¹ Keepo Pilato wa mupaine Yesu kabiiji wi ba kaambizhizhe ku mupuma aye. ² Bashilikale balukile muunchi wa mibaambang'oma. Be kibiikile ku mutwe wa Yesu kabiiji ba muvwiikile kivwalo kya mashi. ³ Ne abo baishile kwi aye ne kwaamba amba, "Muteende, mfumu wa ba Yudea!" kabiiji ba mupumine aye. ⁴ Keepo Pilato waile paangye jibiiji ne kwi baambila amba, "Monai, amiiwa mbeena kumulupula paangye kwi anweeba byonka byo amba muyuuke amba amiiwa keechi nataanamo maambo mwi aye ne." ⁵ Byonkabyo Yesu walupukile paangye, sa a vwaala muunchinya wa miiba ne kivwaalo kya mashi. Pilato wi baambijile amba, "Talai, muuntu ye uno!" ⁶ Byonkabyo pano ba ng'anga bakataampe ne bashilikale byo ba mumweene Yesu, ba bijikile ne kwaamba amba, "Mupoopai aye, mupoopai aye!" Pilato wi baambijile amba, "Museendai anweeba beene muka mupoope, pakuuba amiiwa keechi natanamo maambo mwi aye ne." ⁷ Ba Yudea ba mukuumbwile amba, "Atweeba tuji na muzhilo, kabiiji kwesakanya na mwaila yeewa muzhilo aye wafwainwa kuufwa maambo aye waamba amba ye mwaana Lesa." ⁸ Pilato byo a umvwiine bino byaambo, aye wakijilemo ne kumvwa mooyo, ⁹ kabiiji watweelele ne mubipaango bya kafulumeende jibiji ne kwaamba kwi Yesu amba, "Wafuma kweepi?" Mino Yesu keechi wamupeele mukuumbu ne. ¹⁰ Keepo Pilato wa mwaambijile aye amba, "Obeewa keechi ubeena kwaamba kwi amiiwa ne nyi? Keechi wayuuka amba amiiwa nji na luusa lwa kukukasuulula obeewa, kabiiji ne luusa lwa kukupoopa obeewa ne nyi?" ¹¹ Yesu wa mukuumbwile amba, "Anweeba keechi mujipo na luusa pe amiiwa ne kufumyako kanaatu lwapeewa kufuuma mwiulu. Onkao maambo, aye wampaine amiiwa kwi anweeba uji na buubi bukataampe." ¹² Pa uno mukuumbu, Pilato waesekele kumukasulula, mino ba Yudea ba bijikile , amba, "Inge mu mukasulule uno muuntu, keechi mwi baluunda na Kaisala ne. Yeense waamba amba mfumu mwiine wiimena Kaisala." ¹³ Pilato byo a umvwiine bino byaambo, aye wa mulupwiile Yesu paangye ne kwiikala paanshi mu kipona kya buuncha maambo mu mpuunzha iteelwa amba "Mukwaakwa," mino mu ki Alamaika amba, "Gabaata." ¹⁴ Pano jajiinga juuba ja luneengezho lwa kijiilo kya lupitailo, na pa awaala wa butanu na umo. Pilato wa ambile ku ba Yudea amba, "Monai, uno ye mfumu weenu!" ¹⁵ Abo babijikile amba, "Mufumyaipo, mufumyaipo; mupoopai aye!" Pilato wa ambile kwi abo amba, "Bushe na mupoope mfumu weenu nyi?" Ba ng'anga bakataampe ba kuumbwile amba, "Atweeba keechi tuji na mfumu ne kana Kaisala." ¹⁶ Keepo Pilato wapaine Yesu kwi abo amba a poopwe. ¹⁷ Keepo ba museendele Yesu, ne kulupuka, sa a seenda musalabu aye mwiine, kuuya ku mpuunzha kuteelwa amba "Kiboyoongolo," ako kuteelwa mu ki Alamaika amba "Ngolongoota." ¹⁸ Ba mupoopele Yesu kookwa, kabiiji ne na babalume bakwaabo babji, umo kulubaji lumo ne mukwaabo ku lubaji lukwaabo, ne Yesu pakachi. ¹⁹ Pilato wa neembele ne kayuukilo ne kwi kabiika pa musalabu. Apo pa neembelwe amba: YESU MWIINA NAZAALA, MFUMU WA BA YUDEA. ²⁰ Ba Yudea bavula bataanga kano kayuukilo maambo mpuunzha ko ba poopele Yesu yajiinga kwiipi na muzhi. Kayuukilo kaneembelwe mu ki Alamaika, mu ki Latina, ne mu ki Ngiliki. ²¹ Keepo ba ng'anga ba kataampe ba ba Yudea ba ambile kwi Pilato amba, "Kuneemba amba, 'Mfumu wa ba Yudea ne,' mino amba, 'Uno wa ambile amba, "Amiiwa ne mfumu wa ba Yudea.""' ²² Pilato wa