16 ¹ Энди, муқаддаслар учун эҳсон йиғишингизда эса, мен Галатиядаги Жамоатларда ўрнатган тартибга биноан иш тутинглар: ² ҳафтанинг биринчи кунида сизларнинг ҳар бирингиз имконингиз бўйича эҳсонини бир четга олиб қўйиб, ўзингизда сақланглар, токи мен келганимда, буларни йиғишга зарурат бўлмасин. ³ Мен келганимда эса, йиққан эҳсонларингизни Йерусалимга етказиш учун сизлар танлаган кишиларни мактублар билан жўнатаман. ⁴ Агарда менинг ҳам боришим зарур бўлса, унда улар мен билан бирга борадилар. ⁵ Энди эса мен Македония орқали ўтаётганимда, сизнинг олдингизга бораман, (чунки Македония орқали ўтаман). ⁶ Шунда ёнингизда бир оз қоларман, ёки қишни ҳам ўтказарман, сўнг сизлар мени кетадиган жойимга кузатарсизлар. ⁷ Чунки бу сафар сизлар билан йўл-йўлакай кўришиб кетишни хоҳламайман. Аммо Раббий ижозат берса, ёнингизда бир қанча вақт қолишга умид қиламан. ⁸ Эфесда эса мен Элликлик кунигача қоламан, ⁹ чунки менга улкан ва кенг эшик очилди, лекин менга қарши чиққанлар ҳам кўп. ¹⁰ Агарда Тимўтий ёнингизга келса, у сизларнинг орангизда хавфсизликда бўлишига эътибор беринглар, чунки у менга ўхшаб Раббийнинг хизматини қилмоқда. ¹¹ Шунинг учун ҳеч ким унга менсимасдан қарамасин. Аксинча, у менинг олдимга етиб келиши учун, уни тинчлик билан кузатиб қўйинглар, чунки мен уни биродарлар билан бирга кутмоқдаман. ¹² Биродаримиз Аполлосга келсак, унинг бошқа биродарлар билан сизларнинг олдингизга боришини мен ундан қаттиқ илтимос қилган эдим, бироқ у ҳозир боришни асло хоҳламади. Аммо у қулай фурсат топганида боради. ¹³ Ҳушёр бўлинглар, имонда мустаҳкам туринглар, мард ва кучли бўлинглар. ¹⁴ Ҳамма ишларингиз севги билан қилинсин. ¹⁵ Эй, биродарлар, сизлар Стефаннинг хонадонини биласизларки – улар Ахаянинг бошланғичи бўлиб, ўзларини муқаддасларга хизмат қилишга бағишладилар. Шунинг учун сизлардан илтимос қиламан: ¹⁶ бундайларга ҳамда барча ҳамкорлару хизмат қилаётганларга ўзларингизни бўйсундиринглар. ¹⁷ Мен Стефан, Фортунат ва Ахаикнинг келганидан хурсанд бўлдим, улар сизларнинг йўқлигингизни тўлдирдилар. ¹⁸ Улар менинг ва сизларнинг руҳингизни тинчлантирдилар. Бундайларни эҳтиром қилинглар. ¹⁹ Асиядаги Масиҳ Жамоатлари сизларга салом йўллаяпти. Акил билан Прискилла ва уларнинг уй Жамоати сизларга Раббийда кўп саломлар йўлламоқдалар. ²⁰ Барча биродарлар сизларга салом йўллаяптилар. Бир-бирингизга муқаддас ўпич билан салом беринглар. ²¹ Мен, Повул, ўз қўлим билан сизларга салом ёзяпман. ²² Кимки Раббий Исо Масиҳни севмаса, лаънати бўлсин. Раббимиз келмоқда! ²³ Раббий Исо Масиҳнинг инояти ҳаммаларингиз биландир. ²⁴ Менинг севгим Исо Масиҳда бўлган сизларнинг ҳаммаларингиз биландир. Омин.