¹ عیسی پراز روح القدس اند از رودِ اردن اَ واگِشت و روح اَنَه اَ بیابو هدایت اُشکِه ² در اَنکَه ابلیس چِهل رُز اَنَه وسوَسَش کِه در اَنَه رُزیا چیزی اُش نِخَه و آخَرِ اَنَه رُزیا گُرسنَه بُیس ³ پَس اَ اَنَش گُت اَگَه پُسِ خدا اِسِش اَ اِ سَنگی بِگو نو بِبَش ⁴ عیسی جواب اُشدا نوشتَه بُدِه که انسان تنها اَ نو زِندِه نی ⁵ سپس ابلیس اَنَه اَ جایِ بلندیش بو و اَمی موقَع تمومیِ حکومتیای دنیا شَه نِشو دا ⁶ وَ اُشگُت مَه هَمَی اِ قدرت وتمام شکوهِ اِدَیا اَ تو اَبَخشِم چون که اَ مَه سِپُردَه بُدِه و اجازَه اُمِه اَنَه اَ هَر کی که مَوی آدَیم . ⁷ پس اَگَه اَ پِشِ مَه سِجدَه بُکُنِش اِدَیا بَرَی تو اَبو ⁸ عیسی جواب اُشدا نِوشتَه بُدِه خداوند خدایِ خوت بِپَرَس و تنها اَنَه عبادت بُکُن ⁹ اَمی موقع ابلیس اَنَه اَ شهرِ اورشلیم اُشبو و اَ بَرَی معبد قرار اُشدا و اُشگُت اَگه پُسِ خدا اِسِش خوت اَ زیر اوبی ¹⁰ چون نِوِشتَه بُدِه دربارَی تو اَ فرشتَیای خوت فرمان اَدِه تا نگهبانیای تو بِن ¹¹ اَنَیا با دَسیاشو تو تَه گِرِن نِکُنِه پات اَ سنگی بُخوی ¹² عیسی جوابُش دا گُتَه بُدِه خداوند خدایِ خوت را میازما . ¹³ چون ابلیس اَمَی اِ وسوَسَیا تمومُش که تا مدتی از اَنَه جدا بُیس ¹⁴ عیسی اَ قُوَتِ روح اَ جلیل واگِشت و خَبَرِ اَنَه اَ سراسَرِ اَنَه نواحی پیچی ¹⁵ اَنَه در کِنیسَیا تعلیم شَه دا و هَمَه اَنَه ستایِش شا کِه ¹⁶ پَس اَ شهر ناصِرَه که در اَنَه گَپ بُسُن چو و در رُزِ شبات طبقِ معمول اَ کَنیسَه اُند و بلند وابُیس تا تلاوت بُکُن ¹⁷ طومارِ اشعیای نبی شا اَنَه دا چون اَنَه بازُش که قسمتی اُش واجو که اَگو ¹⁸ روحِ خدا بَر مَه اِسی چون مَه مَسحُش کِردِه تا فقیریا بشارَت آدَیم و مَه اُش فِرِسَدِه تا اسیریا را رهایی آدَیم و بینایی را اَ کوریا اعلام بُکُنِم و ستم دیدَیا را رهایی آدَیم ¹⁹ و سالِ لطفِ خداوند را اعلام بُکُنِم ²⁰ پَس طومارُش پیچی و اَ خادِمِ کِنیسَش دا و شِه اَمَه در کِنیسَه چِشِش شو اَ اَنَه اَند . ²¹ اَ موقع اِ گَپی آغاز اُشکِه اِرُز اِ نِوِشتَه موقَی که گُش تا دا جامِع عمل اُش پوشی ²² اَمَه از اَنَه خَش شا گُت و از گُتَی فیض آمیزُش در شِگِفت اَندِن وَ شا گُت اِ پُسِ یوسف نی ؟ ²³ عیسی اَ اِدَیا اُشگُت ، اِ مَثَلی بَرَی مَه اَگوی اِ طبیبِ خوت شفا آدِه هر چه مو شِنُفتِه در کفر ناحوم اُتکِردِه اِنکِه در زادگاهِ خوت انجام آدِه ²⁴ پس اُشگُت آمین اَ شما اَگواِم که هیچ پیامبری در دیار خُش پَذیرفتَه نابو ²⁵ یقین بِدَنی که در زمانِ ایلیا آسمو سه سال و نیم بَسَه بُیس و خُشکسالی سَختی تمامِ اَمی سرزمینی اُشگِرِت بیوِه زنیای زیادی در اسرائیل اَندِن ²⁶ اما ایلیا اَ پَلو هیچ کُدُم فرستادَ نِبُیس مَگه اَ پَلو بیوِه زَنی در شهر صرفه در سرزمینِ صیدون ²⁷ در زمان الیشع نبی جذامیای زیادی در اسرائیل اَندِن ولی هیچکدوم از اَنَیا از جذامِ خوت پاک نِبُدِه مَگهنعمانِ سریانی ²⁸ اَمی موقع اَمَی کِسایی که در کنیسِه اَندِن از گُتَی اِ حرفیا آشفتَه بُدِن ²⁹ و بلند وابُدِن اَنَه از شهر شا دَر کَشی و اَ لَبَی کوهی که شهر در اَنکَه بنا بُسُن شو بو تا از اَنکَه شَه زیر اوبَین ³⁰ اما اَنَه از بَینِشو رَد بُیس و چو ³¹ پس عیسی از کفرناحوم شهری در جلیل چو و در رُزِ شبات اَ تعلیمِ مَردُم مشغول بُیس ³² اَنَیا از تعلیمِ اَنَه در شگفت اَندِن چون در کلامُش اقتدارَن ³³ اما در کَنیسَه مَردی دیو زَدَه اَند که روحِ پلیدی اُشَن اَنَه با صدایِ بلند اُشگُت ³⁴ اَی عیسی ناصری تو اَ ما چه کَری اُتِه ؟ اُندِسِش نابودمو بُکُنِش اَفَمم که اِسِش تو قدوسِ خدا اِسِش ³⁵ عیسی اَ روحِ پلید نَهیب اُشزَت و اُشگُت خاموش بَش و از اَنَه اَ در بِدا اَمی موقع دیو اَنَه مَردو اَ جلو مَردُم اَزَمی زَت بدونِ آسیبی اَ اَنَه بِرَسِه ³⁶ از اَنَه اَ در اُند مَردُم اَمَه شِگِفت زَدَه اَ یَک دِگَه شا گُت اِ چه کلامی اِسی اَنَه با اقتدارو قدرت اَ روحِ پلید فَرمو اَدِه و اَ در دااِن ³⁷ اِندِه اَند که خبرِ کاریای اَنَه اَ سرتاسرِ نواحی پیچی ³⁸ اَمی موقع عیسی کَنیسَه تَرک اُشکه و اَ خونَی شَمعون چو و اما مادر زَنِ شمعون تو{تَب} سَختی اُشَند اَ عیسی اُشگُت کمکش بُکُن ³⁹ اَنَه اَ بالینِ وی خم بُیس و اَ تو {تَب} نَهیب اُشزَت و توش{تَبش} قَطع بُیس و اَنَه با عجلَه بلند وابُیس و مشغولِ پذیرایی از اَنَیا بُیس ⁴⁰ موقع مغرب اَمَی کِسایی که بیماریای مبتلا اَ مَرضیای گوناگون شو اَند اَ پَلو عیسی شو آو و اَنَه اَ یَک به یَکِ اَنَیا دَس اُشنا و شفا شو اُشدا . ⁴¹ و دیویا از خَیلیا اَ در داندِن و فریاد کُنان شا گُت تو پُسِ خدا اِسِش اما اَنَه اَ اَنَیا نَهیب شَه زَت و اُشنا اِشت حرف بِزَنِن چون شا فَمی مَسیح اِسی ⁴² صُبِ وَگَه عیسی اَ مَکانی دور افتادَه چو اما مَردُم شَه دُم اَگِشتِن وچون اَ جایی که اَند رَسِدِن تلاش شا که که نِچو ⁴³ ولی اَنَش گُت مَه باید پادشاهیِ خدا را در شهریای دِگَه بشارت آدَیم بَرَی اَمی فرستادَه بُسِم ⁴⁴ پس اَ موعظَه در کَنیسیای یهودیَه اِدامَش دا