¹ Okukukekwo ku shangumuka kwa muthzimbu wa ubwa wa Yesu Kilisitu, Muna Njambi. ² Ngwe omu ba chi thoneka muli kapolofita Isaya, " Tala, Njituma muluwa wange ku lutwe lwobe, owo yaya nakubwahetha ngila yobe. ³ Lijwi lya uje ali na kuthana mu mambo, ' Bwahetheni ngila ya Shukulu; thungametheni bingila bwendi." ⁴ Yowano wethzile, oku ali nakumbwitika mu mambo nakwambulula lumbwitiko lwa kutenguluka kwa lukonekelo lwa shili. ⁵ Lifuti lyoshe lya Yudea na banu boshe bamu Yelusalema baile kuli ikeye. Ba ba mbwitikile kuli ikeye mu ndonga ya Yondau, oku bali na kwambulula milonga yabo ya shili. ⁶ Yowano wa thzalele mukanjo wa maka a ngamele na mwiba wa chilambu mumbunda yendi, cho walile bimbimba na buki bwa mushwata. ⁷ Wambulwile ngwendi, " Umo aka ija mu nima yange owo ali na binthzili kutubakana yange; nameme mikole ya ha bingaku byendi kunja pandele ku kulama na ku thzitula. ⁸ Nji mi mbwitika na mema, olojo akami mbwitika na munthzinthzime wa Kuthzila." ⁹ Chasholokele a matangwa aje bene omo Yesu wethzile kufuma ku Nazareta mu Ngalileya, cho ba mu mbwitikile kuli Yowano mu Ndonga ya Yondau. ¹⁰ Omo Yesu wakandukile kufuma mumema, wamwene melu a na shokoloka cho na Munthzinthzime wethile a li ikeye ngwe katela. ¹¹ Na lijwi lya fumine mumelu, " Yobe munange wamunalume inja thzanga. Nja bwahelela manene muki yobe." ¹² Cho Muthzinthzime wa mu thindiyiye kuya mu mambo. ¹³ Wakele mu mambo matangwa makumi awana, oku Satana ali na ku mwetheka. Wakele hamo na tuthitu ba mushwata, cho natungelo bakele na ku mupangela. ¹⁴ Oloni anima ya ku kwatiwa kwa Yowano, Yesu wethzile mu Ngalileya mu kwambulula muthzimbu wa ubwa wa Njambi. ¹⁵ Wendekele ngwendi, " Thimbu yalishulithilila, cho na bumwene bwa Njambi buli mu yehi. Tengulukeni nakutaba muthzimbu wa wubwa," ¹⁶ Omwo mwa kele na kwenda a chikulo cha ndonga ya Kalunga ya Ngalileya, wamwene Simoni na Andulu ndolome ya Simoni bali na kuta bwanda mu lishali, mwafwa bakele biyambi ba bithi. ¹⁷ Yesu wendekele kuli bakebo ngwendi, "Ijeni, njikabeni cho nji kami linga baka kuta banu." ¹⁸ Cho aje bene bathzethzele manda na kumu kabangeya. ¹⁹ Omwo lalo Yesu wendeleko ka mandondo, wamwene Yakoba muna Zebende na Yowano ndolome yendi; bakele mubwato kutungulula manda. ²⁰ Waba thanene cho ba thzethzele ishabo Zebende mu bwato na bangamba, cho ba mu kabangeyeye. ²¹ Cho bethzile mu Kapenauma, na lya Sabata, Yesu waile mu Sunangonge cho walongethele. ²² Balikomokelele mwakele naku longetha, mwafwa wakele na ku longetha ngwe uje ali na binthzili cho kethi ngwe baje bakele na ku thoneka. ²³ Haje bene munalume wa mu Sinangoge uje wakele na muthzithzime wa ubi wa kalumukile, ²⁴ ngwendi, "Bikajo bi tuna pande kulinga nobe, Yesu waku Nazaleta? Una ija mukutunyongetha tahi indi? Njakuthzubuka. Yobe wa Kuthzila wa Njambi!" ²⁵ Yesu wamuyalumukilile uje lyamba ngwendi, "Oloka chonawa tunda muli ikeye!" ²⁶ Uje muthzinthzime wa ubi wa mumbilile hathi cho watundile muli ikeye oku ali nakulila na lijwi lya ku kanguka. ²⁷ Banu boshe ba likomokelele, cho ba lilwile umo namukwabo, " Bika jo ebi? Echi kulongetha cha chihya ochochili lalo nabinthzili! Natha nakushika minthzithzime ya hibi cho ikeyo yononoka naku kabangeya!" ²⁸ Chojo na luthsimo lwendi lwa hile pulo kwoshe muje mulifuti lya Ngalileya. ²⁹ Hnima ya ku tuhuka mu Sinangoge, bakobelele munjubo ya Simoni na Andulu, cho bakele amo lika na Yakoba na Yowano. ³⁰ Aje bene bawanene bainamweno ya Simoni bana lala mwafwa ba binjile lithikathika, cho Yesu bamulekele muthzimbu. ³¹ Cho wethzile, wamukwatele ku liboko, cho wamimikile; na lithikathika lya mutundile, cho waputukoni na kubapangela. ³² Kuchingwethzi anima ya kulahuka cha litangwa, banenele kuli ikeye baje boshe bakele na ku binja na meme baje bakele na mamba. ³³ Nganda yoshe ya kungulukilile a chikolo. ³⁴ Chowa kangwile babengi abo bakele na kubinja mishongo ya kulithethzathethza na kutunditha mamba ba bengi, olojo ka tabethele mamba kwendeka mwafwa ba mu thzubukile. ³⁵ Cho wendukile mutondotondo, uku kuchili na kathuthulungu; cho waile kumwela wa likalyawo cho kuje bene wakalombelele. ³⁶ Cho Simoni na baje wakele nabo baputukile kumu lengeya. ³⁷ Ba muwanene cho bendekele kuli ikeye ngwabo, "Banu boshe bali na kukuthetela." ³⁸ Cho wendekele ngwendi, "tuyeni lalo kweka, mumembo awa analishandangana, ngechi uje njikambulule naje lalo. Mwafwa echi chikecho chinji nethzila kuno." ³⁹ Cho waile mulifuti lyoshe lya Ngalileya, oku ali nakwambulula mu Sinangonge ano nakunditha mamba. ⁴⁰ Chojo muka mbumba wethzile kuli ikeye. Waputukile kumulambelela; wabulyamene hathi nakwendeka kuli ikeye ngwendi, " Umona nga unashaka, unatha ku nji toketha. ⁴¹ Mwafwa wa ngothzi Yesu wolwele liboko lyendi, na kumukwata, na kwendeka kuli ikeye ngwendi, "Njina thzange. Jela." ⁴² Hajebene mbumba yamutundile, cho wakangukile. ⁴³ Yesu wa muthinikile cho lalo wa ku mutuma ku lyala. ⁴⁴ Wendekele kuli ikeye, "upande kumona ngwabo kuwendeka chimo ku munu woshe, olojo ya, wakukalisholole kuli kapilisitu, na ku kana mulambu wa ku jela chobe kwetheketha na lishiko lya Mosesa, mangana chipwe chimwetho kuli ba kebo." ⁴⁵ Olojo ikeyoni wa ile cho waputukile ku shangany a byoshe bije bya lingikile kuli ikeye, echi oni ni chonowethele Yesu kukobela mu nganda chitonamesho na kwangula ku kala mu bwela bije bya kele halako na banu. Olojo nambe ngocho banu hanga batwaleleleho kwija kuli ikeye ku kufuma kwoshe.