¹ O ntango ena, Cezar Auguiste apesaki motindo ete batanga motuya ya bato bazali kati na mokili. ² Botangi ya liboso esalemaki na Sulia, o tango Kiriniusu azalaki Mokambi ya engumba. ³ Boye, banso bakendaki komikomisa moto na moto na engumba na ye. ⁴ Yozefu mpe alongwaki na Nazarete ya Galileya, mpo akenda na Yudea, ya engumba ya Dawidi ebiangami Beteleme, mpo azalaki mokitani ya libota ya Daviwidi, ⁵ akendaki kokomisa nkombo na mobandami na ye Malia, oyo azalaki na zemi. ⁶ Tango bazalaki wana, eleko ya kobota ekomaki pene. ⁷ Abotaki mwana mobali ya liboso, balingaki ye na bilamba, mpe batiaki ye na eleilo, zambi esika ya kolala ezalaki te mpo na bango na ndako ya bapaya. ⁸ ezalaki na esika yango babokoli bibwele oyo bazalaki kolala na bilanga mpo na kobatela bibwele ya bango. ⁹ Na mbala moko, anzelu ya Mokonzi abimelaki bango mpe nkembo na Mokonzi engengelaki bango; mpe babangaki mingi. ¹⁰ Anzelu ayebisi bango: «Bobanga te, mpo nayeli bino sango malamu, oyo ekozala esengo monene mpo na bato banso. ¹¹ Ebotameli bino lelo, na engumba ya Dawidi, Mobikisi oyo azali Klisto, Mokonzi. ¹² Tala elembo epesameli bino: bokokuta mwana moke balingi ye na bilamba mpe balalisi ye na eleilo ya bibwele.» ¹³ Mbala moko, etuluku ya mapinga ya lola basangani na anzelu, bazali kokumisa Nzambe koloba: ¹⁴ «Nkembo na nzambe na bisika bileki likolo mpe boboto awa na nse na bato oyo alingaka.» ¹⁵ Tango banzelu batiki bango bakei likolo, babateli mpate balobanaki moko sima na mosusu: «Tokenda kino Beteleme kotala oyo esalemi, oyo Mokonzi alakisi biso.» ¹⁶ Na lombango bakendaki kuna mpe bakutaki Malia na Yozefu mpe mwana moke alali na eleilo ya bibwele. ¹⁷ Nsima na komona boye, bayebisaki bato oyo ekomelaki bango na ntina na mwana. ¹⁸ Baoyo nyoso bazalaki koyoka bango, bakamwaki na oyo babateli mpate bazalaki koloba. ¹⁹ Kasi Malia abombaki nyoso na motema mpe azalaki kokanisa yango. ²⁰ Mpe babateli mpate bazongangi na kokumisaka mpe kosanzolaka Nzambe na nyoso bayokaki mpe bamonaki, engebene na oyo bayebisaki bango. ²¹ Tango mikolo mwambe ekokaki mpe esengelaki mwana akatama ngenga, bapesaki ye nkombo Yesu; nkombo oyo anzelu apesaki ye liboso ya kozwa zemi. ²² Tango mikolo ya kopetolama na bango ekoki, engebene na mobeko ya Mose, Yozefu mpe Malia bakumbaki ye na Yelusaleme mpo na kolakisa ye epai na Mokonzi. ²³ Kolandisama na oyo ekomami na mobeko na Mokonzi: «Mwana nyoso ya mobali, ya liboso, akobulisama mpo na Mokonzi.» ²⁴ Bapesaki mpe mabonza lolenge elobama na mobeko ya Mokonzi: Bana mibale ya ebenga ya zamba to ya mboka.» ²⁵ Nzoka nde ezalaki na Yelusaleme, moto moko na nkombo Simeona, moto malamu mpe kobanga Nzambe, azalaki kozila mokolo oyo Isalayele ekolongwa na