1

¹ Павел но Тимофей, Иисус Христослэн ляльчиоссы, Филипп городысь епископъёслы, диаконъёслы, ваньмызлы Инмарлы оскисьёслы: ² Инмар Атаймылэсь но Иисус Христос Кузёмылэсь каньыллык но тупаса улон тӥ пӧлын мед луоз.

³ Тӥ сярысь тодам вайыкум котьку Инмарелы тау карисько. ⁴ Вӧсяськыкум шумпотыса вӧсяськисько ваньды понна, ⁵ малы ке шуоно тӥ пыриськиськоды Ӟеч Иворез вӧлмытон уже нырысетӥ нуналысен ик та дырозь.

⁶ Мон оскисько, тӥ пушкын ӟеч уж мытӥсь, ужзэ уз кушты Иисус Христос вуон нунал дырозь но, ⁷ кызьы ке мынам тӥ сярысь малпаськеме потэ, - малы ке шуоно тӥ мынам сюлмам пытсэтын пукыкум но, Ӟеч Иворез возьмакум но вӧлмытыкум малпаськисько тӥ сярысь: тӥ мон кадесь. ⁸ Инмар гинэ тодэ, кызьы мон тӥледыз ваньдэс яратӥсько Иисуслэн яратонэныз. ⁹ Вӧсяськисько со сярысь: мед тӥляд яратонды эшшо но эшшо бадӟым будоз но мед юрттоз тӥледлы умойзэ валаны но шӧдыны, ¹⁰ ӟечсэ бырйыса тӥ медло луоды чылкытэзлэсь чылкыт Иисус Христос вуон нуналэ, ¹¹ Инмарез данъян, ушъян понна Иисус Христос пыр шонер улонлэн емышеныз тыр мед луоды.

¹² Братъесы, тодылэ, мынам улон вакытэ уката юн юрттӥз Ӟеч Иворез вӧлмытыны, ¹³ соин бен мынам Христос понна пытсэт сьӧрын пукеме тодмо луиз дворецлэн возьмаськисьёсызлы но мукетъёсызлы, ¹⁴ но тросэз Иисус-Кузёлы оскись братъёс мынам пытсэт сьӧрын пукеме шоры учкыса, мылкыд карыса, кышкыттэк кутскизы Инмарлэсь кылзэ вӧлмытаны.

¹⁵ Куд-огез бен вожъяськыса но ог огзэс азьпалтэмзы потыса, нош мукетъёсыз ӟеч мылкыдын Христос сярысь иворто. ¹⁶ Кудъёсыз ассэз возьматыса Христос сярысь чылкыттэм верало, мынэсьтым пытсэт сьӧрын улонме эшшо но тужгес курадӟытыны малпаса; ¹⁷ бен мукетъёсыз - яратыса, уке соос тодо, мон Евангелиез утьыны пуктэмын шуыса.

¹⁸ Нош мар-о бен? Коть кызьы Христос сярысь мед мадёзы, умоен-а, пӧяськысагес-а, мон коть кудӥзлы шумпотӥсько но шумпото, ¹⁹ малы ке шуоно тодӥсько: тӥляд вӧсяськемды но Христос Иисуслэн Духезлэн юрттэтэз пыр та мыным утиськонлы луоз, ²⁰ мыным сёткоз кужым но оскон номырин возьытэ уськытэмын уг луы шуыса. Нош кышкасьтэм луыса али но, котьку но Христос данэ потоз мынам адями мугорын улонам, я мон улыкум-а, кулэм бере-а. ²¹ Малыке шуоно улонэ - Христос, кулонэ - умой шедьтон. ²² Улэмелэн пайдаез вань бере, оло мае бырьёно, ²³ ас бордазы кыско монэ соиз но, таиз но. Христос доры кошкеме потэ ини, малы ке шуоно соиз туж трослы умойгес, ²⁴ нош кыли ке улыны - тӥледлы умойгес. ²⁵ Мон бен тодӥсько, тӥледын кылё, осконын азинсконды но, шумпотонды но мед будоз, ²⁶ Христосэн ушъяськонды мон пыр мед будоз тӥ дорось вуотозям.

²⁷ Улэ гинэ вал Христослэн Ӟеч Иворезлэн куронэзлы ярамон, лыкто-а адӟо-а тӥледыз, уг-а лыкты, кылэме потэ тӥ сярысь: тӥ сылӥськоды одӥг духен, ӵошен ожмаськиськоды Ӟеч Ивор понна, ²⁸ тушмонъёслэсь эн кышкалэ: тӥляд кышкасьтэмды соослы - быронлы, нош тӥледлы - утиськонлы. ²⁹ Тӥледлы Христослы осконэз но, Со понна курадӟонэз но ортчоно луоз ³⁰ сыӵезэ ик батыр кадь, кыӵезэ тӥ мон пушкысь ас синмыныды адӟиды, но али но кылӥськоды.