10 ¹ Раббий Мусога сўзлаб деди: ² “Ўзингга иккита кумуш карнай ясагин, уларни зарб уриб ишланган қилиб ясагин, токи улар сенга жамоани чақириш ва қароргоҳларни йиғиштириш учун хизмат қилсин. ³ Уларни чалганларида, бутун жамоа Йиғин Чодирининг кириш жойига, сенинг олдингга йиғилади. ⁴ Битта карнай чалинганида, сенинг олдингга Исроилнинг ҳокиму мингбошилари тўпланадилар. ⁵ Хавф овози чалганларингда, шарқ томонда ўрнатилган қароргоҳлар кўтарилсинлар. ⁶ Иккинчи марта хавф овози чалганларингда, жануб томонда ўрнатилган чодирлар кўтарилсинлар. Улар йўлга чиқишлари керак бўлганида, хавф овози чалсинлар. ⁷ Жамоани йиғиш керак бўлганида эса, чалинглар, бироқ хавф овозини чалманглар. ⁸ Аҳарўннинг ўғиллари, руҳонийлар карнайни чалишлари керак. Бу сизларнинг авлодларингиз оша сизларга абадий низом бўлсин. ⁹ Сизларга ҳужум қиладиган душманларингизга қарши ўз ерингизда урушга бораётганингизда, карнайларда хавф овозини чалинглар, шунда Раббий Худойингиз қаршисида ёдга олинасизлар ва душманларингиздан қутқариласизлар. ¹⁰ Хурсандчилик кунларингизда ҳам, байрамларингизда ҳам, янги ойларингиз вақтида ҳам, тамоман ёндириш қурбонликлари ва тинчлик қурбонликларини келтирганингизда, карнайларни чалинглар ва бу ― Раббий Худойингиз қаршисида сиз ҳақингизда хотира бўлади. Мен сизларнинг Раббий Худойингизман”. ¹¹ Иккинчи йилнинг иккинчи ойининг йигирманчи кунида булут Гувоҳлик Чодиридан кўтарилди. ¹² Исроил ўғиллари эса Синай саҳросидан ўз қароргоҳлари билан жўнадилар. Булут Порон саҳросида тўхтади. ¹³ Улар биринчи марта Мусо орқали берилган Раббийнинг амри бўйича сафарга чиқдилар. ¹⁴ Биринчи бўлиб, Яҳудо ўғиллари ўз қўшинлари бўйича қароргоҳининг байроғини кўтаришди. Уларнинг қўшини устидан бошлиқ Амминадабнинг ўғли Наҳшон эди. ¹⁵ Иссохор ўғиллари қабиласининг қўшини устидан бошлиқ Зуар ўғли Натанаэл эди. ¹⁶ Забулун ўғиллари қабиласининг қўшини устидан бошлиқ Ҳелон ўғли Элиаб эди. ¹⁷ Шунда Чодир ечиб олинди ва Чодирни кўтариб юрадиган Гершон ва Мерари ўғиллари йўлга тушдилар. ¹⁸ Сўнг Рубен ўз қўшинлари бўйича қароргоҳининг байроғини кўтаришди. Унинг қўшини устидан бошлиқ Шедеур ўғли Элизур эди. ¹⁹ Шимўн ўғиллари қабиласининг қўшини устидан бошлиқ Зуришаддай ўғли Шелумиэл эди. ²⁰ Гад ўғиллари қабиласининг қўшини устидан бошлиқ Деуэл ўғли Элиасаф эди. ²¹ Сўнг Муқаддасгоҳни кўтариб юрадиган Қэҳатнинг ўғиллари йўлга тушдилар, Чодир эса улар келганларича кўтариб қўйилган эди. ²² Шундан кейин Эфрайим ўғиллари ўз қўшинлари бўйича қароргоҳининг байроғини кўтаришди. Уларнинг қўшини устидан бошлиқ Аммиҳуд ўғли Элишама эди. ²³ Манашеҳ ўғиллари қабиласининг қўшини устидан бошлиқ Педаҳзурнинг ўғли Гамалиэл эди. ²⁴ Бенямин ўғиллари қабиласининг қўшини устидан бошлиқ Гидеонийнинг ўғли Абидан эди. ²⁵ Барча қароргоҳлардан энг охиргиси бўлиб, Дан ўғиллари ўз қўшинлари бўйича қароргоҳининг байроғини кўтаришди. Уларнинг қўшини устидан бошлиқ Аммишаддайнинг ўғли Аҳиэзер эди. ²⁶ Ашер ўғиллари қабиласининг қўшини устидан бошлиқ Охраннинг ўғли Пагиэл эди. ²⁷ Нафтали ўғиллари қабиласининг қўшини устидан бошлиқ Энан ўғли Аҳира эди. ²⁸ Бу ― Исроил ўғилларининг қўшинлари бўйича юришларининг тартиби эди. Шундай қилиб, улар йўлга тушдилар. ²⁹ Шунда Мусо ўз қайнатаси мидианлик Реулнинг ўғли Ҳобабга деди: “Биз эса Раббий: Сизларга бераман, деб айтган ерга бормоқдамиз. Биз билан бирга юр, биз сенга эзгулик кўрсатамиз, чунки Раббий Исроил ҳақида яхшилик айтган”. ³⁰ Аммо у Мусога: “Бормайман, мен ўз еримга, ўз юртимга бораман”,- деди. ³¹ Мусо эса унга деди: “Бизни тарк этма, чунки сен бизнинг саҳрода қароргоҳларимиз билан қандай жойлашганимизни биласан. Сен бизга қарши кўз бўласан. ³² Агар биз билан бирга борсанг, Раббий бизга қилган эзгуликни биз сенга қиламиз”. ³³ Улар Раббий тоғидан уч кунлик йўлга отландилар. Раббийнинг Аҳд Киботи эса уларга тўхташ жойини топиш учун уларнинг олдидан уч кунлик йўлга борди. ³⁴ Улар қароргоҳдан йўлга тушганларида, Раббийнинг булути кундузи уларга соя солар эди. ³⁵ Кибот йўлга отланганида, Мусо шундай дер эди: “Ё, Раббий, кўтарилгин ва душманларинг сочилиб кетади. Сендан нафратланадиганлар Сенинг юзинг олдидан қочиб кетади”. ³⁶ Кибот тўхтаганида эса, у шундай дер эди: “Ё, Раббий, Исроилнинг минглари ва ўн мингларига қайтгин”.