1 ¹ Раббийнинг қули Мусонинг ўлимидан сўнг, Раббий Мусонинг хизматкори Нўн ўғли Йешуага деди: ² “Менинг қулим Мусо вафот этди. Шундай қилиб, ўрнингдан тур, сен ва ушбу бутун халқ Йордан дарёсидан ўтиб, Мен Исроил ўғилларига бераётган ерга боринглар. ³ Мен Мусога айтганимдек, оёқларингизнинг кафти теккан ҳар қандай жойни сизларга бераман. ⁴ Саҳродан ва ушбу Лебанондан то буюк дарё ― Фурот дарёсигача, хетликларнинг бутун ери ҳамда қуёш ботиш томонидаги буюк денгизгача сизларнинг ҳудудингиз бўлади. ⁵ Сенинг ҳаётингнинг барча кунларида ҳеч ким сенга қарши тура олмайди. Мен Мусо билан бўлганим каби сен билан бирга бўламан, сендан чекинмайман ва сени тарк этмайман. ⁶ Мустаҳкам ва жасур бўл, чунки сен ушбу халққа Мен уларнинг оталарига беришга қасам ичган ерни эгаликка топширасан. ⁷ Фақатгина мустаҳкам ва жуда ҳам жасур бўлгин. Менинг қулим Мусо сенга васият қилган бутун Қонунга амал қилиб, уни бажаргин. Ундан ўнгга ҳам, чапга ҳам бурилма, токи барча ишларингда доно ҳаракат қилгин. ⁸ Ушбу Қонун китоби оғзингдан тушмасин, аммо уни туну кун ўргангин, токи унда ёзилганларни аниқ бажаргин. Шунда ўз йўлларингда муваффақиятли бўласан ва доно ҳаракат қиласан. ⁹ Мана, Мен сенга буюраман: мустаҳкам ва жасур бўл, қўрқма ва даҳшатга тушма, чунки сенинг Раббий Худойинг сен қаерга борсанг сен билан биргадир”. ¹⁰ Йешуа халқнинг назоратчиларига буюриб деди: ¹¹ “Қароргоҳ бўйлаб юринглар ва халққа буюриб: Йўл учун ўзларингга озиқ тайёрланглар, чунки уч кундан сўнг оталарингизнинг Раббий Худоси сизларга мерос қилиб бераётган ерни эгаликка олишга бориш учун ушбу Йордандан ўтасизлар, деб айтинглар”. ¹² Рубен ва Гад қабилалари ҳамда Манашеҳ ярим қабиласига эса Йешуа деди: ¹³ “Раббийнинг қули Мусо сизларга буюриб айтган сўзини ёдга олинглар: Сизларнинг Раббий Худойингиз сизларга ором берди ва сизларга ушбу ерни топширди. ¹⁴ Сизларнинг хотинларингиз, болаларингиз, чорваларингиз Мусо сизларга Йорданнинг бу томонида берган ерда қолсинлар. Сизлар, жанг қилишга қодир бўлганларнинг барчаси эса қуролланиб, биродарларингизнинг олдида боринглар ва уларга ёрдам беринглар, ¹⁵ Раббий сизларга ором бергани каби, биродарларингизга ҳам ором бермагунича ва сизларнинг Раббий Худойингиз уларга бераётган ерни эгаликка олмагунларича уларга ёрдам беринглар. Сўнгра, ўз меросларингга қайтинглар ва Раббийнинг қули Мусо сизларга Йорданнинг бу томонида, қуёш чиқар томонда берган ерни эгаликка олинглар”. ¹⁶ Улар Йешуага жавоб бериб дедилар: “Бизга нимани буюрсанг, ҳаммасини бажарамиз ва бизни қаерга юборсанг борамиз. ¹⁷ Мусога қандай қулоқ солган бўлсак, сенга ҳам шундай қулоқ соламиз. Фақатгина сенинг Раббий Худойинг Мусо билан бирга бўлгани каби, сен билан бирга бўлсин. ¹⁸ Сенинг амрингга қарши исён қиладиган ва сен унга буюрадиган барча сўзларингга қулоқ солмайдиган ҳар қандай киши ўлимга топширилади. Фақатгина мустаҳкам ва жасур бўлгин!”