28 ¹ Шаббат кунидан сўнг, ҳафтанинг биринчи куни тонг пайтида магдалалик Мирйам бошқа Мирйам билан қабрни кўриш учун келдилар. ² Мана, кучли зилзила бўлди, чунки самодан тушган Худонинг фариштаси келиб, қабр оғзидаги тошни ағдариб ташлади ва унинг устига ўтирди. ³ Унинг кўриниши худди чақмоқдек, унинг либоси эса худди қордек оппоқ эди. ⁴ Ундан қўрқиб кетиб, қўриқчилар титрадилар ва мурдадек бўлиб қолдилар. ⁵ Фаришта эса аёлларга сўзлаб деди: “Қўрқманглар, зеро сизлар хочга михланган Исони излаётганингизни биламан. ⁶ У бу ерда йўқ. Ўзи айтганидек, қайта тирилди. Келинглар, Раббий ётган жойни кўринглар. ⁷ Энди тезда бориб, шогирдларига Унинг ўликдан тирилганини ва сизларни Галиледа кутаётганини айтинглар. Ўша ерда Уни кўрасизлар. Мана, мен сизларга айтдим”. ⁸ Аёллар эса буюк қувонч ва қўрқув билан қабрдан шошилиб чиқиб, Унинг шогирдларига хабар бергани югуриб кетдилар. ⁹ Улар шогирдларга хабар етказгани кетаётганларида, мана, Исо уларни учратиб: “Қувонинглар!”- деди. Улар яқинлашиб, Исонинг оёқларидан қучоқлаб, Унга сажда қилдилар. ¹⁰ Шунда Исо уларга: “Қўрқманглар, бориб Менинг биродарларимга Галилега боришларини айтинглар. Ўша ерда улар Мени кўрадилар”,- деди. ¹¹ Аёллар кетгач, мана, қўриқчилардан бир нечтаси шаҳарга келиб, содир бўлган ҳамма ҳодисани олий руҳонийларга айтиб бердилар. ¹² Ўшалар оқсоқоллар билан бирга тўпланиб маслаҳатлашгач, аскарларга анча пул бериб, ¹³ шундай дедилар: “Сизлар: Биз тунда ухлаб ётганимизда, Унинг шогирдлари келиб, Уни ўғирлаб кетдилар,- деб айтинглар. ¹⁴ Агарда бу гап ҳокимнинг қулоғига етиб борса, биз уни ишонтириб, сизларни бу кўнгилсизликдан қутқарамиз”. ¹⁵ Шундай қилиб, улар пулни олиб, уларга қандай ўргатилган бўлса, худди шундай қилдилар. Бу сўз яҳудийлар орасида ҳозирги кунларгача тарқалиб кетган. ¹⁶ Ўн бир шогирд эса Галилега, Исо уларга белгилаган тоққа бордилар. ¹⁷ Шунда Исони кўриб, улар Унга сажда қилдилар, баъзилари эса шубҳаландилар. ¹⁸ Исо уларга яқинлашиб, шундай деди: “Осмонда ҳам, ерда ҳам бор ҳокимият Менга берилган. ¹⁹ Шундай экан, боринглар ва барча халқлардан шогирд орттиринглар. Уларни Ота, Ўғил ва Муқаддас Руҳ номидан сувга чўмдириб, ²⁰ Мен сизларга буюрган барча нарсаларга риоя қилишни ўргатинглар. Мана, то дунёнинг тугашигача ҳар куни Мен сизлар билан биргаман. Омин”.