1
Miyamanindeg langon angkoto a malilimod na inowit iran si Isa ko hadapan ni gobirnador Pilato.
2
Roo iran sekaniyan piphoonan somendit a tig iran a "Kiyatokawan ami a giyangkai a mama na gi niyan pamangendaon so mga tao ko marataan, ipeshapar iyan so kabayad sa bois ki Caesar, go pitharo iyan a sekaniyan so Al Masih a isa a solotan.
3
Iniisha rekaniyan i Pilato a "Ba seka so Solotan o manga Yahodi?" Somimbag si Isa a gominiraw "Sekay mitharoon."
4
Na gominiraw si Pilato ko manga poporo a imam ago so madakel a taw a "Da a miyatoon aken a ishala sa angkai a mama."
5
Ogaid na initaros iran baden a pthegetegelen niran a kaphesenditi iranon a "giiniyan shamoken so mga taw, gii mangosiat sa intiro a Juda, ipoon sa Galilia taman den sa angkaiya inged."
6
So kiyanega sii i Pilato na iniisha iyan o ba taw sekaniyan sa Galili.
7
Kagiya katokawan iyan a poon bes si Isa ko inged a ndadatoan i Hirod na piyakiwit iyan sekaniyan ki Hirod a samaoto na ndodoo mambo sa Yarosalim.
8
Tanto a miyababaya si Hirod kagiya mailay niyan si Isa, ka miyaneg iyan so makapantag on, na miyathay den a shisingayoon iyan a kailaya niyan on. Na iinamen iyan a mailay niyan si Isa a gii nggolaola sa piyakamemesa a nanao.
9
Na piyangingishaan sekaniyan i Hirod sa madakel a pakaisha, ogaid na da den sembaga i Isa.
10
Na miyobay so manga poporo a imam ago manga goro ko Kitab a kititindeg roo a tanto a mailot a kapesenditi iran ki Isa.
11
Oriyan iyan na piyamagongat ongat iran ago pishodi i Hirod ago so manga sondaro niyan si Isa, na piyakanditar iran sekaniyan sa kimon a mapiya na komasoy iran ki Pilato.
12
Sii den sa angkaoto a gawii na miyakangginawai si Hirod ago si Pilato, (ka sa da pen ai kanggolaola na meridoay siran.)
13
Piyakitawag i Pilato so manga poporo a imam ago so manga olowan ago so madakel a taw,
14
Na pitero iyan kiran a "Inowit iyo raken angkai a mama a pitero iyo a pepakirido iyan ko manga taw so gobirno. Na piyangingisean aken sii ko hadapan iyo, ogaid na da den a bako miyatoon a kasalaan iyan a ishala iyo ron.
15
Da matoon mambo i Hirod i sala iyan, ka piyakakasoy niyan rekami, na marayag a da a miyanggolaola niyan a ba sak a imbono on.
16
Sabap sii na pakipemadasan ko sekaniyan baden na mbokaan ko."
17
(Ka paliyogat ki Pilato a pakaliyon iyan kiran so sakataw a kalaboso igira a miyaoma ngkoto a Pista.)
18
Ogaid na mirengarengan siran den melalis a "Bonoa ngka sekaniyan! Si Barabas i bokai ngka para rekami!"
19
Miyakalaboso si Barabas sabap ko kiyaridoa niyan ko gobirno sa Yarosalim, na miyakapamono sekaniyan.
20
Kagiya kabaya i Pilato a mbokaan iyan si Isa na miyananalo peroman ko manga taw.
21
Ogaid na milalalis siran baden somembag a "Totoka ngka sekaniyan ko kros! Totoka ngka ko kros!"
22
Pitero kiran i Pilato sa miyakatelo a "Ngkaino? Antonaa i sala a pinggolaola niyan? Da a ba ko rekaniyan miyatoon a dait a kibono on. Sabap roo na pakipemadasan aken na mbokaan ko."
23
Ogaid na initaros iran baden sa gii iran kapelalalis sa matanog a ipethegel iran a thotoken si Isa ko kros. Na so gi ran gii ipelalalis na aya miyakataban,
24
Na kiyokom i Pilato sa ginawa niyan a tomanen iyan so pephangnin iran.
25
Na biyokaan iyan so mama a piyangni iran a kiyalaboso sabap ko kiyaridoa niyan ko gobirno ago sabap sa miyakapamono, na piyalad iyan si Isa ko kabaya iran a ikidia iran on.
26
Sii ko kapegowita iran ki Isa roo ko mbonoan on na miyakabalak siran sa mama a pepakapoon ko dii pagonayonayan, a si Simon a magiinged sa Sirini. Diyakep iran sekaniyan na piyakiposai iran on so kros, na pepakitondog iran on si Isa.
27
Madakel a manga taw a pepamanondog ki Isa, a so ped kiran na manga babay a di ran sekaniyan dii mboko ago dii ndidiyagaw.
