¹ देवा इच्छा की येशु ख्रिस्ता प्रेषित पॉल आन पावुहू तीमथ्य याहीने करींथ शहरामेने देवा मंडळील आन अखया प्रांतामेने बांदाहान देवा पवित्र माहान सालाम. ² आपु बाहको पोरमेहेर आन प्रभु येशु ख्रिस्त याहांपणे तुमानेहे कृपा आन शांती मिले, ³ आपु प्रभु येशु ख्रिस्ता भोगवान आने बाहको जो दुनिया बाहको आन शांती पोरमेहेर हाय, तीया स्तुती वे. ⁴ तो आमनेहे बादाहा संकटाम दिलासो देहे इया खातोर जो दिलासो आमनेहेन खुद देवाहीने मिले तेहकी केअडो संकटाम पोडलो वेरिता तोज दिलासो आमा बिहिराहाण बी देजी. ⁵ जेहकी ख्रिस्ता दुखे आमाहाप खुब आवतेहे तेहकीज ख्रिस्तापने आमनेहेन शांती बी खुब मिलेहे. ⁶ आन आमाहाप संकट आवेहे, तो तुमाहान शांती आन तारण मिला जोजे आखीन आवेहे, आन तुमनेहेन जी शांती मिलेहे तो तुमा शांती केअता मिलेहे काहाका जी दुखे आपु भोगी रियाहा ती धीराहाकी सहन केरा खातोर तुम्हाल सामर्थ मिलेहे. ⁷ आन आमा आशा तुमा खातोर पाक्की हाय, काहाका आम्हाल इ मालुम हाय जेहकी तुमा दुख भागीदार हाय तेहकीज शांती बी भागीदार हाय. ⁸ पावुहू आमाहाप आशियाम जो संकट आललो तिया बाबतीम आमनेहेन लागेहेका सहन नाय वेतलो ओतोहो आमा दोडपाय गेहेला आथो का आमाहाय आमा आमी जिवता रीहु एहकी बी आशा सोडी देदली आथी. ⁹ खेरोंज आमाहान लागतोलो का आमा आमी मोअणाराज हाय पेन आपु सोताप विश्वास नाय थोवता जो देव मोअलान बी जिवतो की देहे तियाप आमा विश्वास थोवा जोजे तियाहाल इ घडलो. ¹⁰ तियाय आमाहान मोअती मोठी संकटामने सोडव्यो तो आमी सेाडावी रियोहा, आन तो आमाहन आगला बी सोडवी, एहकी आमा तियाप आशा हाय. ¹¹ तुमा बी आमा केअता प्रार्थना कीईन आमा मदत केरा जोजे. ताहा खुब प्रार्थना माहाकी देवाय आमाहान कृपा देदीही. फाचे खुब माही आमाखातोर उपकार मानी. पौला शुध्द हेतु ¹² आमाहान बोडाय मारनु कारन म्हणजे, आमा विवेकबुध्दी साक्षी आमा माहा ओकलीहकी नाय ता देवा कृपाहाकी देवा पवित्रतायीहीकी आन प्रमाणीकपणे जगाम आण तुमा आरी रियाे. ¹³ आमा तुमाहाल बिहीरो कायुज नाहा निखता फक्त जोज जो तु वाचतोहो आन मानतोहो बी आन मान आशा हाय तु सेवट लुगू बी मानतो रेहो. ¹⁴ काहाका तुमाहामेन कोतोहाय तेबी मानी लेदोहो का आमा तुमा खातोर बोडाय केअणु कारण हाय तेहकी प्रभु येशु दिह्याल आमा खातोर तुमा बोडायी कारण व्याहा. ¹⁵ इज भोरुसाहाकी माय इतवुतलो का पेहलो माय तुमहाय आवु दया खातोर तुमनेहेन बेन भेटी फायदा वेरा जोज. ¹⁶ मायु मासेदोनीयाल जावनु वेल तुमनेहेन मिलनु योजना केयी आने फासे मोसोदीनीयामेने तुमाअही आवु आन फाचे तुमा मान यहुदीया होवे वाटे लागवा जोजे, ¹⁷ एहन्डो विचार किईन मायुय खुब चंचलपण देखावी का ? काय मा जो केअरा हाय तो मा शरिरा इच्छा की की रियाहो का म्हणेज माय मा एकाज टाइमाप हा बी आखे आन नाहा, नाहा बी आखुहू. ¹⁸ पेन देवबाहाको जेहकी विश्वसनीय हाय तेहकीज आमा तुमाआरी गोगणु हाय. ¹⁹ काहाका भोगवाना पोयरो येशु ख्रिस्त जो आमापने म्हणजे आय ने सिल्वान न तिमोयी इयापने तुमाम प्रगट केरायो तो हा ने ना वियो नाहा ता तियांम हा इज वेयो. ²⁰ काहाका देवा बाद्दे वचन तियाम हा एहकी हाय तियाहाल आमा देवा महिमा केअता "आमिन" आखतेहे. ²¹ जो तुमाआरी ख्रिस्ताम स्थिर केअहे आन जियाय आपु अभिषेक केआयो तोज पोरमेहेर हाय. ²² तेहकीज यिाय आपुहूप शिकको बी ठोकी देदोहा आन जो आवणारो हाय तिया खात्री केअता आपु मोनाम पवित्र आत्मा विसार बी देदोहो. ²³ माय देवाल साक्षी थोविन आखु का माय कुरंथिंयाम या खातोर नाहा आलेा का माल तुाहाप कींवा बावतीली, ²⁴ एहकी नाहा का आमा तुमा विश्वासाप अधिकार गाजवुताहा पेन तुमा आनंदाम आमा तुमा आरी हाय काहाका तुमा विश्वासहाकी उभे हाय.