¹ برادریای مَه ایمانِ شما اَ عیسی مسیح ، خداوندِ پُر جلالمو با تبعیض همراه نِبو ² اَگَه کِسی با انگشتری زَرین و جَمَی فاخر اَ مجلسِ شما اُند و فقیری نیز با جَمَی ژندِه اُند ³ و شما اَ اَنَه که جَمی فاخر شَه بَرِه توجهِ خاص تو که اَ اَنَه بوگوی در اِ جای خَش اونی اما اَ فقیر بوگوی امکِه وَیسا و یا اِنکِه پِشِ پایِ مَه اَ زَمی اونی ⁴ آیا در میونِ خوت تبعیض قائل نِبُسی و یا با اندیشِه بد قضاوت تو نِکِردِه ؟ ⁵ برادریای عزیز گُش آدَی مَگَه خدا فقیریای اِ جهان انتخابُش نِکِردِه تا در ایمان دولتمند بِن و پادشاهی را اَ میراث بُبُرِن که اَنَه اَ دوسداریای خوش وعدَه اُش دَدِه ؟ ⁶ اما شما اَ فقیر بی حرمتی تو کِردِه آیا دولتمندیا نیسِن که اَ شما سِتَم اَکُنِن و شما را اَ مَحکَمَه اَکَشِن ؟ ⁷ آیا اِدَیا نیسِن که اَ نامِ شَریف که بر شما نَدَه بُدِه کُفر اَگواِن ؟ ⁸ اَگَه براستی شَریعتِ شاهانَه مطابق با اِ گُفتَی کتاب اَ جا بیاری که اَگو همسایَت را مِثِ خوت مُحبت بُکُن کارِ خَش تو کِردِه ⁹ اما اَگَه تبعیض قائل ببی گُناتو کِردِه و شَریعت شما را مِثِ افرادی قانون شِکَن مَحکوم اَکُن ¹⁰ چون اَگَه کِسی تمامِ شَریعت نِگَه بِدَرِه اما در یَک مورد بِلَغزِه مُجرم اَ شِکستَنِه تمامِ شَریعت اِسی ¹¹ چه اَنَه که اُشگُت زِنا مَکُن اَمدِه که اُشگُت قتل مَکُن پَس هر چند زِنا نِکُنِش اما اَگَه قتل بُکُنِش شَریعت را اِشکَسِه ¹² پس مِثِ کِسیای سُخَن بوگوی و عَمل بُکُنی که اَدَنِن بر پایه ی شَریعت آزادی بَر اَنَیا داوری اَبو ¹³ چون داوری نِسبت به اَنَه که رَحم اُش نِکِردِه بی رَحم اَبو اما رَحم بر داوری پیروز اَبو ¹⁴ بَرادریای مَه چه سود اَگَه کِسی اِدعا بُکُن ایمان اُشِ اما عمل اُشنِبو آیا اِندِه ایمانی شَشا اَنَه نِجات آدِه ؟ ¹⁵ اَگَه برادر یا خواهری نیازمندِ پوشاک و خوراکِ روزانَه بو ¹⁶ و کِسی از شما اَ اِدَیا بِگو اُچی اَ سلامت و گَرم و سیر بِبی اَما بَرَی رفع نیازیای جِسمیِ اِدَیا کاری اَنجام نِدَی چه سودی ؟ ¹⁷ پس ایمان اَ تَنایی و بدنِ عمل مُردَه اِسی ¹⁸ آلا کِسی ممکن اِسی بِگو تو ایمانُتِه و مَه اَم اعمال اُمِه اما تو ایمانُت را بدونِ اعمال اَمَه بِنما و مَه ایمانُم را با اعمالُم اَ تو اَدَیم ¹⁹ تو ایمانُتِه که خدا یکی اِسی نیکو اَکُنِش ! حتی دیویا نیز اِندِه ایمانشواِ و از ترس اَ خو اَلَرزِن ²⁰ ای نادون تَوی بِدَنِش چواِ ایمانِ بدونِ عَمل بی ثَمر اِسی ؟ ²¹ آیا جدِ اَما ابراهیم اَ اعمال پارسا شِمُردَه نِبُیس اَمی موقَع که پُسِ خُش اسحاق را اَ مَذبَح تقدیم اُشکِه ²² اَبینِدایش که ایمان و اعمالِ اَنَه با هَم عَمل شا که و ایمانِ اَنَه با اعمالُش کامل بُیس ²³ و اَنَه نِوِشتَه انجام بُیس که اَگو ابراهیم اَ خدا ایمان شآو و اِدِه بَرَی اَنَه پارسایی شِمُردَه بُیس و اَنَه دوسِه خدا خَنَدَه بُیس ²⁴ پس اَبینی اَ اعمال اِسی که انسان پارسا شناختَه اَبو نه با ایمانِ تَنا ²⁵ اَمدِه که راحابِ روسپی اَ اَعمال پارسا شِمُردِه نِبُیس اَمی موقَع که اَ فِرستادَیا پَناه اُشدا و اِدَیا را از راهِ دِگَه رَوانَه اُشکِه ؟ ²⁶ اُ اَمدِه که بَدَن بدونِ روح مُردَه اِسی ایمان نیز بدونِ عَمل مُردَه اِسی