¹ काहाका मायुय सोता आरी ठरवुलो आथो का माय फाचे दुख दा तुमाही आवु नेय. ² काहाका आय तुमाहाल दुख दीहू, ता जियाल माअ की दुख वेअहे तिया सिवाय मान खुब आनंदी केअणारो केडो हाय ? ³ आने मायुय इज लिखलो आथो म्हणजे माय आवेहे ताहा जियाखातोर माय आनंद केरा जोजे तियाहीने मान दुख नाय वेअरा जोजे. ⁴ कारण मायुय दुखाकी मोनाम कालावाला आन आहवे पाडीन तुमाहान लिख्यो, तो तुमा दुखी वेरा जोजे आखीन नाहा पेन तुमाहाप जी मोय हाय तियु गेहराई तुमाहाल होमजाय जोजे. पश्चात्ताप केले हाय तीयाहान क्षमा केणु ⁵ जर केडाअय दुख देदो वेरी ता तियाय फोक्त मालुज दुख देदो एहकी नाहा ता काही प्रमाणाम तुमा बादाहान देदोहा ति गोठीहीकी माय कोठीण विअऊ एहकी मा इच्छा नाहा. ⁶ एहंडा माअहाल बहुमताकी देदली ती शिक्षा हारी, ⁷ तियाहाल तियाहान तुमा क्षमा कीइन तियाहान जाअगे केअरा जोजे, याखातोर का खुब दुखा की दाबाय नाय जा जोजे. ⁸ तियाहाल आय तुमाहाल विनंती कीअहू का जियाप तुमा मोया हाय एहकी तियाहा खातोरी की ल्या. ⁹ काहाका मायुय इया खातोर बी लीखलो का तुमाहान पारखी लिऊ का तुमा मा बाद्द्या गोठ्या माना केअता तियार हाय का नाहा? ¹⁰ ज्या केअडा तुमा केहंडाबी मापा की क्षमा व्याहा तियाल माय बी माफ की देहे, काहाका मायु माफ केअयो क्षमा केअयो तियाल तुमा केअता मायु ख्रिस्ता हुंबूर केअलो हाय. ¹¹ इया खातोर का सैतान आपनेहेन ठोगावा नेय जोजे काहाका आपु तिया खाराब योजना जा ते नाहा एहकी नाहा. ¹² जाहा माय येशु सुसमाचार आखा त्रोवास शेहराम आलो ताहादेवाय मा केअता एक नोवो बाअनो अगडावी देदो. ¹³ मा पाअवुहू तीत माअन सापडुतलो नाय तियाहाल मान चैन नाय पोडतिली आन तिहीने माहान मिलीनु माअय मासोदोतियाम निगी गियो. ¹⁴ पेन देवा आभार मानुहू जो ख्रिस्ताम आमाहान सादा विजयामने ली जाहे, तियाहा बोद्दल ओकली हारोवास बाठ्ठा जागाहाप आमाहाकी बाहुदुसे फैलाहाय. ¹⁵ काहाका जिया तारण वि रियोहो एहन्डा माहाम आन तियाहा नाश वि रियोहा एहंडा माआहाम आमा देवाल ख्रिस्ता सुवास हाय, ¹⁶ ज्या माअहा नाश बी रियोहो मृत्यु मोअनुवास आन जिया तारण बी गियोहो, जीवना होवे ली जाणारो जीवना वास हाय. ¹⁷ काहाका आमाती बिहीरा होच नाहा जे परमेश्वरा वचनाम मिलावट केअतेहे पेन मोना खेरापणाहाकी आन परमेश्वरा होवेन परमेश्वर इही हायुज एहकी होमजीन मसिम आखताहा.