¹ On an binuwat Diyos ti langit kag ti daga. ² Ti daga on-man may hitsura onman may sukad dulom ti sa tungod sa serong kay Spirito Diyos tig kimot sa babaw danum. ³ Binagaw Diyos, “Magkaimaw rayaw nagkaimaw ngani. ⁴ Nakitan Diyos ti rayaw magbaya siya itinuhay niya ti rayaw sa dulom. ⁵ Tinawag Diyos ti rayaw “sirang” bag-o ti dulom tinawag “yabi”. Pagkayabi ag nagsirang tida ti on-an sirang. ⁶ Binagaw Diyos, “Magkaimaw halaga sa karaw-an danum kag pabay-anan ituhay inda ti danum sa danum. ⁷ Binuwat Diyos may halaga sa sirong kalayawan ginan sa danum sa tungod kalayawan kag natupad ngani. ⁸ Binuwat Diyos may halaga ti langit, nag ras-og ti yabi nagsirang tida ti pangadwa pagsirang. ⁹ Binagaw Diyos, “Pabay anan nita ti kadanuman sa sirong kalayawan magkuruyugan sa usa ka lugar pabay-ani manluwang ti uga daga” Nagkatida ngani. ¹⁰ Pinangaranan inda Diyos “daga” ag ti natipon danum ay “dagat” kay pinangaran. Kamayad mayad sa kay pamantay. ¹¹ Binagaw Diyos “pabay-anan nita mantubo sa daga ti mga halaman mga taranumon na may imaw but-ol. ¹² Tinubuan ti daga mga halaman mga taranumon may imaw mga but-ol . Nakitan Diyos kamayad mayad sa kay pamantay. ¹³ Nanyabi kag nansurip inda ti ikatulo sirang. ¹⁴ Binagaw Diyos pabay ani nimo na magkaimaw rayaw sa langit hampay ituhay ti sirang ag yabi. Pabay-ani sida. ¹⁵ Pabay-ani nimo agod mangayaw rayaw sa babaw kalibutan. ¹⁶ Binuwat Diyos ti duwa ka lalaon pag mga marayaw pag bagay hampay pangunahan ti yabi ag ti mga dariing pag panggasan. ¹⁷ Ipinauli sida Diyos hampay mangayaw rayaw sa babaw kalibutan. ¹⁸ Agod pangunahan ti sirang ag yabi hampay ituhay ti marayaw ag ti madulom nakitan ngani Diyos ti mayad buwat. ¹⁹ Nagyabi ngani ag nansurip inda ti ikap’at pagsirang. ²⁰ Binagaw Diyos “Pabay-anan nita mapun-an ti kadanuman tanan mga maybuhi kang binuwat. Mapun-an ti kalayawan mga maglayang mga manok sa babaw daga. ²¹ Nakan ngani hinimo Diyos ti daraka pag mga binuwat na mag-ulian sa dagat. Katida diman ti bawat may buhi kay binuwat kay mga kaibahan mga magkimot kag magtiripunan sa kadanuman ag manok may pakpak. Mayad gid sa kay pamantay. ²² Pinapaladan sida Diyos kag binagaw, “Pagburak kamo kaadok pun-a ti kadanuman sa dagat. Pabay-ani man adok ti manok sa mundo.” ²³ Nanyabi kag nansurip inda ti ikalima pagsirang. ²⁴ Binagaw Diyos,“Pabay-anan nita magkaimaw ti mundo maisog ag magyapang mga hayop bawat usa inda sa kay kapareho. Nagkaimaw ngani. ²⁵ Binuwat Diyos ti mga maisog pag hayop sa mundo sa kanda sadili kapareho, ti mga hayop magyapang sa babaw daga. Nakitan niya inda kamayad mayad sa kay pamantay. ²⁶ Binagaw Diyos buwaton niko ti tawo angay sa kay pareho. Pinabay-anan sida mamahala sa isda dagat sa mga manok sa langit. Sa mga hayop sa daga kag sa mga bagay maybuhi magyapang sa babaw daga. ²⁷ Binuwat niya ti tawo angay sa kay pareho. Binuwat niya sida lalaki kag babaye binuwat niya sida. ²⁸ Pinapaladan sida Diyos kag sinabihan sida pagburak kamo kag pagyamo. Punua niyo ti daga kag supela niyo pamahalae niyo ti isda sa dagat mga manok sa langit kag mga maybuhi. Kag sa mga bagay magkimot sa babaw daga. ²⁹ Binagaw Diyos, “Bantaye niyo ipagkatiwala niko sa kanyo ti bawat pananom.” Mag ayaw but-ol sa babaw daga kag sa bawat puon kayo kaibahan ti burak mag ayaw but-ol sa sulod inda ti karan-unon niyo. ³⁰ Sa bawat hayop sa babaw daga sa mga manok sa langit kag sa bawat ilamnon magyapang sa babaw daga kag sa bawat binuwat maybuhi mag arop inayaw niko ti tanan karan-unon nagkatida ngani. ³¹ Nakitan Diyos ti tanan bagay kay binuwat. Nakitan ngani niya mayad. Pagka yabi nagsirang inda ti ika-unom pagsirang.