana nemencade nono dhacosadöcomo wadäi. Töwö Cajiichanaje tönetädö wä ijäduudu nuade yaawä adaijä ijäduudu nödöade ñädä töneichöwä.
11
Yää´jeje, Elcana cöntämä Ramaña, täsaca. töwö mudecäcä töwetadawacajo cönäjacä Cajiichana wonoje Sacerdote Elí chäjadä töweiye cönäjacä.
12
Yääje mma yaawä Elí nacomo dhanwacomo cönäjato conedaiñe. Tönwanno dhowanäcäiñeda cänäjacä Cajiichana Wanaadi.
13
Määdäje ñanno töweiye cönäjato Sacerdote como sooto jadäiñe anemmädä dhanwa töjenjönö utudawä, ñanno Wanaadiwoncomo wade´wödö jadäncomo wetadawacajodö töwee cönäjato aduawoto yedö ashatojo dhame iyä juinujödö yesedötame.
14
Ñäädä mma ashatojo ewacajai töweiye cönäjacä adinñö aca, tamedädä iyä tönasha cönäjacä, yaawä Wanaadiwono wadeuwädä töwonoge deamma töneiye cänäjacä. tönwanno mädä tönnöe cönäjato Silon ña tamedä ñanno tö´tä cönäjato inña.
15
Määdäje mmaja chaatö asu´cadö owajo Wanaadi wono wadeuwödö anoonö iiña täwädöe cönäjaacä: " edääje töwädöancädä Wanaadi wono wadeuwödö wänoje ijuunu tasu´cajöönö ännecä, asucajä ämjummada töwöna, tasuucajönö mmane."
16
Yääje ñäädä dhanwa töwädöe cönäjacä chäwwä: " chaatö ya´cwacä awade, yääjejene ämjummadö wacä maadöiye yaawä." Yääjeje töwö nödöa: " äjö, yääjeje ucäde öwwä, yääjeda yeiyajäcä jäduuduque mane´wajinñade".
17
Ñanno dhanwacomo äjömanöcomo conenadiyö cönäjacä jooje Cajiichana Wanaadi emmatawä, tönquinñemeque cönäjatodea Wajiichana wä töje´mjönö uajö.
18
Yaawäne Samuel mude´cä´cäje töweichame Cajiichana wonoje tönnöjäe cönäjacä yomö täjeto cönäjacä yade´wödawoto.
19
Töwö yenö yomäcä töncae cönäjacä. Weedu waadöi töiño acä täje´mjönö tödöe töwoncudawä, chääwwänooje tönnee cänäjacä.
20
Elí ashichato tunue cönäjacä Elcana wä jinñamo wä mmaja yaawä cönödöacä: " Cajiichana nuade jojecäjene ännacomo määdhä woodi aca, Cajiichanane töwö ecaetöda ". Yääjeje tönwanno cänennacaicho täsacaiñe mmaja.
21
Yotonnomaajajene töwö Cajiichana Ana cöniwatäichea, yääjeje mmaja cänwensutaichea. töwö tönnacomo cönennuichaicho aduuwawä dhanwacomocä, acä wodiinñamo mmaja. Samuel nejeedö mmane Cajiichana owaadädä cönaatönöacä.
22
Elí mmane inchomje cänöjacä, yaawä töwö cänetai tamedä iyä tönnacomo cönnöatodö ñanno Israelitacomo jäcäiñe, tönwanno tönnöque cönäjato ñanno woodinñamo mma wejunmmatojo natatajo töweiye cänäjatodö jadäiñe.
23
töwö cönädöacä tönnacomo wäiñe: "¿Anecätojoje määdäje tönnöe mänetäne?" Tameedä ännödöcomo sooto öwwä necammajäato coneda aweichöcomo.
24
ng´jn, önnacomo; Coneda adhecadöcomo weetane. Änwanno cone´jönö mödöjato Cajiichana sotoi wäiñe.
25
"Dhanwa cone´jönö tödöajäcä aneja dhanwa jacä, Wanaadi nenmencade, Yawääne toni dhanwa cone´jönö tödöajäcä Cajiichana jäcä, ¿Änäcö adeujaiñai iwatädöje?" Yawääne tönwanno anetada cänäjato tumutoncomo adeddu mädäjene Cajiichana necanmadö yeiyetöda yäja´tocomo.
26
Samuel nejedö mmane ashicha cönennejencacä Cajiichana wa´cöje soto wacö´jeiñe mmaja.
27
Yääjemma yaawä Wanaadi anonö cönädöi Elí döiña cönädöacä: "Edääje Cajiichana nädöa:´¿Adhaadaichoncomo wäiñe tä´ne änejodaca töweiye wäjaquene Faraón anonöcomoje Egipto ña yeichöcomo?
28
Öwä töwadeuwamoje we´täneto tamedä Israel atödöcomo antawäiñe, töwomöcomo awä yewontädöcomo iyää Sacerdote wo´mö awä i´chädöcomo wetä, Sacrificio dötoojo de´wä soto nenedöcomo öwänoje chäwwäiñe utuudu wetä, ashichato ijodö yacwadö wetä mmaja. Chääwanshiñööcomoje töweiyemö cönäjacä yää sotoi Israelita nutuuducomo.
29
¿Anecäämö e´nei ö´wäno täjenjönö uajä töncöiñemeque mänetäne, yää weichojo tawä tönnöjo wäänenedö? ¿Ännacomo woijeiñe mödöjato, umjummadö nöngeda, anecämö e´nei Israelita nutuducomo ashichato jäcuinche adhejuiyato änwanno?.
30
Eedääje Cajiichana Israel Wanaadiyöcomo nä´döa: ´Eduuwa mmane edä ännöda wade, ashichato wödöade ñanno ashicha yödönnamo jäcäiñe, yawääne quinñemenamo jojedaiche wiijummatode.
31
Enecä´ma, iyä anoto aca yädöödö mädä, yaawä öwö manenwejiñade äjädudu que omo wäjimmätädä jädudu mmaja, soto nosamme yädöajäjeda nade adhatödö antawä.
32
Mäncädöade tödötojojeda aweichame weichojo dötä. Israelitacomo wä ashichato eneejotame, ööntontanö aneneda maade adhesaca.
33
Änwanno tameedäda mänjacanöjotäne yää yaatei döajä jonno, adheenödu aneneda wödöade yaawä senato ai aweichö na´de. Tameedä ä´maichawä nennuatodö äwäjimmätädö näjaatode.
34
Edää iyää ääwä wenejadö, ännacomo acää natodö Ofni, Finees jäcäiñe töwejadäemö: Tönwanno a´nädäcädä näjaatode iyää anoto dea.
35
Öwö wene´tade öwwöno wadeuwödö chänöngato, töwä töjatadö nönge nödöade yewanö jäcä naadöje mmaja. Täige inmai wamäade; töwö yowajo nämannäade töwö Cajiichana ne´tädöje na´de yeichödäje.
36
Tameedä adhesawä nu´dä yonomjacomo natodö, tä´mudhe jietaca äädöe neatode, tooni jödata cä, tuducomo cä mmaja ecatädö wetä yaawä nädöatode: "Yääcä, sacerdoteje weiñä tadawajöi änucä tuducä chanacadö we´tä".