¹ Mokolo mwa yambo mwa mposo, bakendaki o lilita na ntongo makasi, bamemi malasi kitoko oyo babongisaki. ² Bakutaki libanga ezali lisusu te na lilita. ³ Eyingelaki bango, bakutaki nzoto ya Mokonzi Yesu te. ⁴ Bazalaki koyeba te maye maleki mpe na pwasa, bato babale babimelaki bango, balataki bilamba ya bongengi makasi. ⁵ Lokola basi yango bazalaki na bobangi, bakitisaki bilongi o nse ya mabele, kasi balobi na bango: «Mpo na nini bozali koluka moto na bomoi kati na bakufi? ⁶ Azali lisusu awa te, kasi asili kosekwa. Bokanisa lolenge azalaki koloba na bino, ntango azalaki o Galileya, ⁷ mpe alobaki: "Esengelaki ete mwana na moto akabama na maboko ya basumuki, bakobaka ye o ekulusu, mpe akosekwa mokolo mwa misato."» ⁸ Basi basosolaki maloba mango, mpe balongwaki o lilita. ⁹ Bapesi sango na makambo oyo nyoso na bazomi na moko mpe na basusu banso. ¹⁰ Baoyo balobaki makambo mango epai ya bantoma ezalaki Malia ya Magadala, Janne, Malia mama na Jaki, mpe basi basusu bazalaki na bango. ¹¹ Kasi sango yango ezalaki lokola bolema epai ya bantoma, mpe bandimelaki basi te. ¹² Kasi Petelo atelamaki, mpe akimaki mbangu o lilita. Akitaki o nse mpe atalaki, amonaki na miso bilamba. Petelo azongaki epai na ye, komituna na ntina na oyo elekaki. ¹³ Tala, o mokolo mwango, bayekoli babale kati na bango bakendaki o mboka ebiangami Emmausu, mosika na Yelusaleme na ntaka ya makolo tuku motoba. ¹⁴ Bazalaki kosolola bango na bango na maye manso malekaki. ¹⁵ Esalamaki ete tango bazalaki kosolola mpe komituna, Yesu ye mei apusanaki mpe atambolaki na bango. ¹⁶ Kasi miso ma bango makokaki koyeba ye te. ¹⁷ Yesu alobi na bango: «Nini bazali koloba bino babale?» Bango batondaki na mawa. ¹⁸ Moko na bango, na nkombo Keleopase, ayanoli ye: «Ezali bobele yo moko, na baye bafandi na Yelusaleme oyo ayebi te maye maleki mikolo oyo?» ¹⁹ Yesu atunaki bango: «Makambo nini?» Mpe bayanoli ye: «Makambo matali Yesu moto na Nazarethe, oyo azalaki mosakoli moko na nguya na misala mpe na maloba oboso bwa Nzambe mpe bwa bato, ²⁰ mpe lolenge banganga nzambe bakonzi elongo na bakambi bakabaki ye mpo ete bapesa ye etumbu ya liwa mpe babaka ye o ekulusu. ²¹ Tozalaki kolikya ete ye nde akosikola Isalayele. Iyo, na maye manso maleki, sasaipi mokolo mwa misato uta makambo oyo maleki. ²² Kasi ezali na boko basi kati na biso, bakamwisi biso, bakendaki o lilita ntongo makasi. ²³ Ntango bamonaki nzoto te, bayaki koloba ete banzelu babimelaki bango mpe bayebisaki bango et ye azali na bomoi. ²⁴ Bamoko baye bazalaki na biso bakendaki o lilita, mpe bakutaki makambo lolenge basi bayebisaki. Kasi ye, bamonaki ye te.» ²⁵ Na yango Yesu alobi na bango: «O bato bazangi bososoli, mpe baoyo motema endimaka noki te oyo basakoli baloba! ²⁶ Ebongaki malamu te ete Klisto anyokwama mpo na makambo oyo, mpe akota kati na nkembo na ye?» ²⁷ Mpe kobanda na Mose mpe basakoli banso, asosolisaki bango makomi manso makomamaki na ntina na ye. ²⁸ Ntango ekomaki bango pene ya mboka oyo bazalaki kokende, emonanaki lokola alingi kokenda mosika. ²⁹ Kasi bapekisi ye, koloba: «Zala na biso, zambi mpokwa ebelemi mpe mokolo ekomi na suka na yango.» Mpe akoti, mpo na kotikala na bango. ³⁰ Emonanaki ete , o ntango azalaki o mesa elongo na bango, akamataki lipa mpe sima ya matondo, abukaki yango, mpe apesi bango. ³¹ Na boye, miso ma bango mafungwamaki mpe bayebaki ye, kasi alimwaki o miso ma bango. ³² Mpe bamilobelaki moko na mosusu: «Motema na biso etutisamaki te kati na yango wana ezalaki ye kolobela biso na nzela mpe kolimbola makomi?» ³³ Batelemaki o ngonga ena, bazongaki o Yelusaleme, mpe bakutaki bazomi na moko, mpe baoyo bayanganaki na bango elongo, ³⁴ balobi: «Ya solo penza Mokonzi asekwi mpe amonanaki na Simoni.» ³⁵ Mpe bayebisaki bango maye malekaki o nzela, mpe lolenge nini Yesu amimonisi na bango o tango abukaki lipa. ³⁶ Ezalaki bango naino koloba makambo yango, Yesu ye mei amimonisi kati na bango, mpe alobi na bango: «Kimia ezala na bino.» ³⁷ Kasi batondisamaki na bobangi makasi, kokanisa ete bamoni elima. ³⁸ Yesu alobi na bango: «Boni yiki yiki kati na bino, mpe mpo na nini mitema na bino mitondi na mituna? ³⁹ Botala maboko mpe makolo ma ngai, ezali solo ngai. Bosimba ngai mpe bomona. Elima ezalaka na mosuni te mpe mikuwa te, lokola bozali komana nazali na yango.» ⁴⁰ Elobaki ye boye, atalisi bango maboko mpe makolo ma ye. ⁴¹ O ntango bazalaki naino kondima te na esengo mpe kokamwa, Yesu alobi na bango: « Bozali na eloko ya kolia awa?» ⁴² Batalisi ye mbisi ya kokalinga. ⁴³ Yesu azwi mpe aleyi yango o boso bwa bango. ⁴⁴ Alobi na bango: «Yango nde nazalaki koloba na bino, tango nazalaki na bino, esengelaki ekokisama maye manso ekomama na mobeko ya Mose, kaki na basakoli, mpe na njembo.» ⁴⁵ Na boye afungoli bango mayele ya Molimo, mpo basosola makomi. ⁴⁶ Mpe alobi na bango: «Boye ekomama ete Klisto akonyokwama, mpe akosekwa kati na bakufi mokolo mwa misato. ⁴⁷ mpe bakoteya kobongola motema mpe bolimbisi masumu na bikolo nyoso, kobanda na Yelusaleme. ⁴⁸ Bino bozali banzeneneke na makambo oyo. ⁴⁹ Mpe boye, nakotindela bino oyo Tata alakaki. Kasi bino, botikala kati ya engumba kino botondisama na nguya kouta likolo.» ⁵⁰ Bongo Yesu akambi bango kino Betania. Sima na kotombola maboko, apamboli bango. ⁵¹ Esalamaki ete o tango azali kopambola bango, akabwanaki na bango mpe abutwi o likolo. ⁵² Boye sima na kokumbamela ye, bazongaki na Yelusaleme na esengo monene. ⁵³ Bazalaki ntango inso kati na tempelo, kokumisa mpe kotonda Nzambe.