2 ¹ Шундай қилиб, эй, ҳукм қилаётган ҳар қандай одам, сенга узр йўқ, чунки бировга қарши қилаётган ҳукм билан ўзингни ҳукм қилмоқдасан. Зеро сен ҳукм қила туриб, ўзинг ҳам шу ишларни қиляпсан. ² Биз эса биламизки, бундай ишларни қилаётганларга ҳақиқат бўйича Худонинг ҳукми бор. ³ Наҳотки сен, эй одам, шундай ишларни қилувчиларни ҳукм этиб, ўзинг ҳам буларни қилсанг, Худонинг ҳукмидан қочиб қутуламан, деб ўйлайсанми? ⁴ Ёки Худонинг эзгулиги сени тавбага олиб бораётганини фаҳмламасдан, Худонинг эзгулигининг бойлиги ва мулойимлигию узоқ сабр-тоқатини менсимаяпсанми? ⁵ Аммо сен ўжарлигинг ҳамда тавба қилмаган юрагинг туфайли ғазаб кунига, яъни Худонинг ҳақ ҳукми ошкор бўлиши кунига ўзингга ўзинг ғазаб тўплаб юрибсан. ⁶ Худо эса ҳар кимни ўз ишига яраша тақдирлайди: ⁷ доимо яхши иш қилиб, шуҳрату шараф ва ўлимсизликни излаганларга У абадий ҳаёт ато этади, ⁸ лекин ўжарлик қилиб, ҳақиқатга бўйсунмай, ўзларини ноҳақликка топширганларга эса қаҳру ғазабини ёғдиради. ⁹ Ёмонлик қилувчи ҳар бир одамнинг жонига, биринчидан яҳудийга, кейин эса юнонга қийноқ ва қайғу бўлади. ¹⁰ Аксинча, яхшилик қилаётган ҳар бир одамга, биринчидан яҳудийга, кейин эса юнонга шуҳрат, ҳурмат ва тинчлик бўлади. ¹¹ Чунки Худода юз-хотирчилик йўқдир. ¹² Қонунга эга бўлмай гуноҳ қилганлар, Қонундан ташқарида ҳалок бўладилар. Қонун остида гуноҳ қилганлар эса Қонун бўйича ҳукм қилинадилар – ¹³ (чунки Худонинг олдида Қонунни тингловчилар ҳақ эмаслар, балки Қонунга риоя қилувчилар оқланадилар, ¹⁴ зеро Қонунга эга бўлмаган мажусийлар табиатан қонунли иш қилганларида, улар Қонунга эга бўлмай, ўз ўзларига қонундирлар: ¹⁵ улар ўз юракларида Қонуннинг ишлари ёзилганини кўрсатмоқдалар, уларнинг виждони ҳамда бир бирини гоҳ айбловчи, гоҳ оқловчи фикрлари бунга гувоҳдир) – ¹⁶ мен воизлик қилаётган Хушхабарга кўра, Худо Исо Масиҳ орқали инсонларнинг сирли ишларини ҳукм этадиган кунда ана шундай бўлади. ¹⁷ Мана, сен ўзингни яҳудий, деб атамоқдасан ва Қонунга таяниб, Худо билан мақтаниб юрмоқдасан. ¹⁸ Мана, сен Худонинг иродасини билмоқдасан ва Қонундан ўрганиб, энг яхши нарсаларни англамоқдасан. ¹⁹ Шунингдек, ўзингга аминсанки, сен кўрларга йўлбошловчи, зулматда бўлганларга нурсан, ²⁰ ақлсизларга устоз, чақалоқларга муаллимсан, Қонунда эса ҳақиқат ва билим намунасига эгадирсан. ²¹ Қандай қилиб сен бошқаларга ўргатиб, ўзингга ўргатмаяпсан? ²² Қандай қилиб: “Ўғирлик қилма”, деб воизлик қилиб, ўзинг ўғирлик қиляпсан ва: “Зино қилма”, деб айтиб, ўзинг зино қиляпсан? Қандай қилиб: “Бутлардан жирканаман”, деб ўзинг куфрлик қиляпсан? ²³ Қонун билан мақтаниб, ўзинг эса қонунбузарлигинг орқали Худони бадном қиляпсан. ²⁴ Худди ёзилганидек: “Сизлар туфайли мажусийларнинг орасида Худонинг номи куфрланмоқда”. ²⁵ Агар Қонунга риоя қилсанг, шунда сенинг хатнанг фойдалидир. Агарда сен қонунбузар бўлсанг, унда сенинг хатнанг хатнасизлик бўлади. ²⁶ Шундай қилиб, агар хатнасиз бўлган одам Қонун ҳақлигига риоя қилса, унинг хатнасизлиги унга хатналик, деб ҳисобланмайдими? ²⁷ Табиатан хатнасиз бўлиб, Қонунга риоя қилаётган одам сени, яъни Ёзув ва хатнага эга бўлган қонунбузарни ҳукм қилмайдими? ²⁸ Чунки зоҳиран яҳудий асл яҳудий эмас, шунингдек, зоҳиран танадаги хатна ҳам асл хатна эмасдир. ²⁹ Аммо ботинан яҳудий асл яҳудийдир, шунингдек, юрак хатнаси – асл хатнадир. Бу хатна эса Қонун ҳарфи бўйича эмас, Руҳ бўйичадир. Бундай одам инсонлардан эмас, балки Худодан мақтовга сазовор бўлади.