¹ Aputukile lalo kulongetha kungenge ya lishali, na mumbunga yakama yakungulukile na kuthzenguluka. Wakobelele mubwato bwakele ha lishali, yoshe yakele hanunda kengenge ya lishali. ² Wa balongethele byuma byabingi mubithimo, namu kulongetha kwendi, ebi bikebyo wendekele kuli bakebo. ³ "Tolilileni! Njumi waile na kukuba mbuto yendi. ⁴ Omu akele na kukuba, mbuto imo yawililile hangila, cho tuthzila bethzile na kulya. ⁵ Mbuto ikwabo ya wililile ha mamanya, aha kuhakele libu lyalingi. Hajebene yamenene, mwafwa kuhaleke libu lyakuya hathi. ⁶ Oloni omu lyatuhukile litanya, ije mitombo bayenyekele, ha mulonga wa kwonowa mithzi, yoshe yomine. ⁷ Mbuto ikwabo ya wililile ha miti ya mingonga. ije miti ya minginga yakolele na kuitubanga, cho ku yathele kwima. ⁸ Mbuto ikwabo ya wililile ha libu lya libwa nakwima na kukola na kwakelako nakukuteja makumi atatu, atanu na limo, nakweta chita chimo." ⁹ Cho wendekele ngwendi , "Ou ali na matwi akuthziba, athzibe!" ¹⁰ Omu Yesu akele likalyendi, baje bakele kuhehi nendi na baje likumi na babali ba mwihwile ha bithimo. ¹¹ Wendekele kuli bakebo, "Kuliyeni ba nanako lihungu lya bumwene bwa Njambi. Oloni kuli baje hanja byoshe bili mubithimo, ¹² linga omu batala, eyo bamona, oloni kumonethetha kwahi, cho nawa omu bathzibilila, eyo bathziba, oloni kuthzibithitha kwahi, ngocho ngocho balumuka na Njambi aba konekela." ¹³ Wendekele kuli bakebo ngwendi, "Kumwathzibithithile echi chithimo? cho mu kabithzibithitha bati bithimo byoshe." ¹⁴ Muka kukuba ali na kukuba lijwi. ¹⁵ Aba bakebo bali kungila, oku ku bana kubu lijwi. Omu bathziba, Satan haje bene aija na kwambatamo lije lijwi bana kubu muli bakebo. ¹⁶ Ei ikeye mbuto bana kubu ha mamanya; aba, omu bathziba lijwi hajebene balitambula na njolela. ¹⁷ Oloni Kubethi na mithzi muli bakebo, olojo banyunga ha kathimbu ka kandondo. Hanima omu tuyando na lipaketho byama ha mulonga wa lijwi, hajebene batundako. ¹⁸ Lalo bakwabo babakubile mumingonga. Bakebo baje bathziba lijwi, ¹⁹ oloni kulijakamena chalifuti na kushaka bufuko na kuthsila byuma bikwabo bija na kutibanga lije lijwi, nakonwa kuthemunwina. ²⁰ Baje bakubile ha libu lyalibwa bakebo bathziba lijwi, nakulitabela na kwima bushuka, ka makumi atatu, atanu na limo, nakweta naku chita chimo mukutuma. ²¹ Yesu wendekele kuli bakebo, "Munatha kunena ndeya mukati ka njubo nakuyaka mwithi ya lyendeko nambe miwthi ya bulili?" Mukobeletha nakwaka ha chitumbiko chabindeya. ²² Mwafwa kukwethi echi bashweka chibonowa kuthzibuka, nambe chakubanda chilika kwija ha kujela. ²³ Nga kuli umo alinamatwi akuthziba, athzibie." ²⁴ Wendekele kuli bakebo, "akeni mbunge kulyobyo muthziba, chetheko upangetha halu mukweni, nobe ba kachipangetha, na kwakelaho. ²⁵ Mwafwa uje alinabyo, bakamwakelaho na bikwabo, nauje kethi nabyo, bakamutambula na kaje ali nako." ²⁶ Wendekele lalo, "Bumwene bwa Njambibunapu ngwe munu akuba mbuto syendi hathi. ²⁷ Akotha buthsiki nakwinduka ku mutanya, na mbuto imena na kukola, nambe kathzibukile omu mu ikola. ²⁸ Libu lina manona halwaho; Kuputuka na mutombo, cho matwi, cho manona akukola mu matwi." ²⁹ Omu mbuto ihya, hajebene atuma chikele mwafwa kuteja kunete." ³⁰ Wendekele lalo, "Bumwene bwa Njambi tubwetheketha na bika, nambe bithimo muka mwatha kupangetha haku bulumbununa? ³¹ Bunapu ngwe ka mbuto ka musalata, aka, umo ukakuna kanapu kakandondo manene ku mbuto yoshe yahathi. ³² Oloni, omu kakuniwa, kakola na kwama kutubakana miti yoshe ya mulihya, na kukala na minango yakama, linga tuthzila ba mwilu batunge mashwa mumithzithze yawo." ³³ Mubithimo byabingi ngechi, wendekele nabo majwi amengi, kweta na ha kuthzibithitha chabo, cho kathele kwendeka nabo kwakwilika bithimo. ³⁴ Oloni omu wakele likalyendi, abalumbunwinine bandongethi bendi byoshe. ³⁵ Hali lije litangwa omu chetele chingwethzi, wabalekele ngwendi, "Tujabukileni kuthambwa likwabo." ³⁶ Cho bathethzele mbunga yoshe, na kwambata Yesu, muje bene akele, mubwato. kwakele lalo mato akwabo aile nendi hamo. ³⁷ Hajebene kwethzile lihuthzi lyakama manene, na mankimba akatukile na kukobela mu bwato kunenetha bwato kushula na mema. ³⁸ Oloni Yesu akele kulituthi, lala ha muthathi. Bamwindwile, ngwabo, "Mulongethi, ku wali jakamenene ngwabo tuli na kuthsa?" ³⁹ Wendukile, wabyanethele lihuthnzi, na kwendeka ku lishali; "Kuhunda! chikaleko!" cho lithzi lyahwile, cho kwakele kwoloka kwakama. ⁴⁰ Cho wendekele kuli bakebo ngwendi, "Lyoba lyabika? Kanda lika mukale na lukulahelo?" ⁴¹ Bashulile na lyoba lyakama na kwendeka kuli umo na mukwabo, "Iyajo ou, mwafwa lishali na lihuthzi bina mwononokela ikeye?"