15 ¹ Биз кучлилар ўзимизнинг кўнглимизни олмасдан, заифларнинг ожизликларини кўтариб юришимиз керак. ² Ҳар биримиз ўз яқинимизни яхшиликка барпо қилиш учун унинг кўнглини олишимиз керак. ³ Чунки Масиҳ ҳам Ўзининг кўнглини олмас эди, аммо ёзилганидек: “Сени ҳақорат қилувчиларнинг ҳақорати Менинг устимга тушди”. ⁴ Зеро илгаридан нимаики ёзилган бўлса, бизнинг таълим олишимиз учун ёзилгандир, токи биз Ёзувдаги сабр-тоқат ва юпанч орқали умидга эга бўлайлик. ⁵ Сабр-тоқат ва юпанч Худоси эса сизларга бир-бирингиз билан Исо Масиҳга мувофиқ ҳамфикр бўлишни ато этсин, ⁶ токи сизлар якдиллик билан бир оғиздан Раббимиз Исо Масиҳнинг Отаси бўлган Худони улуғланглар. ⁷ Шунинг учун, Масиҳ сизларни Худонинг шуҳратига қабул қилганидек, сизлар ҳам бир-бирингизни қабул қилинглар. ⁸ Сизларга шуни айтаманки, оталарга берилган ваъдалар тасдиқланиши учун Худонинг ҳақиқати ҳақи Исо Масиҳ хатна қилинганларнинг хизматкори бўлди ⁹ ва раҳм-шафқат ҳақи мажусийларнинг хизматкори бўлди, токи улар Худони улуғласинлар, худди ёзилганидек: “Шунинг учун мажусийларнинг орасида Сени улуғлайман ва Сенинг исмингни куйлайман”. ¹⁰ Яна айтилган: “Эй, мажусийлар, Унинг халқи билан бирга хурсандчилик қилинглар”. ¹¹ Ва яна: “Эй, мажусийларнинг барчаси, Раббийни мадҳ этинглар! Эй, халқларнинг барчаси, Уни улуғланглар”. ¹² Йешайаҳ пайғамбар ҳам шундай демоқда: “Мажусийларга ҳукмронлик қилиш учун Иешайнинг томири кўтарилади. Мажусийлар Унга умид боғлайдилар”. ¹³ Умид Худоси эса сизларни ҳар қандай қувончга ва имондаги тинчликка тўлдирсин, токи сизлар Муқаддас Руҳнинг кучи орқали умидга бой бўлинглар. ¹⁴ Эй, биродарларим, менинг ўзим ҳам сизлар ҳақингизда аминманки, сизлар эзгулик билан тўласизлар, барча билимга тўлгансизлар ва бир бирингизга насиҳат қилишга қодирсизлар. ¹⁵ Аммо, биродарларим, сизларга эслатиб қўйиш учун бирмунча дадиллик билан ёздим. Зеро менга Худодан берилган иноят туфайли ¹⁶ мен мажусийлар учун Исо Масиҳнинг хизматкори бўлиб, Хушхабарнинг руҳонийлик хизматини бажармоқдаман, токи мажусийларнинг қурбонликлари Муқаддас Руҳ орқали муқаддасланиб, Худога маъқул бўлсин. ¹⁷ Шундай қилиб, Худога тегишли бўлган нарсаларда мен Исо Масиҳ орқали мақтансам бўлади. ¹⁸ Чунки Масиҳ мажусийларни бўйсундириш учун мен орқали сўзда ва ишда қилмаган бирор нарса ҳақида гапиришга журъат этмайман. ¹⁹ Масиҳ буни қудратли аломатлару мўъжизалар ва Худо Руҳининг кучи билан ижро этди. Шундай қилиб, мен Йерусалим ва унинг ён атрофидан бошлаб, то Иллирикагача Масиҳнинг Хушхабарини тўлиқ воизлик қилдим. ²⁰ Шу билан бирга, мен бошқаларнинг пойдевори устига қурмаслик учун Масиҳнинг номи ҳали маълум бўлмаган ерларда Хушхабарни воизлик қилишга жон куйдирдим. ²¹ Худди ёзилганидек: “У ҳақида бехабар бўлганлар кўрадилар, У ҳақида эшитмаганлар англайдилар”. ²² Мана шу сабаб сизларнинг олдингизга келишим учун менга кўп марта тўсқинлик қилди. ²³ Аммо энди бу юртларда шундай жойлар қолмагани ва анча йиллардан бери сизларнинг олдингизга келишни истаганим учун, ²⁴ Испанияга жўнаётганимда, сизларнинг олдингизга келаман. Чунки мен умид қиламанки, ўтиб кетаётганимда аввал сизларни кўриб, бироз дийдорингизга тўйганимдан сўнг, мени у ерга кузатиб қўясизлар. ²⁵ Ҳозир эса мен муқаддасларга хизмат қилиш учун Йерусалимга боряпман. ²⁶ Чунки Македония ва Аҳаядаги имонлилар Йерусалимда бўлган муқаддаслар орасидаги камбағаллар учун эҳсон тўплашни маъқул топдилар. ²⁷ Ҳа, маъқул топдилар, чунки улар яҳудийлардан қарздорлар-да: зеро агар мажусийлар уларнинг руҳий нарсаларига шерик бўлган бўлсалар, уларга ҳам моддий нарсаларда хизмат қилишлари керак. ²⁸ Шунинг учун мен шу ишни бажариб, уларга бу ҳосилни тақдим этгач, сизларнинг жойларингиз орқали Испанияга жўнаб кетаман. ²⁹ Ишончим комилки, мен сизларнинг олдингизга келганимда, Масиҳдаги тўлиқ қут-барака билан келаман. ³⁰ Эй, биродарларим! Раббий Исо Масиҳ ва Руҳ севгиси билан сизларга ёлвораман: Худога мен учун ибодатларингда мен билан бирга жанг қилинглар, ³¹ токи мен Яҳудиядаги имонсизлардан қутулай ва менинг Йерусалим учун бўлган хизматим муқаддасларга маъқул бўлсин, ³² токи мен Худонинг иродаси бўйича сизларнинг олдингизга қувонч билан келай ва сизлар билан ором топай. ³³ Тинчлик Худоси эса сизларнинг ҳаммангиз билан бирга бўлсин. Омин.