¹ Mu nteendekelo mwajiinga maambo, ne ao maambo ajiinga na Lesa, kabiiji ao maambo ajiinga Lesa. ² Uno wajiinga mu nteendelo na Lesa. ³ Biintu byoonse byaleengelwe kupichila mwi aye, kabiiji kwakubula aye keechi kwajiinga nangwa kiintu kimo kyaleengelwe akya kyaleengwa. ⁴ Mwi aye mwajiinga buumi, kabiiji ne buumi bwajiinga kyeeya kya baantu. ⁵ Kyeeya kisamina mu mfiinshi, ne mfiinshi keechi ikishiinjile ne. ⁶ Kwajiinga muuntu ye batumine kufuuma kwi Lesa, jizhiina jaanji wajiinga Yoano. ⁷ Aye waishile noobe kamoonyi mu kushimuna pa kyeeya, amba boonse bakoonshe kwiitabila kupichila mwi aye. ⁸ Yoano keechi wajiinga kyeeya ne, mino waishile amba akoonshe kushimuna pa kyeeya. ⁹ Kyeeya kya kiine, kipaana kyeeya ku baantu boonse, kyaishileenga pano pa mtaanda. ¹⁰ Aye wajiinga pano pa ntaanda, ne ntaanda yaleengelwe kupichila mwi aye, kabiiji ne ntaanda keechi ya muyuukile ne. ¹¹ Aye waishile kubaanji mwiine, kabiiji ne baanji mwiine keechi ba mutaambwijile ne. ¹² Mino ku bavula ba mutaambwijile, baitabijile mu jizhiina jaanji, aye wibapeele luusa lwa kwiikala baana ba Lesa. ¹³ Bano keechi basemekelwe ku maashi ne, nangwa ku luusa lwa mubiji ne, nangwa ku luusa lwa muuntu ne, mino kwi Lesa. ¹⁴ Ano maambo aikeele mubiiji kabiiji waikajile mukachi keetu. Twamona lukuumo lwaanji, lukuumo noobe yeewa umo yeenka wafuumine kwi Taata, wayuulwa na buupe ne bu kiine. ¹⁵ Yoano washimwiine pe aye kabiiji wajijile, amba, "Uno iye ye na ambile amba, 'Awe wiiya panyuuma yaami ye wankila amiiwa, pakuuba wajiinga mutaanshi pe amiiwa."' ¹⁶ Pakuuba moonka mu kuyuula kweenu mo twataambwila buupe pa buupe atweeba boonse. ¹⁷ Pakuuba muzhiilo wapainwe kupichila mwi Mosesa. Buupe ne bu kiine bwaishile kupichila mwi Kilishitu. ¹⁸ Kafwaako nangwa umo wamonapo kala Lesa ne; yeenka Lesa umotu, aye uji kulubaji lwa Taata, aye waleengesha Lesa kuyuukanyikwa. ¹⁹ Aluno lo lushimuno lwakwa Yoano ba Yudea byo batumine ba ng'anga ne beena Levi kwi aye kufuuma mu Yelusalema mu kumwiipuzha amba, "Obeewa wi ng'anyi?" ²⁰ Aye wisolwele-keechi wakaine ne, mino wisolwele amba-"Amiiwa keechi ne Kilishitu ne." ²¹ Byonkabyo ba mwiipwizhe amba, "Naanchi obeewa wi ng'anyi?" Obeewa wi Elaija nyi?" Wa ambile amba, "Keechi amiiwa ne." Ba ambile amba, "Wi ngauzhi nyi?" Wakumbwile amba, "Ine." ²² Keepo ba mwaambijile amba, "Naanchi wi ng'anyi, pakuuba amba tukoonshe kupaana mukuumbu ku booba baji kwiitutuma atweeba? Naanchi waambapo amba ka pe obeewa mwiine?" ²³ Wa ambile amba, "Amiiwa ne jiiwi, jibijika muungyetu amba: 'Ololai jishiinda ja Nkaambo,' ²⁴ Pano baamo kufuuma mu ba Faliseo bebatumine, ²⁵ kabiiji ba mwipwiizhe aye ne kumwaambila amba, "Kika kyo wi batishila inge keechi yoobe Kilishitu nangwa Elaija nangwa Ngauzhi?" ²⁶ Yoano wiba kuumbwile, amba, "Amiiwa mbatisha na meema. Mino mukachi keenu mwaimana umo ye mwabula kuyuuka. ²⁷ Ye umo wiiya panyuuma yaami, mukwaandala wa nkwabilo yaanji keechi nafikilamo kumukasulula ne." ²⁸ Bino biintu byaubiwe mu Betani kubushiiya bwa Yodano, kwa batishilenga Yoano. ²⁹ Juuba ja loondejilepo Yoano wamweene Yesu kasa eya kwi aye kabiiji wa ambile amba, "Talai, awa ye