mawa mpe Molimo mosanto azalaki na ye. ²⁶ Ayebisaka ye ete akokufa te, soki amoni Masiya Mokonzi te. ²⁷ Simeona, kokambama na Molimo Mosanto, akendaki na tempelo. Lokola baboti bamemaki mwanaYesu mpo na kokokisa mibeko; ²⁸ Akamataki ye na maboko na ye, kosanzola Nzambe mpe koloba: ²⁹ «Sasaipi Mokonzi, tika mosali wa yo akenda na kimia engebene na liloba na yo. ³⁰ Mpo ete miso ma ngai mamoni lobiko na yo, ³¹ oyo obongisaki liboso na bato banso, ³² Pole mpo na bapagano mpe nkembo na bato na Isalayele.» ³³ Tata mpe mama na ye bakamwaki mingi na makambo bazalaki koloba mpo na mwana. ³⁴ Simeona apambolaki bango mpe alobaki na Malia mama na ye: «Mwana oyo aponami mpo na kokweisa mpe kotelemisa ebele na bana na Isalayele mpe lokola elembo ekomema bokeseni. ³⁵ Mopanga ekopasola molema, na ntina ete makanisi ebele na mitema emonana.» ³⁶ Ezalaki mpe na mosakoli mwasi Anna, mwana na Fanuele, ya ekolo Asele. Azalaki mobange na mbula. Afandaki mbula sambo na mobali na ye sima ya bolenge na ye, ³⁷ aumelaki mbula tuku mwambe na minei sima na kufa ya mobali na ye, atikaki ndako Nzambe te mpe azalaki butu mpe moyi kokila mpe kobondela. ³⁸ Na tango yango, ayaki mpe abandi kopesa matondo na Nzambe mpe koloba na ntina na mwana na baoyo nyoso bazalaki kozila lisiko ya Yelusaleme. ³⁹ Wana esilisaki bango kokokisa oyo nyoso mobeko na Mokonzi ekoma, bazongaki na Nazarete na Galileya. ⁴⁰ Mwana akolaki mpe akomaki makasi, akolaki na bwanya mpe na ngolu na Nzambe ezalaki likolo na ye. ⁴¹ Baboti na ye bazalaki kokenda mbula na mbula na milulu ya pasika. ⁴² Tango akokisi mibu zomi na mibale, bakendaki na milulu kolanda bonkoko na bango. ⁴³ Tango milulu esilaki, bazalaki kozonga epai na bango, mwana Yesu atikalaki na Yelusaleme, kasi baboti bayebaki te. ⁴⁴ Kokanisa ete azalaki elongo na baninga ya mobembo, elekaki mokolo moko na nzele, liboso ete baluka ye kati na baboti na bango mpe baninga. ⁴⁵ Wana ezwaki bango ye te, bazongaki na Yelusaleme mpo na koluka ye. ⁴⁶ Sima ya mikolo misato nde bamonaki ye o kati ya tempelo, afandi kati na balakisi, koyoka bango mpe kotuna bango mituna. ⁴⁷ Baye banso bazalaki koyoka ye bazalaki kokamwa mpo na mayele mpe biyano na ye. ⁴⁸ Na bomoni ye, bakamwaki mpe mama na ye alobi na ye: «Mwana na ngai, mpo na nini osali biso boye? Yoka, tata na yo na ngai, toluki yo na mawa mingi!» ⁴⁹ Ayanoli bango: «Mpo na nini bozali koluka ngai, boyebi te esengeli nazala na ndako na Tata na ngai?» ⁵⁰ Kasi basosolaki te oyo azalaki koloba na bango. ^{51 52} Boye akei elongo na bango na Nazarete, azalaki kotosa bango. Mpe mama na ye azalaki kobomba makambo nyoso oyo na motema. Kasi Yesu akolaki na bwanya mpe na bolayi, kozwa ngolu mingi na Nzambe mpe na bato.