19 ¹ Раббий Мусо ва Аҳарўнга сўзлаб деди: ² “Мана бу ― Раббий амр қилган қонуннинг низомидир. У деди: Исроил ўғилларига айт, сенинг олдингга бенуқсон, камчиликсиз ва ҳали бўйинтуруқ солинмаган қизғиш сигирни олиб келишсин. ³ Уни руҳоний Элеазарга бериб, уни қароргоҳдан ташқарига олиб чиқиб, Элеазарнинг олдида сўйсинлар. ⁴ Руҳоний Элеазар ўз бармоғи билан унинг қонини олсин ва қонини Йиғин Чодирининг олди томонига етти маротаба пуркасин. ⁵ Сигирни унинг кўз ўнгида ёндирсинлар: унинг терисини, гўшти ва қонини ахлати билан бирга ёндирсинлар. ⁶ Руҳоний эса кедр дарахтини, ҳиссоп ва қизил ип олиб, ёнаётган сигирнинг устига улоқтирсин. ⁷ Руҳоний ўз кийимларини ювсин, баданини эса сув билан ювсин, сўнгра қароргоҳга кирсин. Руҳоний кечгача нопок бўлади. ⁸ Сигирни ёндирган киши ҳам ўз кийимларини ювсин, баданини эса сув билан ювсин. У кечгача нопок бўлади. ⁹ Бирор пок киши сигирнинг кулини йиғиб олиб, қароргоҳдан ташқарига, тоза ерга қўйсин ва бу Исроил ўғилларининг йиғини учун поклаш суви сифатида сақланади. Бу гуноҳ учун қурбонликдир. ¹⁰ Сигирнинг кулини йиққан киши ҳам кийимларини ювсин. У кечгача нопок бўлади. Бу Исроил ўғиллари учун ҳам, уларнинг орасида яшовчи мусофирлар учун ҳам абадий низом бўлсин. ¹¹ Кимдир бирор одамнинг ўлик танасига тегса, етти кун нопок бўлади. ¹² У ўзини учинчи ва еттинчи куни ушбу сув билан поклаши керак ва пок бўлади. Агар у ўзини учинчи ва еттинчи куни покламаса, унда у пок бўлмайди. ¹³ Бирор бир ўлган одамнинг ўлик танасига теккан ва ўзини покламаган ҳар бир киши Раббийнинг маконини булғайди. Бу одам Исроил орасидан қириб ташланади, чунки унинг устига поклаш суви пуркалмаган – у нопок, унинг нопоклиги ҳали унинг устидадир. ¹⁴ Мана бу қонун: одам чодирда ўлганида, чодирга келганнинг ҳар бири ва чодирнинг ичидагиларнинг барчаси етти кун нопок бўладилар. ¹⁵ Чодирдаги қопқоғи ёпилмаган, усти очиқ ҳар қандай идиш ҳам ҳаром бўлади. ¹⁶ Далада қилич билан ўлдирилганга ёки ўлганга, шунингдек одамнинг суягига ёки қабрга теккан ҳар бир киши етти кун нопок бўлади. ¹⁷ Нопок одамни поклаш учун ўша сигир ёндирилган қурбонликнинг кулидан олиб, уни идишга қўйиб, унинг устига тирик сув қуйсинлар. ¹⁸ Пок одам эса ҳиссопни олиб, уни сувга ботирсин ва чодирга, барча идишларга, чодирнинг ичида бўлган одамларга ва одам суягига ёки ўлдирилганга, ёки ўлганга, ёки қабрга теккан кишига сепсин. ¹⁹ Пок одам нопок одамнинг устига учинчи ва еттинчи куни ҳам пуркасин. Шундай қилиб, уни еттинчи куни поклайди. У ўз кийимларини ва ўз баданини сув билан ювсин, шунда у кечга пок бўлади. ²⁰ Бироқ кимдир нопок бўлса ва ўзини покламаса, унда ўша одам халқнинг орасидан қириб ташланади, чунки у Раббийнинг Муқаддасгоҳини булғади. Унинг устига поклаш суви пуркалмаган ва у нопокдир. ²¹ Бу улар учун абадий низом бўлсин. Поклаш сувини пуркаган киши ўз кийимларини ювсин. Поклаш сувига теккан киши кечгача нопок бўлади. ²² Нопок киши теккан ҳамма нарса нопок бўлади, унга теккан одам кечгача нопок бўлади”.