mukooko wa Lesa ufumya buubi bwa pano pa ntaanda! ³⁰ Uno iye ye na ambile naamba, 'Umo wiiya panyuma yaami wakiila amiiwa, pakuuba aye wajiinga mutaanshi pe amiiwa.' ³¹ Amiiwa keechi na muyuukile ne, mino kyajiinga byonkabyo amba aye akoonshe kusololwa kubeena Isalela amba naishile na kubatisha na meema." ³² Yoano washimwiine, ne kwaamba amba, "Amiiwa na mweene Mupashi sa ekila noobe nkuunda kufuuma mwiulu, kabiiji waikele pe aye. ³³ Amiiwa keechi na muyuukile aye ne, mino awa waantumine amiiwa na ku batisha mu meema wa ambile kwi amiiwa amba, 'Awa ye ukamona Mupashi waikila ne kwiikala pe aye, ye iye ukabatishanga na Mupashi Wazhila.' ³⁴ Amiiwa namona ne kushimuna amba awe ye mwaana Lesa." ³⁵ Kabiiji, juuba ja loondejilepo, Yoano byo aimeene na baana baanji ba bwaanga babiji, ³⁶ ba mweene Yesu kasa apita, ne Yoano wa ambile amba, "Talai, mukooko wa Lesa!" ³⁷ Baana baanji ba bwaanga babiji ba mumvwiine byo a ambile bino kabiiji ne abo ba muloondejile Yesu. ³⁸ Keepo Yesu a alulukile ne kumona abo sa ba muloondela aye kabiiji wibaambijile amba, "Mubeena kukeeba ka?" Abo ba mukuumbwile amba, "Labi" (ko kulumbulula amba "Mufuunjishi"), "Mubeena kwiikala kweepi?" ³⁹ Aye wibaambijile amba, "Iyai mumone." Keepo baishile ne kumona ko aikelenga; ne abo baikele naanji jooja juuba, pakuuba kyajiinga pipi na kiimye ma awala jikumi. ⁴⁰ Umo mu booba babiji wa umvwiine Yoano sa amba kabiiji wamuloondele Yesu wajiinga Andeleo, muloongo waanji Shimona Petelo. ⁴¹ Aye pataanshi wataine muloongo waanji Shimona kabiiji wa mwaambijile amba, "Twamutaana Mesiasa" (ko kuluumbulula amba "Kilishitu"). ⁴² Aye wamuletele kwi Yesu, ne Yesu wamutajile aye ne kwaamba amba, "Obeewa wi Shimona mwaana wakwa Yoano. Obeewa usa kuteelwa amba Kefasa" (ko kuluumbulula amba "Petelo"). ⁴³ Juuba ja loondejilepo, Yesu byo a kebeleenga kufuumako kuuya ku Ngalileya, aye wataine Filipa ne kumwaambila amba, "Ndoondele amiiwa." ⁴⁴ Pano Filipa wafuumine ku Beteseda, mu muzhi wa kwa Andeleo ne Petelo. ⁴⁵ Filipa wataine Natanela ne ku mwaambila amba, "Aye ye aneembele Mosesa mu miizhilo, ne ba ngauzhi, twa mutaana aye: Yesu mwaana wa kwa Yosefwa, wa ku Nazala." ⁴⁶ Natanela wa mwaambijile aye amba, "Bushe mwafwainwa kufuumapo kiintu kiji kyoonse kyawaama mu Nazala nyi?" Filipa wa mwaambile aye amba, "Iya umone." ⁴⁷ Yesu wamweene Natanela sa eya kwi aye kabiiji wa ambile pe aye amba, "Monai, mwiina Isalela wa kiine, mwi aye kafwaamo bubela!" ⁴⁸ Natanela wa mwaambijile aye amba, "Mwa ngyuuka byeepi amiiwa?" Yesu wa kuumbwile ne ku mwaambila amba, "Filipa sa akyaangye ku kwiita obeewa, byo wajiinga muunshi ya kiichi kya mukuyu, amiiwa nakumweene obeewa." ⁴⁹ Natanela wakuumbwile amba, "Labi, anweeba mwi mwaana Lesa! anweeba mwi mfumu wa Isalela!" ⁵⁰ Yesu wakuumbwile ne ku mwaambila aye amba, "Maambo amiiwa naaji ku kwaambila obeewa amba, 'Amiiwa na kumweene muunshi ya kiichi kya mukuyu,' waitabila nyi? Amba obeewa ukamona biintu byawaama kukila bino." ⁵¹ Keepo aye wa ambile amba, "Kiine, kiine, amiiwa ne mwaambila naamba, mukamona jiulu sa jashiinkulwa, ne ba Malaika ba Lesa sa bakaanjila ne kwiikila pa Mwaana Muuntu."