¹ Kyajiinga mu ng'oondo wa butanu na bubiji kufuma beena Isalela byo ba bweelele mu mizhi yaabo, kimye baantu byo bapwiijile noobe muuntu umo mu Yelusalema. ² Yeshua mwaana Yozadaka ne baloongo baanji ba ng'aanga, ne Zelubabele mwaana Shulachele, ne baloongo baanji baimeene na kushimika kya kusookelapo kya Lesa kya beena Isalela kya kulaambwilapo milaambo yakusooka byonkabyo byo kya neembwa mu mikaambizho yakwa Mosesa muuntu wa Lesa. ³ Pano bashimikile kyakusookelapo po kituulwa, pakuuba mooyo wajiinga mwi abo maambo a baantu bajiinga mu kyaalo. Balaambwilenga milaambu ya kusooka kwi Yehoba pa kuleemba kwa juuba ne mabaanga. ⁴ Bajiile kijiilo kya miimba moonka mo kya neembejilwe ne kulaambula milaambu juuba pa juuba moonka mo mwaijile mizhilo, mwiingilo umo pa juuba jaanji. ⁵ Mokyaila, kwajiinga milaambu ya kusooka pa juuba pa juuba, ne milaambu ipya ya ng'oondo, ne milaambu yoonse ya pa bijiilo ya Yehoba ayo yatoongwelwe, ne yooya milaambu ya kusaanchila kufuma ku booba bapaine kwi Yehoba. ⁶ Batatwiile kupaana milaambu yakusooka kwi Yehoba pa juuba jitaanshi ja ng'oondo wa butanu na bubiji naangwa keechi teempele watainwe ne. ⁷ Keepo bapaine maali ku baseendwe basoonga maabwe ne baseendwe ba bichi, ne kupaana kajo, byakutoma, ne maanyi ku baantu ba mu Shidona ne Tila, keepo amba bakaleete bichi bya sida ku kaluunga ka meema kufuma ku Lebanona kuuya ku Yopa, byonkabyo baswiishiwe kwi Kilusa, mfumu wa Pelisha. ⁸ Pano mu juuba ja bubiji ja ng'oondo wa bubiji byo baishile ku nzuubo ya Lesa mu Yelusalema, Zelubabele mwaana Shalechele, Yeshua mwaana Yozadaka, ne baloongo baabo bakwaabo ba ng'aanga ne beena Levi, ne booba boonse bafumine mu buzha ku Yelusalema batatwiile kwiingila. Batoongwele beena Levi bajiinga na myaaka makumi abiji ne booba bakilaapo kutala miingilo ya nzuubo ya Yehoba. ⁹ Yeshua ne baana baanji ba balume ne baloongo, ne Kadamiela ne baana baanji ba balume (Abo bajiinga kisaka kya Hodaviya), ne baana ba balume bakwa Hanadada ne baana baabo ba balume ne baloongo-boonse baabo bajiinga beena Levi-bekwaachile pamo ne kumona booba baingijilenga ku nzuubo ya Lesa. ¹⁰ Bashimikab ba ajile kiteendekesho kya tempele wa Yehoba. Kino kyaleengejile ba ng'aanga kwiimana mu bivwaalo byaabo na ntoloompita, ne beena Levi, baana ba balume bakwa Asafwa, kutuumbijika Yehoba na masiimbo, noobe kubooko kwa ka Davida, mfumu wa Isalela byo a kaambizhe. ¹¹ Baimbile na kutoota ne kusaanta kwi Yehoba amba, "Wa waama! Lulayaang'ano lwaanji : Kubeena Isalela lo lwayaayaya." Baantu boonse bajijile na jiiwi jikataampe mu kupoopwela Yehoba maambo kiteendekesho kya tempele kya ajilwe. ¹² Pano ba ng'aanga bavula, beena Levi, ne bakuluumpe ba kisaka, abo bajiinga bakote bamweenepo nzuubo itaanshi, kimye kino kiteendekesho kya ajilwe ku meeso abo. Bajijile na jiiwi jikataampe. Pano baantu bavula babijikile na jiiwi ja lusekeelo na kutemwa ne na jiiwi ja kusaangalala. ¹³ Kyafumineemo, baantu keechi bakoonsheshe kuyuuka buloongo lusekelo ine ne kusaangalala kufuma ku maawi abo a kujilaang'ana, maambo baantu bajijileenga na lusekeelo, ne jiiwi jaumvwanyikile kwa leepa.