¹ Kala keene Lesa wa ambileenga ku bashaakulu beetu kupichiila mu bangauzhi pa biimye byavula ne mu mashiinda avula. ² Mino mu ano mooba apelako, aye wa amba kwi atweeba kupichiila mu mwaana, aye ye atoongweele kwiikala nswaanyi wa biintu byoonse. Kupichiila mwi aye mo mo Lesa aleengejile biintu byoonse. ³ Aye kyo kyeeya kya lukuumo lwa Lesa, kuluumbulula kwiine kwa byo aji aye. Aye ulama byoonse pamo na byaambo bya buluume bwaanji. Panyuuma ya kuleenga kya kutookeshako buubi, aye waikajile paanshi ku kubooko kwa kiluujo kwa buluume peulu. ⁴ Aye waikala wakiila ku ba malaika byonka biji jizhiina jo aswaana byo jawaama kukiila jizhiina jaabo. ⁵ Pakuuba kwi ng'anyi mu ba malaika Lesa ko a ambiilepo amba, "Obeewa wi mwaanami, leelo amiiwa naikala shoobe"? Naangwa kwi ng'anyi mu ba malaika Lesa ko a ambiile amba, "Amiiwa nkeekala shaanji, kabiiji ne aye ukeekala mwaana kwi amiiwa"? ⁶ Pano kabiiji, Lesa byo aleeta mubeji pa ntaanda, aye waamba amba, "Ba malaika ba Lesa boonse bafwainwa ku mupoopwela aye." ⁷ Pa ba malaika aye waamba amba, "Aye ye uleenga mipashi ya ba malaika baanji, kabiiji ne ba miingilo baanji lubeebe lwa mujilo." ⁸ Mino ku mwaananji aye waamba amba, "Kipoona kyoobe, Lesa, kya myaaka ne myaaka. ndoondo ya boololoke yo ndoondo ya bufumu boobe. ⁹ Obeewa watemenwe boololoke kabiji washiikilwe mizhiluulwila. Onkao maambo Lesa, Lesa obe, wakushiinga maanyi obeewa na maanyi a lusekeelo kukiila bakweenu." ¹⁰ "Mu nteendekelo, Nkaambo, anweeba mwa anshikiile kiteendekesho kya ntaanda. Meulu yo miingilo ya mabooko enu. ¹¹ Bikonaika, mino anweeba mukatwaajijila. Bikatabauka byoonse noobe ka kipiimvwa ka kukivwaalo. ¹² Anweeba mukebivuungakanya noobe bivwaalo byaakala, kabiji bikakiingishiwa noobe ka kipiimvwa ka ku kivwaalo. Mino anweeba mujitu byonka byo mwaajinga, kabiiji ne myaaka yeenu keechi ipela ne." ¹³ Mino kwi ng'anyi mu ba malaika ako Lesa ko a ambileepo pa kiimye kiiji kyoonse amba, "Ukala ku kubooko kwaami kya kiluujo poso amiiwa nkaleenge balwaanyi boobe ke kya kutuulapo maulu obe"? ¹⁴ Naanchi ba malaika boonse ke mipashi ingila, kabiiji yobatuuma na kusuunga aba bakaswaana lupulukilo ne nyi?