¹ در سپیدَه دَم رُزِ اولِ هَفتَه زِنیا حنوطی را که فراهم شو کِردِس سون با خوشو شو واسِه اَ مَقبَرَه چِدِن ² اما شو بینا سنگِ جلو مَقبَرَه اَ کناری غَلطیدَه بُدِه ³ چون اَ مَقبَرَه اَ جا چِدِن بدن عیسی خداوند شو نِبینا ⁴ از اِ امر در حیرت اَندِن که ناگاه دو مَرد با جَمَییای درخشان در کنارِ اِدَیا وَیسَدِن ⁵ زِنیا از ترس سَریای خوشو اَ زیر شو بِس اما اَنَه دو مَرد اَ اِدَیا شو گُت چواِ تا وی زندِه را اَ میونِ مُردَیا پیدا بُکُنی ؟ ⁶ اَنَه اَ اِنکِه نی بلکه بلند وابُدِه اَ یاد بیاری موقَعی که در جلیل اَند اَ شما چه اُشگُت . ⁷ اُشگُت که پُسِ انسان باید اَ دَسِ گناهکاریا تسلیم ببو اَ صلیب کَشِدَه ببو و در رُزِ سوم بلند وابو ⁸ اَمی موقَع زِنیا سخنیای اَنَه شا یاد اُند ⁹ چون از مَقبَرَه واگِشتِن اِدَیا بَرَی یازدَه رسول و دیگران شو گُت ¹⁰ زنیای که اِ خبر اَ رسولان شو دا مریم مجدَلیه ،یوآثا، مریم مادرِ یعقوب، و زنیای همراه اِدَیا اَندِن ¹¹ اما رسولیا شو گُت زنیا هزیون اَگُتاین و حرفیاشو باور شو نِکِه ¹² با اِ همه پطرس بلند وابُیس و طرفِ مَقبَرَه دوید و خم بُیس نِگاش که اما جز کفن چیزی اُش نبینا پس حیران بُیس از اَمی که رواُشدَیسون اَ خونَه واگِشت ¹³ در اَمی رُز دو نفر از اَنَیا اَ دهکَدَی اَچِدِن عماعوس نام واقع در دو فرسنگیِ اورشلیم ¹⁴ اِدَیا در بارَی اَمَی واقع ای که رخ اُشدَیسُن با یَکدِگَه گفتگو شا که ¹⁵ اَمدِه که سرگرمِ بحث و گفتگو اَندِن عیسی خوش اَ پَلو اَنَیا اُند و با اِدَیا همراه بُیس ¹⁶ اما اَنشه شو نِشناخت چون چِشیای اَنَیا بسَه بُسُن ¹⁷ از اَنَیا اُش پُرسی در راه دربارَی چه گفتگو اَکِردُی؟ اَنَیا با چِهرَیای اندوهگین ساکت وَیسَدِن ¹⁸ اَمی موقع یکی از اِدَیا که کلئوپاس اسم اُشَن در پاسخ اُشگُت آیا تو تنها شخص غریب در اورشلیم اِسِش که چیزی در اِ رُزیا واقع بُدِه بی خَبرِش؟ ¹⁹ اُش پُرسی چه چیزی ؟ شو گُت اَمی که بَر عیسیِ ناصری گذشت اَنَه پیامبری اَند که در پیشگاه خدا و پلواِ اَمَی مَردُم کلام و اعمالِ پُر قدرتی اُشَن ²⁰ سَریای کاهنیا و بزرگیای اَما اَنَه شو سِپُرد تا اَ مَرگ محکوم ببو و اَ صلیب شو کشی ²¹ اَما اَما امید مواَند اَنَه اَمی بو که باید اسراییل را رهایی آدِه علاوِه بر اِدِه سه رُز از اِ وَقایع گذشتَه بُدِه ²² بعضی از زِنیا که اِنکِه اِسِن اَما حیرت زَدَه شو کِه اَنَیا اِرُز صُبِ زود اَ مَقبَرَه چِدِن ²³ اَما جَسَدِ اَنَه پیداشو نِکِه اَمی موقَع اُندِن اَ اَما شو گُت فرشتَیایی در رویا شو بینَدِه که اَ اِدَیا اُشگُتِه اَنَه زندَه اِسی ²⁴ بعضی از دوسیای اَما اَ مقبَرَه چِدِن و اَمدِه که زنیا نقل شو کِردِسُن شو بینا اما اَنَه شو نِبینا ²⁵ اَمی موقع اَ اِدَیا اُشگُت ای بیخِرَدیا که دلی دیر فهم بَرَی باور کِردَی انبیا تواِ ²⁶ آیا نابُیس مسیح اِ رَنجیا بِبینِه و سپس اَ جلالِ خوش در بیا ؟ ²⁷ پس از موسی و اَمَی انبا شروع اُشکه و هر چه که در تمامیِ کتبِ مقدس در بارَی اَنَه گفتَه بُسُن شازَر توضیح دا ²⁸ چون اَدهکدَی که مقصد شو اَند نَزیک بُدِن عیسی وانمود اُشکه شَوی دورتر اُچو ²⁹ اَنَیا اصرار شو که و شو گُت و شو گُت با اَما وامَن چون چیزی اَ پایانِ رُز نِوامُندِه و شو نَزیکِه اِسی پس داخل بُیس تا با اِدَیا وامَنِه ³⁰ چون با اَنَیا اَ سَرِ سفرَه اُداسون نو{نان} اُشواسِه و شکر اُشکه پَرَش که و اَ اِدَیا اُشدا ³¹ در اَمی موقع چشیای اِدَیا باز بُیس و اَنَه شو شِناخت اَما اَمی موقع از نظرِشو ناپدید بُیس ³² اَنَیا از یَکدِگَه شو پُرسی آیا موقَی که در راه با اَما سخن شَه گُت و کتبِ مقدس بَرَمو تفسیر شَه که دل اَ درونِ اَما ناتپی؟ ³³ پس بیدرنگ بلند وابُدِن و اَ اورشلیم واگِشتِن اَنکَه اَنَه یازدَه رسول پَیداشو که که با دوسیای خوشو جمع بُسُنِن ³⁴ شا گُت اِ حقیقَت اُشِه که خداوند قیام اُشکِردِه چون اَ شمعون ظاهر بُسُن ³⁵ پس اَنَه دو نفر شو گُت که در راه چه روی اُشدا و چطوری عیسی را موقَعی پَرَه کِردَی نو{نان} شو شناختِه ³⁶ اَنوز در اِبارَه گفتگو شا که که عیسی خوش در میونِشو وَیسا و اُشگُت سلام بر شما بو ³⁷ حیران و ترسان فکر شا که شَبَهی اَبینِداین ³⁸ اَ اَنَیا اُشگُت چواِ اِندِه مظطربی چواِ شک و تردید اَ دل راه اَدِدُی؟ ³⁹ دست و پام بنگَری خوم اِسِم اَ مَه دَس بِزَنی و ببینی شَبَه گوشت و استخوان اُشنی اَمدِه که اَبینِدُی مَه اُمِه ⁴⁰ اِدِشگُت و دَستیا و پاییای خوش اَ اِدَیا نِشو اُشدا ⁴¹ اَنَیا از فَرتِ خوشحالی و حیرت شو ناشَیس باور بُکُنِن پس اَ اِدَیا اُشگُت چیزی بَرَی خَردَه تواِ ؟ ⁴² تِکَی مَی{ماهی} بریان اَ اَنَشو دا ⁴³ اَنَش واسِه و اَ مقابلِ چِشیای اِدَیا اُش خَه ⁴⁴ یَکدَفَی اَ اِدَیا اُشگُت اِ اَمی اِسی که وقتی با شما اَندِم مَگُت اَمَی اِدَیا چییای اِسی که در توراتِ موسی و کتبِ انبیا و مزامیر در بارَی مَه نوشتَه بُدِه باید اَ حقیقت بِپیوندِه ⁴⁵ پس ذهنِ اِدَیا روشن اُشکه تا شو بشا کتبِ مقدس درک بُکُنِن ⁴⁶ و اَ اِدَیا اُشگت نوشتَه بُدِه که مسیح رَنج اَکَشِه و در رُزِ سوم از مردگان بلند اَ وابو ⁴⁷ بنامِ اَنَه توبَه و آمرزِشِ گُنایا اَ اَمَی قومیا موعظَه اَبو و شروعِ اَنَه از اورشلیم اِسی ⁴⁸ شما شاهدیای اِ امور اِسی ⁴⁹ مَه موعودِ پدرِ خوت را بَر شما اَفِرِسِم پس در شهر وامَنی تا اَمی موقع که ازاعلی با قدرت آراستَه بِبی ⁵⁰ پس اِدَیا تا دَر از شَهر تا نَزیکیه بیت عنیا اُشبُردِن و دَسیای خوش بلند اُشکه برکتشو اُشدا ⁵¹ و اَمی اَمدِه که برکتشو شَه دا از اَنَیا جدا بُیس اَ آسمو بُردِه بُیس ⁵² اِدَیا اَنَه پَرستِش شو که و با شادی زیادی اَ اورشلیم واگِشتِن ⁵³ در اَنکَه پیوستَه در معبد اَوامُندِن و خدا را حمدُ سپاس شا که