¹ Pano Sanabalata, Tobiya, Gesehema mwiina Alabya ne bakwaabo balwaanyi beetu pa kuumvwa amba naji kutuunganga kishimikwa kabiji keechi kwajiingapo kipamo kiji kyoonse ne kyashaajilepo kya shiinkwilwe, naangwa keechi nakibiikile biinzhilo mu bibelo ne, ² Sanabalata ne Gesehema batumine kwi amiiwa ne kwaamba amba, "Iyai, boonse tusaambakane pamo mu muzhi umo mu musaanza wa Ono." Pakuuba balaangulukile kuuba kyaatama kwi amiiwa. ³ Amiiwa natumine baluwe kwi abo, amba, "Mbeena kwiingila mwiingilo mukataampe, kabiji keechi nakoonsha kwiiya ne. Kiika kyo akoonsha kwiimena mwiingilo kasa nji naanji ne kwiiya kwi anweeba?" ⁴ Batumine miluwe imootu bimye bina, kabiji ne bakuumbwilengatu mukuumbu umo bimye byoonse. ⁵ Sanabalata watumine wa mwiingilo waanji kwi amiiwa mujishiinda jimootu jabutanu, na nkalata yakubula kushiinka mukubooko kwaanji. ⁶ Amo mwaneembelwe amba, "Kya umvwanyika mu byaalo, ne Geshema naaye wikyaamba, amba obeewa ne ba Yudea mubeena kulaanguluka kusatuka, o ene maambo o mubeena kushimukuwliila kibaamba. Mubino byo ba mbuula, kataataka wiikale mfumu waabo. ⁷ Kabiji watoongola ne ba ngauzhi ba kushimuna kino pe obeewa mu Yelusalema, amba, 'Muji mfumu mu Yuda!' Uyuuke kuuba amba mfumu kiine usa kuumvwa bino byaambo. Onkao maambo iya, leka twiisambe ano maambo umo ne mukwaabo." ⁸ Keepo natumine byaambo kwi aye amba, "Kafwaako biintu bya mweeka bya byonkabyo byo wa amba ne, pakuuba mukachi ka muchima obe mo mo wibifumya." ⁹ Pakuuba boonse basakile kwituleengesha mooyo atweeba, ba laangulukile amba, "Mabooko abo akafumako ku miingilo, kabiji ne miingilo keechi igijiwe ne." Pano mino, Lesa, koseshai mabooko ami. ¹⁰ Naile ku nzuubo yakwa Shenaya mwaana Delaya mwaana Mehetabela, wishiinkilangatu mu nzuubo yaanji. Wa ambile amba, "Lekai tusaambakane pamo mu nzuubo ya Lesa, mino mu teempele, kabiji ne kushiinka biizhilo bya teempele, pakuuba babeena kwiiya na ku kwiipaya obeewa. Bufuku babeena kwiiya na ku kwiipaya obeewa." ¹¹ Na kuumbwile amba, "Muuntu uji noobe amiiwa wakoonshe kunyeema nyi? Muuntu uji noobe amiiwa wakoonsha kuya mu tempele byonkabyo amba aka pulushe mweo waanji? Keechi nsa kuya mukachi ne!" ¹² Nayuukile naamba keechi wajiinga Lesa wamutumine , mino amba aye wa ngawila amiiwa. Tobiya ne Sanabalata ba mutweezhele nkito aye. ¹³ Ba mutweezhele nkito aye amba angubishe mooyo, byonkabyo amba nkoonshe kuuba byo a ambile ne kuleenga maambo, byonkabyo amba bakoonshe kuumpa jizhina jatama mukuuba amba ba dengeshe buumvu. ¹⁴ Muvululai Tobiya ne Sanabalata, Lesa waami na mwaila byuubilo byaabo. Kabiji ba vululai ba ngauzhi ba bakazhi Noadiya ne ba ngauzhi boonse baesekele ku ngubisha mooyo. ¹⁵ Byonkabyo kibaamba kya pwiile pa juuba ja makumi abiji ne atanu a n'oondo wa Elula, panyuuma ya mooba makumi atanu ne abiji. ¹⁶ Balwaanyi beetu boonse byo bekyuumvwine, byaalo byoonse bituzhookoloka, baikeele na mooyo kabiji baumwiine mukataampe mu meeso abo beene. Pakuuba bayuukile amba miingilo yapwiile na bukwaasho bwa Lesa weetu. ¹⁷ Pakino kimye ba bineeme ba mu Yuda batumine makalata avula kwi Tobiya, kabiji ne makalata akwa Tobiya afikile kwi abo. ¹⁸ Pakuuba mwajiinga bavula mu Yuda bakashilwe na luchipo kwi aye, maambo wajiinga muko wakwa Shekaniya mwaana Alaha. Mwaananji Yehohanana wasoongweele mwaana Meshulama mwaana Belekiya. ¹⁹ Kabiji naabo ba ambile kwi amiiwa pa byuubilo byaanji bya waama ne ku mubuula byaambo byaami aye. Ba ntumijile makalata kwi Tobiya a ku nzakamisha.