¹ Watungileko kuje na kuya kwimbo lyendi, na bandongethi bendi ba mukabele. ² Muyetele sabata, wa longethele mu Sinangonge. Banu ba bengi ba muthzibile cho balikomokelele. Bendekele ngwabo, "Kuli na wana ebi bilongetha?" "Mana muka awa a bana mwana?" "Byakukomowetha muka ebi akalingi na maboko endi?" ³ "Ou kethi ikeye muka Kushonga, muna Maliya wa munalume, na ndolome wa Yakomba na Yosesa na Yudasi na Simona? Bandokathzi bendi kutwethi nabo kuno?" Ba ba lubalethele kuli Yesu. (Hano munalume wa lithzina lya Yosesi ba muthana Yosefwa mu Mateo 27:56. Lithzina lya Yosefwa linemanenako omu lithzina bali thonene mu chi Hebelu, na lithzina Yosesi linemanenako omu lithzina bali thoneka mu chi Greek.) ⁴ Cho Yesu wendekele kuli bakebo, "Kapolofita kethi kupwa wa kushauka, kubanga mwimbo lyendi na ba bushoko bendi na munjubo yendi." ⁵ Kethele kulinga bipangi byakama, kubanga ku kambeka maboko endi ha banu ba bandondo ba kubinja na kuba kangula. ⁶ Wa likomokele ha kujeneka ku kulahela chabo. Oloni waile na kwita mumembo na kulongetha. ⁷ Cho wa thanene baje likumi na babali na kupuka ku batuma ba bali bali, cho wa banene bindzili bya kuhyana mithzithzime ya ibi, ⁸ na kubashika kujeka kwambata chuma nambe chimo mu bungethnzi bwabo, kubanga lika mbweti— kwa kujeneka likende, lipakumuna, nambe bimbongo— ⁹ oloni ba thzale binaku, cho kukwethi kuthzala bikobelo bibali. ¹⁰ Wendekele kuli bakebo, "Thimbu yoshe thimbu yoshe imukobela munjubo, tumameni kubanga noho munakatundamo. ¹¹ Umona mbaka imo kuyi ka mitambula nambe kumitolilila, omu mutunda mu mwela uje, totomoneni likungu lyeni lya kumyanja yeni kupwa bukaleho kuli bakebo." ¹² Baile na kwambulula ngwabo banu balumuke. ¹³ Batundithile mamba a mengi, cho ba bwabethele mathzi ba bethzi na ku ba kangula. ¹⁴ Mwene Helodi wa thzibile ebi, omwo lithzina lya Yesu mu lya thsimanene. Bamo bakele na kwendeka ngwabo, "Yowano muka kubwitika wa thanguka kutunda ku bathsi, mukemwo ebi bithzinli bya kukomowetha bili na kupanga muli yikeye." ¹⁵ Bamo bendekele ngwabo, "Ikeye Eliya." Bamo ba chendekele ngwabo, "Ikeye Kapolofita, nge umo wa ba polofita ba bithimbu bya thañulu." ¹⁶ Oloni ha thimbu Helonde mwathzibile ebi wendekele ngwendi, "Yowano ou njabatwile mutwe, ba na muthangula." ¹⁷ Omwo Helonde washikile kukwata Yowano na kumutilila mu kamenga ha mulonga wa Helondiya (Mwebo wa ndolome yendi Filipu), mwafwa wa mushombwele. ¹⁸ Mwafwa Yowano wa lekele Helonde ngwendi, "Kethi mwaya mashika yobe kushombola munakathzi wa ndolome yobe." ¹⁹ Oloni Helondiya wa twaleleleho ku lubalela na kushaka ku muthsiya, oloni kathele, ²⁰ omwo Helonde watewele Yowano; wa thzibukile ngwendi wapwa munalume mu kabushunga na kujela, cho wa munyungile bwino. Kumutolilila chakele na ku mu lubaletha manene, nambe wa mutolilile na kubwaha. ²¹ Cho litangwa limo lyetele omwo Helonde wanukile litangwa lya kuthemuka chendi wa wa bwahethele kulya cha bungwethzi cha ba kabipangi bendi na ba kulunu ba maswalale na bakulunu ba muchitungilo ba mu Ngalileya. ²² Muna Helondiya wa munakathzi wethizle na kuba kinina, Helonde naba ngethnzi bendi boshe ba bwahelelele. mwene wendekele kuli mumbanda ngwendi, "Njileke byoshe biushaka, nji kwana byo." ²³ Wa lithingile kuli uje mumbanda, "Byoshe bi unjilomba, njikwana, kweta na ha theteko ya mbathzubwila ya bumwene bwange." ²⁴ Mumbanda waile hanja na kwihula baina, "Byuma muka njikamulomba?" Wendekele, " Mutwe wa Yowano mu ka Kumbwitika." ²⁵ Haje bene mumbanda welukile kuli mwene, na kumeleka ngwendi, "Njishaka unjane, ololo bene, mutwe wa Yowano muka Kumbwitika ha lilonga." ²⁶ Nambe echi chanenelele