¹ Naanchi kiika kyotusa kwaamba tweeba? Twafwainwa kutwaajijila mu buubi byonakbyo amba buupe bwa Lesa buvule nyi? ² Ine akyo ne. Atweeba twafwiile ku bundeenga maambo, twafwainwa kwiikalamo byeepi? ³ Naanchi keechi mwayuuka amba bavula ba batishiwe mwi Kilishitu Yesu ba batishiwe mu lufu lwaanji ne nyi? ⁴ Atweeba twazhiikilwe ne aye moonka mu lubatisho ne mu lufu. Kino kya mweekele kuuba amba byonka Kilishitu byo a bushiiwe kufuuma mu baafwa ku lukuumo lwa shaanji, byonkabyo ne atweeba tukoonshe kweendanga mu buumi bupya. ⁵ Pakuuba inge atweeba twa kwaatankana naanji mu kipasha kya lufu lwaanji, atweeba byonkabyo tukeekala bakwaatankana ne mu lusaanguko lwaanji. ⁶ Twayuuka bino, amba bu muuntu bweetu bwakala bwa poopelwe pamo ne aye kumusalabu, pakuuba amba mubiji wa bu ndeenga maambo akoonshe konaunwa. Kino kya mweekele byonkabyo amba atweeba keechi tukiikale mu buzha bwa bu ndeenga maambo ne. ⁷ Awa wafwa ba amba'mba waoloka ku bu ndeenga maambo. ⁸ Mino inge twafwiile ne Kilishitu, twaketekela kuuba amba tukeekala naanji pamo. ⁹ Atweeba twayuuka kuuba amba Kilishitu byo a bushiwe kufuuma mu baafwa keechi ukafwa jibiji ne; lufu keechi lujipo na luusa pe aye ne. ¹⁰ Pakuuba alwa lufu lo a fwiile amba wafwiijile bu ndeega maambo, wafwiile jimootu kyaapwa. Nangwa byonkabyo buumi bo aikala, aye wikala na Lesa. ¹¹ Mujishiinda jimootu, ne anweeba muyuuke amba mwi bafu ku bu ndeenga maambo, mino mwi boomi kwi Lesa mwi Kilishitu Yesu. ¹² Byonkabyo keechi muleke bu ndeenga maambo bwiikale ke nfumu mu mibiji yeenu ya lufu ne, amba mukookele lwiiso lwaayo ne. ¹³ Keechi mupaane bya mibiji yeenu ku bu ndeenga maambo kwiikala bya kwiingijilako bya buubi ne. Mino mwiipaane anweeba kwi Lesa, noobe booba bo baleeta kufuuma ku lufu ke boomi, kabiiji ne kupaana bya mibiji yeenu kwi Lesa ke bya kwiingijilako bya bololoke. ¹⁴ Keechi muleke bu ndeenga maambo bwiikale ke mfumu pe anweeba ne. Pakuuba anweeba keechi muji mu mizhilo ne. Mino muji mu buupe. ¹⁵ Kiika pano? Kyotusa kubila buubi maambo keechi tuji mu mizhilo ne, mino tuji mu buupe nyi? Keechi kiikale byo byo ne. ¹⁶ Naanchi keechi mwayuuka amba inge mwiipana anweeba beene noobe bazha, anweeba mwi bazha ku yeewa ye mukookela ne nyi? Anweeba mwi bazha ku bu ndeenga maambo , butwaala ku lufu, nangwa mwi bazha ku lukookelo, lutwaala ku bololoke. ¹⁷ Mino saante kwi Lesa! Pakuuba anweeba mwajiinga bazha ba bu ndeenga maambo, mino mwakookela ku muchima wa musaango wa lufuunjisho lo be mipeele. ¹⁸ Anweeba mwakasululwa ku bu ndeenga maambo, kabiiji anweeba mwa aluka ke bazha ba bololoke. ¹⁹ Amiiwa ng'amba noobe muuntumaambo a kunekena kwa buntuunshi bweenu. Pakuuba byonka byo mwapaine bya mibiji yeenu ke bazha ku bubiipisho kabiiji ne ku mizhilulwiila, kya letele mizhilulwiila yavula, mu jishiinda jimootu, pano panai bya mibiji yeenu noobe bazha ku bololoke mu kwi izhijika. ²⁰ Pakuuba byo mwajiinga bazha ba bu ndeenga maambo, mwakasulukile ku bololoke. ²¹ Pa kyo kya kimye, kipaangwa ka pano kyo mwajiinga naakyo ku biintu bi muubisha buumvu luno? Pakuuba bifuuma mu byo bya biintu ke lufu. ²² Mino pano byo mwaikala ba kasuluka kufuuma ku bu ndeenga maambo kabiiji ne kwiikala bazha kwi Lesa, mwaikala na kipaangwa kyeenu kya kuzhijika. Bifumamo ke buumi bwa myaaka. ²³ Pakuuba mfweeto ya bu ndeenga maambo ke lufu, mino buupe bwa Lesa ke buumi bwa myaaka mwi Kilishitu Yesu Nkambo yeetu.