2

¹ Озьыен, мылкыдды ӝутске ке Христос пушкысь, яратон сэрен шумпотӥськоды ке, Дух пыр куспады герӟаськиськоды ке, тодмо ке тӥледлы коть кыӵе ке гажан-жалян но ӟеч карыны сюлмаськонды вань ке тӥ пушкын, ² соку тыр каре мынэсьтым шумпотонме:малпаськонды мед луоз одӥг, яратэ ог огдэс, огмылкыдын, одӥг муген тупаса улӥсесь луэ; ³ номыре но эн лэсьтэ ӵошатскыса, асьтэлы гинэ пайда басьтыны турттыса, нош асьтэдыз улӥгез кырыса, мукетъессэ лыдъялэ асьтэлэсь вылӥлыкогес.

⁴ Котькудӥз ачиз сярысь гинэ медам сюлмаськы, нош озьы ик мукетыс сярысь но. ⁵ Мылы ке шуоно тӥ малпаськыны кулэ озьы ик, кызьы малпаське Иисус Христос. ⁶ Со Инмарлэн образэс луыса, вылысь Инмарен огкадь луон борды кутӥськыса ӧз улы. ⁷ Со Ассэ Ачиз улӥ карӥз, ляльчи кадь кариськиз, адями кадь луыса вордскиз но вылтусызъя адями кадь луиз, ⁸ Ассэ зӥбыт кариз но кылзӥськись луиз кулонозяз ик, кирос вылын кулонозяз.

⁹ Соин ик Инмар Сое ваньмызлэсь вылӥе ӝутӥз, Солы котькыӵе но нимлэсь вылӥ ним сетӥз, ¹⁰ Иисуслэн нимыз азьын пыдесъяськыса ваньмыз мед йыбырттозы шуыса: Инмын но, музъем вылын но, дунне пыдэсын но, ¹¹ но кутькуд кылын мед вералозы Иисус Христос Кузёмы Инмар Атайлэсь данзэ ӝутон понна.

¹² Озьыен, мынам яратоно эшъёсы, кызьы ке тӥ котьку кылзӥськисесь вал мон дорады луыкум но, нош али уката но мон дорады ӧвӧл дырьям, асьтэлэсь утиськондэс быдэстыны понна кышкаса, куалекъяса тырше, ¹³ малы ке шуоно ӵапак Инмар сётэ тӥледлы мылкыд но, тыршон но, кудъёсыз кельшо Солы.

¹⁴ Ваньзэ урттылӥськытэк но керетонтэк лэсьтэ, ¹⁵ малы ке шуоно мед тӥ луоды Инмарлэн янгышасьтэм но чылкытэсь, дуноесь пиналъёсыз. Та кылзӥськисьтэм, котьмае сӧрыны турттэм выжы пӧлын тӥ пиштӥськоды кизилиёс кадь пеймыт дуннеын, ¹⁶ улон кылэз утьыса. Мед мон ушъяськыны быгатысал Христослэн вуон нуналаз, мон юнме ӧй сӥзьы асме та ужлы, юнме ӧй тыршы шуыса.

¹⁷ Бен, тӥляд оскондылы понна тыршеме, ужаме жертвалы ке но пӧрмиз, мон ачим шумпотӥсько но тӥледын шумпотонме люкисько. ¹⁸ Шумпотэ талы тӥ но монэным ӵошен.

¹⁹ Оскисько, Иисус Христос юрттэмъя, ыстыны ӝоген тӥ пӧлады Тимофеез, мон но мед тӥлесьтыд югдурдэс тодыса Дух пушкам буйгатскысал. ²⁰ Угось мон вӧзам нокин но ӧвӧл солэсь тыршисез, кудӥз сюлмысь утялтӥсь луоз тӥ сярысь но, ²¹ малы ке шуоно ваньмыз ас сярысьтызы сюлмаськонэз утчало, Иисус Христослы ярамонзэ уг утчало.

²² Нош тӥ тодӥськоды кызьы Тимофей ассэ возьматӥз, малы ке шуоно со монэн ӵош атаеныз кадь Ӟеч Ивор тодытыса ветлӥз. ²³ Озьыен, мон малпасько ыстыны сое соку ик, ку ке мон тодо ма монэ вите. ²⁴ Мон оскисько, Инмар юрттэмъя, мон ачим но дорады ӝоген вуо шуыса.

²⁵ Нош мон лыдъясько ыстыны дорады Епафродитэз - братме, ӵош ужасьме, мынысьтым юрттӥсьме, тӥлесьтыд ыстэм мурттэс, кудӥз ёрмыса улыкум мыным юрттыса улӥз. ²⁶ Малы ке шуоно со туж адӟемез потӥз ваньдэсты тӥледды, но туж куректӥз солэн висёнэз сярысь ивор тӥ доры вуэм шуыса. ²⁷ Со туж юн висиз, кулонозяз ик, нош Инмар сое жаляз-утиз, сое гинэ бен ӧз, монэ но, куректон вӧзам куректон ӧз ватса. ²⁸ Соин ик мон туж тырши ӝоген ыстын сое, тӥ сое адӟыса мед шумпотоды шуыса, мынам но сюлэмшугъяськонэ ичигес мед луоз шуыса. ²⁹ Пумиталэ сое Кузё Инмарлэсь адямизэ юн шумпотыса, но гажаса возе сыӵеосты, ³⁰ со уго Христослэн ужез понна кулэ вал ини. Ас улонзэ жалятэк мыным юрттиськыса улӥз тӥляд юрттэмды мыным тырмымтэен.