1 ¹ Худонинг Хушхабари учун ажратилган ва даъват этилган ҳаворий ҳамда Исо Масиҳнинг қули бўлган Повулдан салом. ² Худо азалдан Ўзининг пайғамбарлари орқали муқаддас Ёзувларда ваъда қилган ушбу Хушхабар Унинг Ўғли ҳақидадир. ³ У жисман Довуднинг уруғидан бўлиб, ⁴ муқаддаслик Руҳи бўйича эса ўликлардан тирилиши орқали Худонинг Ўғли эканини қудратда намоён қилди. ⁵ У орқали биз иноят ва ҳаворийликни олдик, токи Унинг номи ҳақи барча халқларни имонга бўйсундирайлик. ⁶ Уларнинг орасида сизлар ҳам Исо Масиҳ томонидан даъват этилгансизлар. ⁷ Шундай қилиб, муқаддас бўлишга даъват этилган барча Римда яшовчиларга, Худонинг севганларига Отамиз Худодан ва Раббий Исо Масиҳдан иноят ва тинчлик бўлсин. ⁸ Энг аввало, имонингиз бутун дунёга хабар қилинаётгани сабабли сизларнинг ҳаммаларингиз учун Исо Масиҳ орқали Худойимга миннатдорчилик билдираман. ⁹ Мен Ўғлининг Хушхабарида руҳим билан хизмат қилаётган Худо эса сизларни тинимсиз эслаётганимга гувоҳдир. ¹⁰ Мен ҳамиша ибодатларимда сўраяпманки – қачондир менинг ёнингизга боришим Худонинг иродаси бўйича муваффақиятли бўлсин. ¹¹ Чунки мен сизларни кўришни жуда ҳам орзу қилмоқдаман, токи сизларнинг мустаҳкамланишингиз учун мен сизларга бирон бир руҳий инъом тақдим этай, ¹² шу орқали сизлар билан бирга умумий (яъни сизларнинг ва ўзимнинг) имонимиз билан тасалли топай. ¹³ Энди, биродарлар, сизларнинг бехабар қолишингизни истамайман: мен бошқа халқлардаги сингари, сизларда ҳам бирор ҳосилга эга бўлишим учун кўп марта ёнингизга боришни ният қилган эдим, лекин ҳозиргача тўсқинликка дуч келганман. ¹⁴ Мен юнонлару варварлардан ҳам донолару жоҳиллардан ҳам қарздорман. ¹⁵ Шундай қилиб, менга келсак, мен Римда яшаётган сизларга ҳам Хушхабарни воизлик қилишга тайёрман. ¹⁶ Чунки мен Масиҳнинг Хушхабаридан уялмайман, чунки бу Хушхабар ҳар бир имон келтирганнинг, яъни аввало яҳудий, кейин юноннинг нажот топиши учун Худонинг куч-қудратидир. ¹⁷ Ушбу Хушхабарда Худонинг ҳақлиги имондан имонга ошкор бўлмоқда, худди ёзилганидек: “Ҳақ одам имони билан яшайди”. ¹⁸ Ҳақиқатни ноҳақлик билан эзаётган инсонларнинг барча бетавфиқлиги ва ноҳақлигига эса осмондан Худонинг ғазаби ошкор бўлмоқда. ¹⁹ Чунки Худо ҳақида нимани билиш мумкин бўлса, уларга аёндир, негаки Худо уларга очиб берган. ²⁰ Зеро дунёнинг яратилишидан бошлаб Унинг кўринмас хусусиятлари, абадий қудрати ҳамда илоҳийлиги Унинг ижодлари орқали очиқ кўринмоқда ва англанмоқда. Шунинг учун уларга узр йўқ. ²¹ Чунки улар Худони таниб билиб, Уни Худо каби улуғламадилар ва миннатдор бўлмадилар, лекин ўз хаёлларида беҳудаликка берилдилар ва уларнинг бефаҳм юраги қоронғилашди: ²² ўзларини доно ҳисоблаб, ақлдан оздилар, ²³ чиримас Худонинг шуҳратини чирийдиган инсон ва қушларнинг, тўртоёқлилар ва судралувчиларнинг тасвирига алмаштирдилар. ²⁴ Шунинг учун ҳам Худо уларнинг юрак ҳирсларида уларни нопокликка топширди, шундай қилиб, улар ўз-ўзларида таналарини ҳаром қиладилар. ²⁵ Улар Худонинг ҳақиқатини ёлғонга алмаштирдилар ва Ижодкорнинг ўрнига ижодга хизмат қилиб сажда қилдилар. (Худо эса абадулабад муборакдир, омин!) ²⁶ Шу сабабдан Худо уларни уятли ҳирсларга топширди: уларнинг аёллари табиий жинсий муносабатни ғайритабиий муносабатга алмаштирдилар. ²⁷ Шунингдек, эркаклар ҳам аёл билан табиий жинсий муносабатни қолдириб, бир-бирларига нисбатан ўз ҳирсларида ёниб, эркаклар билан эркаклар шармандагарчилик қилдилар ва ўзларининг адашганларига яраша ўзларида жазо олдилар. ²⁸ Улар ўз билимларида Худога эга бўлишга ҳаракат қилмаганлари учун, улар ярамас ишларни қилишлари учун Худо уларни бузуқ онгга топширди. ²⁹ Улар ҳар қандай ноҳақлик, зино, бетавфиқлик, тамагирлик ва ёвузликка тўлган бўлиб, ҳасадгўйлик, қотиллик, низо, алдов, бадфеъллик ва туҳматга тўладирлар. ³⁰ Улар ғийбатчи, Худодан нафратланувчи, дилозор, мақтанчоқ, мағрур, ёмонлик ихтирочиси, ота-онага итоатсиз, ³¹ фаҳмсиз, аҳд бузувчи, меҳрсиз, муросасиз ва раҳм-шавқатсиздирлар. ³² Улар Худонинг ҳақ ҳукмини, яъни бундай ишларни қилувчилар ўлимга лойиқ эканлигини биладилар-у, буларни нафақат қиладилар, балки бу ишларни қилувчиларни ҳам маъқуллайдилар.