¹ Sa dihang gusto nako ayohon ang Israel, makita gayod ang sala sa Efraim, bisan paman ang mga daotang binuhatan sa Samaria, kay nagbuhat sila ug pagpangilad; mosulod ang kawatan, ug usa ka bandido mosulong sa kadalanan. ² Wala nila mabantayi sa ilang kasingkasing nga nahinumdoman nako ang tanan nilang mga daotang binuhatan. Karon ilang binuhatan naglibot kanila; ania sila sa akong atubangan. ³ Pinaagi sa ilang pagkadaotan gilipay nila ang hari, ug pinaagi ilang mga bakak gilipay usab nila ang mga opisyal. ⁴ Mananapaw silang tanan, sama sa gipainit nga pugon sa panadero, nga moundang sa pagsiga sa kalayo gikan sa pagmasa sa harina hangtod nga motubo kini. ⁵ Sa adlaw sa among hari gisakit sa mga opisyal ang ilang mga kaugalingon pinaagi sa makapainit nga bino. Gituy-od niya ang iyang kamot niadtong nagbugalbugal. ⁶ Tungod kay sama sa pugon ang ilang kasingkasing, gihimo nila ang ilang malimbongon nga plano. Nag-aso-aso ang ilang kasuko sa tibuok gabii; ug sa pagkabuntag misilaob kini sama sa nagdilaab nga kalayo. ⁷ Silang tanan init sama sa pugon, ug gilamoy nila kadtong nagdumala kanila. Nangalaglag ang tanan nilang mga hari; ug walay bisan usa kanila nga mitawag kanako. ⁸ Misagol si Efraim uban sa mga katawhan. Si Efraim sama sa lapad nga pan nga wala pa mabali. ⁹ Gikaon sa mga langyaw ang iyang kusog, apan wala siya kahibalo niini. Giwisik-wisikan siya ug mga puti nga buhok, apan wala siya kahibalo niini. ¹⁰ Ang pagkamahitas-on sa Israel mao gayod ang nagpamatuod batok kaniya; bisan pa niana, wala sila mibalik kang Yahweh nga ilang Dios, ni wala sila nangita kaniya, bisan pa niining tanan. ¹¹ Si Efraim sama sa salampati , danghag ug walay nahibaw-an, nga nagtawag sa Ehipto, unya milupad didto sa Asiria. ¹² Sa dihang moadto sila, ikatag ko ibabaw nila ang akong pukot, ipaubos ko sila sama sa mga langgam sa kawanangan. Silotan ko sila sa ilang pakig-uban. ¹³ Pagkaalaot nila! Kay mibulag sila gikan kanako. Moabot na kanila ang kadaot! Nagmasinupakon sila batok kanako! Luwason ko unta sila, apan nagsulti sila ug mga bakak batok kanako. ¹⁴ Wala sila mihilak kanako sa tibuok nilang kasingkasing, apan midangoyngoy lamang sila sa ilang higdaanan. Nagtigom silang tanan ug trigo ug bag-ong bino, unya mibiya sila kanako. ¹⁵ Bisan ug gimatuto ko sila ug gilig-on ang ilang mga bukton, karon naglaraw sila ug daotan batok kanako. ¹⁶ Mibalik sila, apan wala sila mibalik kanako, ang Labing Halangdon. Sama sila sa udyong nga dili makapana. Mangalaglag gayod ang ilang mga opisyal tungod sa kabastos sa ilang mga dila. Mahimo kining bugal-bugal sa yuta sa Ehipto ngadto sa Israel.