28
Na diningilan siran i Isa a tig iyan a "Manga babay sa Yarosalim, di ako niyo
penggoraoka, ka aya niyo goraoka na so manga ginawa niyo ago so manga wata iyo.
29
Ka pekatalingoma so manga gawii a peteroon o manga taw a 'Rarakmatan so manga babay a di pembawata, ago so manga babay a da den mbawata ago da den kasosowi!' 30
30
Sangkoto a masa na peteroon o manga taw ko manga palaw a 'Tempagi kami niyo,' ago sii ko manga bobongan a 'Tamboni kami niyo.'
31
Ka o giyangkai a manga nganin i di ran dii nggolaolaa sii ko kapepelita pen o kayo na antonaa i kesowasowa amay ka miyarayong den?"
32
Aden pen a dowa kataw a tanganiyaya a pegowiten roo a mbonoon a ped i Isa.
33
Kagiya makaoma siran ko darpa a bebetowan sa 'Lagas a Olo,' na ron iran tiyotok si Isa ago so dowa kataw a tanganiyaya ko manga kros, a so isa on na sii sa kawanan i Isa, na so isa peman na sii sa diwang.
34
Na pitero i Isa a "Hey Ama ko, rilai ngka siran ka di iran katawan i di ran dii nggolaolaan." Na pimbagibagi o manga sondaro so manga nditaren iyan a nggolalan ko kaperipa.
35
Kititindeg roo so manga taw a mbabantay, na so manga olowan na di ran dii pagongatongaten si Isa a tig iran a "Siyabet iyan so ped, na patot a sabeten iyan a ginawa niyan o sekaniyan so Al Masih a aya Miyapili o Allah!"
36
Piyagompatompat sekaniyan pen o manga sondaro. Miyobay siran on na diyawagan iran sa arak,
37
Na pitero iran on a "O seka so solotan o manga Yahodi, na sabeta ngka a ginawangka!"
38
Na sii ko kaporoan iyan na aden a misosorat on a "Giyai so solotan o manga Yahodi."
39
So isa ko manga tanganiyaya a mabibitin roo na piyagitowito iyan si Isa a tig iyan a "Ba di seka so Al Masih? Sabeta ngka a ginawa ngka ago sekami!"
40
Ogaid na pimbongetan sekaniyan o ped iyan a tig iyan a "Ba da a kalek ka ko Allah? Ndatadatar a kapendanega rekta ago sekaniyan,
41
Ogaid na mapapatot rekta ini sabap ko miyanggolaola ta. Ogaid na giyangkai a mama na da a pinggolaola niyan a marata."
42
Na pitero iyan pen a "Hey Isa, tademi ako ngka amay ka makasoled ka ko Ndatoan ka."
43
Pitero rekaniyan i Isa a "Teroon ko reka a mataan den a imanto a gawii na keped ka raken roo sa kasorgaan."
44
Kagiya maoto den a alongan na kiyalibotengan den so dalem a inged oto taman sa alas numebe,
45
Sii ko ka plebuting o gawii. Mapasad na so rending a bibitinen roo ko Timplo na miyakisi a miyadowa timan.
46
Na si Isa na miphasong a gominiraw, " Tuhan, inisarigaken reka so niyawa aken sii sa ginawangka" so ( kiya tharoa niyan roo) kiyapaka pos siyan tharo na miyatay.
47
So kiya ilaya o sondaro ko miyangola ola na piyod niyan (biyantog iyan) so Allah, na gominiraw, "benar baa a matitho angkaiya taw."
48
Na so langon o madakel a taw a mitimotimo roo a mbabantay na kagiya mailay iran so miyasowasowa na mimbabaling siran a penggandangan iran a rareb iran.
49
So langon a ginawai i Isa a ped on so manga babay a miyamangonot rekaniyan a poon sa Galili na kititindeg siran sa malo mawatan a lomalangkaw sangkai a dii manggolaola.
50
Aden a mama a bebetowan sa Yosop a isa ko pangongokom ko manga Yahodi. Mapiya ago magiinontolan a mama
51
(A da makaayon ko kiyakokoma iran ki Isa ago so inikidia on) Poon sekaniyan sa Arimatiya, a isa a inged sa Yodiya, na pakatatalingomaan iyan so Ndatoan o Allah.
52
Somiyong sekaniyan ki Pilato na piyangni niyan on so lawas i Isa.
53
Na inibaba iyan ai a poon ko kros, na biyongkosan iyan sa onong a sotra na inibetad iyan ko kobor a kakakalotan den ko lakongan a da den katagoi sa miyatay.
54
Giyangkoto a gawii na Diyamaat, a so Gawii a Ipetiyagar ko Gawii a Idedeke.
55
So manga babay a miyonot ki Isa gowani a poon sa Galili na tomiyondog siran kiYosop na miyailay iran so kobor ago so kinibetaden roo ko lawas i Isa.
56
Oriyan iyan na miyaling siran na mitiyagar siran sa manga ikekamotan ago lana mamot para ko lawas. Ogaid na domike siran ko Gawii a Idedeke a so den so inisogo o Kitab.