¹ Kyaishile kubiwa pakupita bino biintu Lesa wa mwesekele Abalahama. Aye wa mwambijile amba, "Abalahama !" Abalahama wakumbwile amba, "Amiwa bano." ² Kepo Lesa amwambijile amba, "Shikula mwaanobe wamulume, mwanobe yenka ye uji naaye, yenka ye watemwa obewa, Izaaka, ne kuya kuntaanda ya Moliya. Ukamupaane aye kookwa nobe mulambo wa kusooka pa mutumba umo wa mitumba kookwa, yenka ye nkakubuula obewa." ³ Byonkabyo Abalahama wabukile bukiji mu lukeelo, wabikile kyakwikalapo pa mbongolo, ne kushikulapo babiji ba nsongwalume mu ba nsongwalume banji kuya na aye, pano na Izaaka mwaana wanji wa mulume. Aye wachibile nkunyi ya kusokelapo mulambo wa kusooka, ponkapo wabikile lwendo lwanji kuya ku mpunzha akwa Lesa ko a mubujile ⁴ Pajuba ja busatu Abahalama watajile peulu ne kumona yooya mpunzha paleepako. ⁵ Abalahama wa ambile ku bansongwalume banji amba, "Ikalai pano na mbongolo, ne Amiwa ne nsongwalume tusa kuya kookwa. Atweba tusa kupopwela ne kwiiya jikwabo kwi anweba." ⁶ Ponkapo Abalahama washikwile nkunyi ya mulambo wa kusooka ne kwi bibiika pe Izaaka mwaananji wa mulume. Aye washikwile mu kuboko kwanji mujilo ne mupenyi; kabiji bonse bwaabo pamo. ⁷ Izaaka wa ambile kwi Abalahama shanji amba, "Bataata bami,'' kabiji ne aye wa ambile amba, "Amiwa bano mwaanami wa mulume.'' Aye wa ambile amba "Talai mujilo ne nkunyi tuji nayo, mino mwaana mukooko ujipi wa mulambo wa kusooka?" ⁸ Abalahama wa amnile amba , "Lesa Aye mwine usa kwitumwena mwaana mukooko wa mulambo wa kusooka, mwaanami," Byonkabyo abo bailengatu, abo bonse pamo. ⁹ Byo baishile pa mpunzha aya Lesa yo a mubujilepo, Abalahama watungile kyakusokelapo bitapisho poopa ne kulajikapo nkunyi ponka. kepo akashile Izaaka mwaananji, ne kumulajika pa kyakusokelapo bitapisho, peulu ya nkunyi. ¹⁰ Abalahama waukwachile na kuboko kwanji ne kushikula mupenyi peulu ku kwipaya mwaananji. ¹¹ Ponkapo malaika wa Yehoba waichile kwi aye kufuma mwiulu ne kwamba amba, "Abalahama, Abalahama!" kabiji wa ambile amba, "Amiwa bano." Aye wa ambile amba, ¹² "Kangye ubike kuboko koobe pa nsongwalume, nangwa kuuba kijikyonse kya ku kozha aye ne, maambo pano Amiwa nayuka namba obewa uchina Lesa, pakumona amba obewa kechi wa muleka mwaana obe ne, mwanobe yenka umo, kufuma kwi amiwa." ¹³ Abalahama watajile peulu ne pa pakutajisha, ku nyuma yanji mukooko mulume wakwachilwe masengo anji mu kipuupu. Abalahama waile ne ku mushikula mukooko mulume ne kumulambula peulu nobe mulambo wa kusooka kupingakenya mu mwananji wa mulume. ¹⁴ Byonkabyo Abalahama watumbile poopa pantu amba, "Yehoba usa kwitumwena,'' kabiji kyambwa ne ku ja leelo amba, "Pa mutumba wa Yehoba kisa kumwenwa." ¹⁵ Malaika wa Yehoba waichile kwi Abalahama ja bubiji kufuma mwiulu ¹⁶ ne kwamba amba---kuno ko kwamba nakupwisha kwa Yehoba amba---na amiwa mwine Nachipa namba maambo obewa wa uba kino kintu, kabiji ke wa muleka mwanobe ne, mwanobe yenka umo, ¹⁷ Amiwa kine nkapesha obewa kyobe nobe tubangabanga twa mwiulu, kabiji nobe musenga wa ku kitulu kya kalunga; kabiji ba mukisemi kyobe bakatambula bibelo bya ba lwanyi babo ke byaabo ¹⁸ Kupichila muwa kisemi kyobe mikoka yonse ya pantaanda ikapeshiwa, maambo obewa wakokela jiwi jami." ¹⁹ Byonkabyo Abalahama wa bwelele ku ba nsongwalume banji, ne abo baile ne kuya pamo ku Belesheba, kabiji aye waikajilenga mu Belesheba. ²⁰ Kyashile kubiwa pa kupita bino biin tu abya byo ba mubujile Abalahama amba, "Milika naye wamusemene baana mulongo wanji Nahola." ²¹ Abo bajinga Uza mubeji, Buza nkasanji,Kemwela shanji Alamu, ²² Kesheda, Hazo, Pilidashi, Yidilafu ne Betwela. ²³ Betwela waikajile shanji Lebeka. Bano bo baana bataanu na basatu aba Milika bo asemejile Nahola, mulongo wa Abalahama. ²⁴ Ntoombo wanji, wajizhina ja Lauma, naye wasemene Teba, Cahama, Tahashi ne Maaka.