¹ Cho omu litangwa lya kuthsa cha Ndabiti lyashwenene muyehi, wakambeyeye munendi Solomoni, ngwendi, ² "Njinakuya mu ngila ya kaye koshe. Takama, ngachije, ulisholole yobe babenya kupwa munalume, ³ Nyunga kukambeya cha Shukulu Njambi yobe nakwenda mubingila byendi, nakutabela mashiko endi, kukambeya chendi, na mashiko a chithzibathano chendi, nakulibwahetha kupanga ebi bathoneka mu mashiko a Mosesa, mangana ukaye kulutwe muli byoshe ukapanga, kwoshe oko ukaya, ⁴ mangana Njambi akashulithe lijwi lyendi eli endekele hali yange ngwendi, 'Oshe chithemunwina chobe chikalibwahetha nakulama bilinga byabo, kwenda na likulahelo na bimbunge byabo byoshe na myonyo yabo yoshe kuli yange, kuikechela kukala na munalume halitanda lya Isalela.' ⁵ Cho lalo uthzibuke ebi Njoabu muna Zeluiya walingile kuli yange, nebi alingile kuli baje bakulunu bamashwalale babali baba Isalela, kuli Abina muna Neli na kuli Amasa muna Njetha, aba athsiyile. Wetilile maninga a nthzita mu kwoloka nakwaka maninga a nthzita ha mwiba wakele mu mbunda yendi naha makatulu aku mendi endi. ⁶ Pangela hali Njoabu na mangana awa wunalilongetha, oloni kethi wechele mutwe wabwele wendi ukobele mukuthsa mu kwoloka. ⁷ Nambe ngocho, sholola chikeketima kuli bana ba Mbazilai muka Ngiliyande, nakubechela bapwe hakati kabaje bakali ku metha yobe, mwafwa hathimbu njatewele kutunda kuli Ambasalome ndolome yobe bethzile kuli yange. ⁸ Kenga hamo nobe hali Shimei muna Ngela, baka Mbenjameni baku Mbahulimu, aba banjithingile na chithingo chachibi halitangwa njaile kuli Mbahanaimu. Shimei wethizile nakuliwana nange ku Yondani, cho njalithingile kuli likeye hali Njambi, ngwange, ' Kunjikakuthsiyi na mukwale embwe.' ⁹ Cho ngachije kethi umwechele uye chakujeneka kumunyanyametha. Yobe umunalume wa mana, cho ukathzibuka mwakumulingila. Ukanena mutwe wabwele bwendi hathi lya kuthsa mu maninga." ¹⁰ Cho Ndabiti walalele na bakulu bendi nakumuthsinda munganda ya Ndabiti. ¹¹ Cho matangwa wayulile Ndabiti baka Isalela akele myaka makumi awana. Wayulile myaka itanu naibali mu Hembuloni na myaka makumi atatu naitatu mu Yelusalema. ¹² Cho Solomoni watumbamene halitanda lya ishe Ndabiti, cho nachiyulo chendi chasholokele kutakama. ¹³ Cho Andonainja muna Hangithi wethzile kuli Mbeteshemba ina ya Solomoni. Wendekele ngwendi, "Unaija mukwoloka ndi?" Wamukumulwile ngwendi, ""Mukwoloka." ¹⁴ Cho wendekele ngwendi, "Njilinebi njishaka kwendeka kuli yobe" Cho wamukumbulwile ngwendi, " Endeka." ¹⁵ Andonainja ngwendi, "Wathzibuka ngwe bumwene bwakele bwange, cho na banu ba Isalela boshe banji kulahelele kupwa mwene, Oloni byuma byatengulukile, na bumwene babwanene kuli ndolome yange, mwafwa, bwakele bwendi kutunda kuli Njambi. ¹⁶ Choni njili nakukulombako chimo, cho kethi utenguluke kutunda ku mesho ange." Mbeteshemba wendekele kuli ikeye ngwendi, " Endeka." ¹⁷ Wendekele ngwendi, " Njalombo endeka kuli mwene Solomoni, mwafwa katha kutenguluka kutunda ku meshobe mangana anjane Ambusalome ou ka Shumamite kukala munakathzi wange" ¹⁸ Mbeteshemba ngwendi, chinabwaha njendeka kuli mwene." ¹⁹ Cho Mbeteshemba waile nakwendeka kuli mwene Solomoni kwimanenako Andonainja. Mwene wakatukile nakuliwana nendi cho wathsikamene kuli ikeye. Cho watumbamene halitanda lyendi cho banenelele litanda baina mwene. Watumbamene kuliboko lyendi lya chillyo. ²⁰ Cho wendekele ngwendi, " Njishaka kulombako chuma chimo cha chindondo kuli yobe, mwafwa kutenguluka kutunda ku mesho ange," Mwene wamukumbulwile ngwendi, " Lomba, nana yange, mwafwa kunjitenguluka kutunda ku mesho obe." ²¹ Wendekele ngwendi, " Echela Ambishangi ou ka Shunamite umwane kuli ndolome yobe Andonainja kupwa munakathzi wendi." ²² Mwene Solomoni wakumbulwile baina ngwendi, " Mwafwa bika unalombela Ambishangi ka Shunamite kupwa wa Andonainja? Mulonga wabika kumwamulombelelele bu mwene lalo, mwafwa yayange kuli ikeye, mwafwa Ambiyata uje kapilisitu, na Njoabu muna Zeluiya?" ²³ Cho mwene Solomoni walithingile hali Njambi achilinge kuli yange, na kutubakanethaho lalo ngwe Andonainja kendekele eli