kuumbwile amba, "Amiiwa byo naneemba na neemba." ²³ Bashilikale byo ba mupoopele Yesu, bashiikwile bivwaalo byaanji, ne kwi byabanya pana, kimo kimo abo beene; kabiiji ne munkukumba . Pano munkukuumba wajiinga wapapalala, wajiinga mu kibese kimo kufuma peulu. ²⁴ Keepo ba ambile beene na beene amba, "Lekai kwikitabula, mino lekai tuteyelepo bubale pakuuba amba kisale usa kwiikala mwiine." Abino bya mweekele byonkabyo amba bineembelo bikoonshe kufikizhiwa abyo bya ambile amba, "Ba abeene bivwaalo byaami mukachi kaabo beene ne kuteeya bubabale kivwaalo kyaami." ²⁵ Pano baimeene kwiipi ku musalabu wa Yesu bajiinga ba inaanji, ba nkasabo na ba inaanji, Maliya muuka Kulopasa, ne Maliya Magadalena. ²⁶ Yesu byo a mweene ba inaanji ne baana ba bwaanga bo a teemenwe sa baimana kwiipi, aye wa amibile ku ba inaanji amba, "Ineetu, moonai, mwaanenu!" ²⁷ Keepo aye wa ambile ku baana ba bwaanga amba, "Talai, ba ineenu!" Kufuuma pa yeewa awaala baana ba bwaanga ba mutwaajile inaabo ku nzuubo yaanji mwiine. ²⁸ Panyuuma ya biino, ya kuyuuka amba byoonse pano bya fikizhiwa kabiiji byonka byo amba bineembelo bikoonshe kufikizhiwa, Yesu wa ambile amba, "Amiiwa naumvwa kilaka." ²⁹ Muloondo wayuujile binyu bya sasa beitujile konka kwa, byonkabyo babikilemo kyayuujile na binyu bya sasa pa mutai wa kichi ne kwituumpula peulu pa kanwa kaanji. ³⁰ Yesu byo a tomene minyu bya sasa, aye wa ambile amba, "Pano kyaapwa." Aye wa kunyikile mutwe waanji ne kuleka ku mweo waanji. ³¹ Keepo ba Yudea, maambo ja jiinga juuba ja luneengezho, kabiiji byonkabyo amba mibiji keechi yafwainwa kwiikala pa musalabu pa juuba ja Sabado ne (pakuuba awa Sabado wajiinga waneema biingi), ba loonbele Pilato kumokaula maulu abo ne kwi bafumyapo. ³² Keepo bashilikale baishile ne kumokaula maulu a muuntu mutaanshi kabiiji ne muuntu waloondejilepo abo ba poopelwe pamo ne Yesu. ³³ Byo bafikile kwi Yesu, ba mweene amba waafwa kala, byonkabyo keechi ba mokawiile maulu anji ne. ³⁴ Nangwa byonkabyo, umo wa mu bashilikale wa mwaashile jiifumo muumbavu yaanji, kabiiji ponkapotu maashi ne meema a fumine. ³⁵ Awa wamweene bino washimuna, kabiiji kushimuna kwaanji kwakiine. Aye wayuuka amba bya ambile bya kiine byonkabyo amba ne anweeba mukoonshe kwiitabila. ³⁶ Pakuuba abye biintu bya mweekele mukuuba amba bifiikizhe bineembelo, "Kafwaako nangwa kikuupa kyaanji kikachimuka ne." ³⁷ Kabiiji, kineembelo kikwaabo kya amba'mba. "Bakatala pe aye ye ba ashiile." ³⁸ Panyuuma ya bino biintu, Yosefwa mwiina Alimatea, maambo wajiinga mwaana wa bwaanga wa kwa Yesu(mino wabunfyanfya maambo a kuchiina ba Yudea), waipwiizhe Pilato inge aye wakoonsha kuseenda mubiji wa Yesu. Pilato luusa. Byonkabyo Yosefwa waishile ne kuseenda mubiji waanji. ³⁹ Nikodema naanji waishile, aye waishile pataanshi kwi Yesu bufuku. Aye waleetele manyi a vwangakana a mola ne aloesa, a nemene peepi kitoota kimo. ⁴⁰ Byonkabyo ba seendele mubiji wa Yesu ne ku mupoomba mu kisapi kya Lineni na binuunkila buloongo, ne mwaila kiseemwa kya ba Yudea ku zhiika mibiji. ⁴¹ Pano mu mpuunzha mo a poopelwe mwajiinga ne mpooka; kabiiji ne mu mpooka mwajiinga kileende kya kataataka amo mo babujile kuzhiikamo muuntu ne. ⁴² Maambo jajiinga juuba ja luneengezho lwa ba Yudea kabiiji maambo kileende kyajiinga kubwiipi, ba muzhiikilemo Yesu.