manene mwene buthiwa bwa kama, kathele kubyana Kulomba cha mumbanda mwafwa wa lithingile na mwafwa ya bangethnzi. ²⁷ Cho mwene watumine umo wa maswalale na kumuleka kumunenela mutwe wa Yowano. Liswalale waile mukamenga na kubatula mutwe. ²⁸ Wanenele mutwe wendi ha lilonga na kwana kuli mumbanda, cho mumbanda wanene kuli ba ina. ²⁹ Omwo bandongethi bendi muba thzibile ebi bethzile na kwambata mubila wendi na ku waka mu chihilo. ³⁰ Miluwa bethzile hamo na Yesu na kumuleka byoshe bije bi ba lingile nebi ba longethele. ³¹ Cho wendekele kuli bakebo, "Ka chiyeni kwa likalyeni kwa kwengama mu ka hwimeko kamandondo." Mwafwa ba bengi bakele na kwija na kuya, cho kuba kele na thimbu ya kulya. ³² Cho baile mubwato likalyabo ku mwela wa kwengama. ³³ Oloni ba bamwene omu bakele na kuya cho babengi ba bathzibukile, cho boshe kutunda mu bimbongi bashatukile kuje ha mendi nakulibanga kwetako. ³⁴ Omwo betele muchabu, wa mwene mbunga yakama cho wa ba thzibilile binyeke mwafwa bapwile nge bimanga ba kujeneka kanyungi. Ngechi bene wa shangumukile ku balongetha byuma bya bingi. ³⁵ Muyetele thimbu ya chingwethzi, bandongethi bendi bethzile kuli ikeye na kwendeka, "Muno mu mambo cho litangwa lyatoko. ³⁶ Batumeni baye hamo baya mu mambweli ali ha yehi na mumembo na kuli landela bya kulya." ³⁷ Oloni wa ba kumbulwile nakwendeka kuli bakebo ngwendi, "Baneni byakulya yeni." Ba mwihwile, "Tuye na kulanda makende a kufwika bita bibali bya mbongo ya Siliva na ku bana balye?" WEndekele kuli bakebo, "Mikusha ya makende ingahi muli nayo? Iteni muye mukamone." ³⁸ Omu bakamwene bendekele ngwabo, "Mikisha ya makende itanu na bithi babali." ³⁹ Walekele bana boshe kutumama ha mwila wa kthzibuluka mu bimbunga. ⁴⁰ Batumamene hathi mu bimbunga bya bita na bya makumi atanu. ⁴¹ Wambatele ije mikisha itanu na bithi babali, cho wa kengele kwilu wa kithwile na kubujula mikasha na kubyana kuli bandongethi bendi ba pangele banu. Lalo wa pangelele baje bithi ba bali kuli boshe. ⁴² Boshe ba lile cho bakutile. ⁴³ Ba kungulwile bungululu bwoshe bwa makende, bongalo likumi na bibali bya kushula bya bungululu, cho lalo na bungulu bwa bithi. ⁴⁴ Bapwile makulukathzi atanu a banu balile mikasha. ⁴⁵ Haje bene wathindikiyile ba ndongethi bendi kukobela mubwato balibange muthambwa, kuya ku Mbetethainda, omo ikeye wa chithalele ku shandola mbunga ya banu. ⁴⁶ Omu baile, walondele ha munkinda na kulomba. ⁴⁷ Chingwethzi chetele, na bwato ha thimbu ije bwakele ha kati ka lishali, cho wakele endilika ha nunda. ⁴⁸ Waba mwene kupindathana na mikole, mwafwa bakele nkulwitha lihuthnzi. Mutondo tondo wethizle kuli bakebo, ali na kwenda ha mema, cho washakele ku bongoloka. ⁴⁹ Oloni omu ba mumwene ali na kwenda ha mema, ba thinganyekele ngwabo ndumba ya munu cho batambakanene manene, ⁵⁰ mwafwa ba mumwene na kuthziba lyoba. Haje bene wendekele nabo ngwendi, "Thimpeni! Yange! kethi muthzibe lyoba!" ⁵¹ Wa kobelele mubwato muje bakale, cho na lihuthnzi lyangalele. Ba likomokele manene. ⁵² Mwafwa ku ba thzibithithile mwa lumbunukilile mikasha ya makende. Nambe ngocho, bimbunge byabo bya kolele. ⁵³ Omu bajabukile muthambwa, bethzile na kweta ha Ngesaleta chol na kusulika bwato. ⁵⁴ Omu ba tundile mu bwato, hae bene banu ba muthzibukile, ⁵⁵ cho ba shatukile mulifuti mwoshe na kuputuka kunena baka kubinja ha manala abo kwoshe okwo ku ba bathzilile ngwabo kwali. ⁵⁶ Kwoshe kuje kwa kobelele mu membo, nambe mu binganda, nambe mu lifuti, bakele na kwaka ba ka kubinja na kuje ba ka landethela. Ba mu lambelelele kuba tabetha ku kwata ku mukundwilo wa chithzalo chendi, cho mu bwingi bwabo ba kwateleko ba kangukile.