lijwi ha mwonyo wendi ibenya. ²⁴ Choni ngachije ngwe omu Njambi ayoya, ou najitungu naku njaka ha litanda lya tate Ndabiti, cho lalo ou nanjana njubo ngwe omu akulahethele, buthunga bene Andonainja bana kumuthsiya lelo." ²⁵ Cho mwene Solomoni watumine Mbenaiya muna Njehoiyanda, cho Mbenaiya wawanene Andonainja nakumurhsiya. ²⁶ Cho mwene wendekele kuli Ambiyata uje kapilisitu ngwendi, "Ya kuli Anathothi ku mahya obe ibenya. Unapande kuthsa, oloni hathimbu ino kunjikuthsiyi, mwafwa wambatele chikasha cha Shukulu Njambi kumesho a tate Ndabiti nakuyandela hamo mubingila byoshe ayandele tate."" ²⁷ Cho Solomoni watundithile Ambiyata ha bupilisitu kuli Njambi ngwendi hamo natha kushulistha lijwi lya Njambi, eli endekele ha mulonga wa njubo ya Eli ku Shilo. ²⁸ Muthzimbu wethzile kuli Njoabu, mwafwa Njoabu wakwathele Andonainja, nambe kakwathele Ambisalome. Cho Njoabu washatukilile ku tende ya Njambi nakukwata ku mambinga aku mutula. ²⁹ Mwene Solomoni bamulekele ngwe Njoabu watewelele ku tende ya Njambi choni watumbamene kuyehi na mutula. Cho Solomoni watumine Mbenaiya muna Njehoiyanda, ngwendi, "Ya, ukamuthsiye." ³¹ Cho Mbenaiya wethzile ku tende ya Njambi nakumuleka ngwendi, " Mwene nendeka ngwendi, 'Tuhuka." Njoabu wakumbulwile ngwendi, "Embwe, Njithsila kuno bene," Cho Mbenaiya welukile kuli mwene, ngwendi, "Njoabu ngwendi ashaka kuthsila ku mutula." ³⁰ Mwene wendekele ngwendi, " Linga ngwe omu nashakela. Muthsiye nakumuthsinda mangana wathe kwambata maninga awa etilile Njoabu chakujeneka mulonga kutunda kuli yange na mu njubo ya tate. ³² Echeleni Njambi akelwithe maninga endi ha mutwe wendi, mwafwa chakujeneka mangana a tate Ndabiti walwithile banu babali bakuthungama kumuhyana nakubathsiya na ,ikwale, Abina muna Neli, ntwama wa mwashwalale ba Isalela na Amasa muna Njete, ntwama wa mashwalale ba Yunda. ³³ Cho echeleni maninga abo akeluke ha mutwe wa Njoabu naha mitwe ya chithemunwina chendi myaka yoshe. Oloni kuli Ndabiti na chithemunwina chendi, naku njubo yendi, na kulitanda lyendi, kukakale kwoloka kwakutunda kuli Njambi myaka yoshe." ³⁴ Cho Mbenaiya muna Njehoiyanda waile nakulwitha Njoabu nakumuthsiya. Bamuthsindile mu mambo mu njubo yendi ibenya. ³⁵ Mwene wakele Mbenaiya muna Njehoiyanda mukulunu wa mashwalale mu mwela wendi, na kwaka Zandoki uje kapilisitu mu mwela wa Ambiyata. ³⁶ Cho mwene wathanene Shimei, na kumuleka ngwendi, "Litungile njubo mu Yelusalema ukayoyelemo, cho kethi ukatundemo nakuya ku chela cheka. ³⁷ Mafwa ha litangwa ukatundamo, nakwita mu mingulunga ya Kindiloni, tanekeya ngwobe chili bene ukathsa. Maninga obe akakala ha mutwe wobe ibenya." ³⁸ Cho Shimei wendekele kuli mwene ngwendi, "Ebi unendeka binabwaha. Ngwe omu shukwanana mwene nendeka ngwendi, mukemo apanga ngamba yobe." Cho Shimei wayoyelele mu Yelusalema ha matangwa amangi manene. ³⁹ Oloni hakulwa cha myaka itatu, bingamba ba Shimei babali batewelele kuli Achishi muna Maka, mwene wamu Ngati. Cho balekele Shimei, ngwabo, "Kenga, bingamba bobe bali mu Ngati." ⁴⁰ Cho Shimei wakutile chimulu chendi nakuya ku Achishi mu lifuti lya Ngati nakutonda bingamba bendi. Waile nakwilwitha bingamba bendi kutunda mu lifuti lya Ngati." ⁴¹ Omu bamulekele Solomoni ngwe Shimei watuhukile mu Yelusalema nakuya ku Ngati nakwiluka lalo, ⁴² mwene watumine nakuthana Shimei cho wendekele kuli ikeye ngwendi, "Nkuma kunjakuthingile hali Njambi nakukuleka, ngwange, 'uthzibuke ngwe halitangwa ukakatuka nakuya ku chela cheka, chili bene ukathsa'? Cho wendekele kuli yange ngwobe, 'Ebi wendeka byabibwa.' ⁴³ Bikoni kumwanyungile chithingo chobe hali Njambi na kukambeya chije njakwanene?" ⁴⁴ Mwene wendekele lalo kuli Shimei ngwendi, "Unatanekeya mumbunge yobe bubi bwoshe buje wapangele kuli tate Ndabiti. Ngachijoni Njambi elwitha bubi bwobe ha mutwe wobe obe ibenya. ⁴⁵ Oloni mwene Solomoni bakamubethzikitha cho na litanda lya Ndabiti bakalitunga kumesho a Njambi haya myaka." ⁴⁶ Cho mwene wakambeyeye kuli Mbenaiya muna Njehoiyanda. Waile nakuthsiya Shimei. Cho lishiko balitungile bwino mu maboko a Solomoni.