¹ Mosesa wi bapwiizhe bijiiji byoonse bya mu Isalela ne kwaamba ko baji amba, "Abino byo biintu byo Yehoba emukaambizha kuuba anweeba. ² Pa juuba ja butanu ne jimo jo mwafwainwa kwiingila miingilo, mino anweeba, juuba ja butanu ne abiji jafwainwa kwiikala jazhila, ja Sabaado ja kukookolokatu, jazhila kwi Yehoba. Yeense ukeengila mwiingilo uji yeense pajooja juba wafwainwa kwiipaiwa. ³ Keechi mukabaanze mijilo mu nzuubo naangwa imo pa juuba ja Sabaado ne." ⁴ Mosesa wa ambile ku biji byonse bya mu Isalela, amba, "Akino kyo kiintu kyo e mukaambizhe Yehoba. ⁵ Twalai mulaambu wa Yehoba, anweeba boonse muji na muchima wa buumpanyi. Letai mulaambu kwi Yehoba-golode, siliva, kapootwe, ⁶ toonge wa fiituluka, ne wachiluluka, ne wachijisha, ne bisapi bya lineni; booya bwa mbuzhi; ⁷ myai ya baana ba mikooko baalume yamisoombelo ichila ne biseba bya nekena byakufya; biichi bya akakiya; ⁸ maanyi a mu ma laampi, ne binuunka buloongo bya mu maanyi a kushiinga ne maanyi a mu bya kufutumuna binuunka buloongo, ⁹ maabwe a onika ne maabwe a buneeme bakeaneengezhe kwiikobeka ne kya pa kyaaji. ¹⁰ Muuntu yeense shayuuka wa mukaachi keenu akeeye ne kuleenga biintu byoonse bya kaambizha Yehoba- ¹¹ kya kusaambakenamo ne teente waakyo, kyakuvweetapo, ne tuunkobelo twaanji, ma fulemu, mashiki, myaamba ne bitako byaakyo; ¹² kabiji ne jikwaachi ja lushimuno ne mashiki ajo, kyakuzhikapo kyafwinwa, kabiji ne kipeembe kya kukwasha. ¹³ Ba leetele tebulu ne ma shiki anji, ne byoonse bya kwiingijisha, ne shiinkwa wa mukyeenyi; ¹⁴ Kya kwiikalapo laampi kya laampi wa kuleeta kyeeya, ne byoonse bitaanwamo, ma laampi akyo, ne maanyi ao mu ma laampi; ¹⁵ ne kya kusookelapo ne mashiki akyo, ne maanyi a kusuba ne binoonka buloongo, ne kipeembe kya kuvweeta mu kibelo ya kya kwiikalamo. ¹⁶ ne kya kusookelapo milaambo ya kusooka, ne kyeela kyaanji kya lubeemba ne mashiki akyo ne bya kwiingijisha; ne kabesenyi kabaya ne kitako kyaako. ¹⁷ Baleetele ne bya kukobeeka bya kupeepeela kukipaango ne mashiki abyo, kisapi kya pa kibelo kya kipaango. ¹⁸ Kabiji mpoopo ya teente ya kya kwiikalamo ne ya kipaango, byoonse pamo ne mashiki abyo. ¹⁹ Baleetele ne bivwaalo byo baluka buloongo na manono bya kwiingijilamo amwa mwaazhila, bya kuvwaala byazhila bya kwa Alona ng'aanga ne mwaanaanji wamulume, byaabo bya kwiingijilamo ba ng'aanga." ²⁰ Kabiji ne jibuumba joonse ja baantu ba mu Isalela bafumineko ne kuuya baile kuungi kufuma ku meeso akwa Mosesa. ²¹ Boonse bajiinga na michima yasuunkena ne booba bo alengejile kusakisha kwiiya ne kuleeta bya kubiikapo kwi Yehoba yo twiingijisha kushimika teente wa lusaambakeno, pakuuba byoonse bya kwiingijisha mu mwiingilo byajiinga moonka ne bya kuvwaala bya miingilo wazhila. ²² Baishile boonse, babiji ba balume ne ba bakazhi, boonse bajiinga na muchima wakusakisha. Baleetele tuma peengele, mashikiiyo, tuumbala minwe, ne bya neema bya muteengo, ne byoons bya musaango wa golide. Kabiji baleetelenga bya buupe bya golide noobe kyakumweesha bya buupe kwi Yehoba. ²³ Awa yeense wajiinga na toonge wafiituluka, naangwa wachiluluka naangwa wachijisha naangwa kisapi kya lineenyi, naangwa booya bwa mbuuzhi, naangwa kiseba kya musoombelo kya mwaana mukooko kichila, naangwa myaai ya biseba byanekena byo baleetele kwi abo. ²⁴ Muuntu yeense waleengelenga kya buupe kya siliva ne kapotwe bebileetele noobe kya mulaambu kwi Yehoba, ne yeense awa wajiinga na bichi bya akasha kya kwiingijisha mujishiinda muji moonse mu mwiingilo ba leetele. ²⁵ Mwaana mukazhi yeense wayuukile kupikula butoonge na mabooko anji ne kuleeta byo a pikwiile-kyafiituluka naangwa, kyachiluluka, naangwa kyachijisha ne bya kisapi kya lineenyi; ²⁶ Baana bakazhi boonse bajiinga na michima ya sumininwa, ibeemenye ne booba bayuukile kuzhiinga ba zhiingile booya bwa ba mbuzhi. ²⁷ Ba ntaangi ba leetele mabwe a onyeka ne a kwaabo mabwe a kubiika mu tukwaata ne mukya kubiika pa kyaaji; ²⁸ Baleetele binuunka buloongo ne maanyi a muma laampi, ne maanyi a kushiinga, ne a bya kufutumuna binuunka buloongo. ²⁹ Kabiji ne baantu ba mu Isalela ba leetele milaambu na kukasuuluka kwi Yehoba; Yeense mwaana mulume ne mwaana mukazhi wajiinga na muchima wa kusakisha baleetele bya kwiingijisha ku miingilo yoonse yo eba kaambizhe aye Yehoba kupichila mwi Mosesa amba bika leengwe. ³⁰ Mosesa wa ambile ku beena Isalela amba, "Talai Yehoba watoongola pa jizhiina pe Bezaleela mwaana Uli mwaana Hula, kufuma mu mukooka wa Yuda. ³¹ Aye wa muyuuzhizhe Bazaleela na mupashi waanji, mu kumupa maana, a kuumvwisha, ne maana a kuyuuka, ku yoonse mituundu ya buseendwe, bwa ³² kuleenga ne kulaanguluka ne mu kwiingila na siliva, golide, ne na lubeemba; ³³ Kabiji ne mu kuseembulula ne kutaanchika mabwe ne kusoonga bichi-mu kwiingila yoonse miingilo ya kuneengezha ne buseendwe. ³⁴ Aye wibituula mu muchima waanji mu kufuunjisha, boonse babiji aye ne Oyoliaba mwaana wa mulume wakwa Aisamaka, kufuma mu mukooka wakwa Danyi. ³⁵ Aye wibayuuzha na buseendwe bwa kwiingila yeense mutuundu wa mwiingilo, kwiingila noobe ba seendwe, noobe ba kusoonga, naangwa basona na toonge wafiituluka, ne wachiluluka ne wa chijisha ne na kisapi kya lineenyi, naangwa noobe baluka. Ke baseendwe mu mituundu ya miingilo yoonse, kabiji bo ba yuuka kwiingila miingilo ya mituundu ne mituundu.