¹ Baantu byo ba mweene amba Mosesa wabaanda kubweela kufuma ku mutuumba, ba pwiijile kwi Alona ne ku mwaambila amba, "Iya, wituleengele nkishi wa kwiitutangijila atweeba. Maambo keechi twayuuka kyaubiwa kwi aye Mosesa muuntu witufumishe mu ntaanda ya Ijipita ne." ² Byonkabyo Alona wa ambile kwi abo amba, "Bavuulai bakazhi beenu mashikiyo a golide aji ku matwi abo, ne aji ku matwi a baana beenu ba balume ne ba bakazhi, ne kwialeta kwi amiiwa." ³ Boonse baantu bavuujile mashikiyo abo a golide ajiinga ku matwi abo ne kwialeeta kwi Alona. ⁴ Aye wataambwile golide kufuma ku mabooko abo ne kwi yalula mu kiintu kya kwiingijisha, kabiji waleengelemo nkishi mukifwaanyikizho kya mwaana ng'oombe. Keepo aye wa ambile amba, "Bano bo ba lesa beenu, Isalela, bemufumishe mu kyaalo kya ijipita." ⁵ Alona byo amweene bino, watuungile kya kusookelapo bitapisho kuluutwe ya mwaana ng'oombe ne kuleenga lushimuno; amba, "Keesha kukeekala kijiilo kya kusaangalala mu kuneemeka Yehoba. ⁶ Baantu babukile lukeelo juuba ja loondejilepo ne kulaambula milaambu ya kusooka ne kuleeta milaambu ya muteende. Poonkapo baikeele paanshi na kuja ne kutoma, keepo baimeene na kukaya. ⁷ Poonkapo Yehoba wa ambile kwi Mosesa amba, "Yaanga lubilo, maambo baantu boobe bo wafumishe mu ntaanda ya Ijipita, betamisha beene. ⁸ Baseenduka bukiji mu jishiinda jo nebakaambizhe. Beleengela kala kipashanya kya mwaana ng'oombe ne kwi kipoopwela akyo ne kulaambula kwi akyo. Ba amba amba, "Abe ke balesa beenu, Isalela, bemufumishe mu kyaalo kya Ijipita."' ⁹ Keepo Yehoba wa mwaambijile Mosesa amba, "Ne bamona baantu. Tala, ke baantu bakosa mashiingo. ¹⁰ Byonkabyo, keechi weseke ku ngimika amiiwa ine. Bukaji bwaami bukeba buukila abo, byonkabyo amiiwa nkebonauna boonse. Keepo nkapaanga mukooka mukataampe kufuma kwi obeewa." ¹¹ Mino Mosesa waesekele ku mu tekenesha Yehoba Lesa waanji. Wa ambile amba, "Yehoba, maambo ka bukaji bweenu kyo busa kwiibabukila baantu beenu, bo mwafumishe mu ntaanda ya Ijipita na bulume bukataampe ne na kubooko kwakosa? ¹² Maambo ka beena Ijipita kyo basakwaambila amb, 'Aye wiiba taangijile abo na muchima wabiipa, mu kwiibepaya mu mituumba ne kwi bonauna, kufuma pa ntaanda?' Aluluukai kufuma ku bukaji bweenu bwakatazha ne kuleka mulaanguluko wa kuuba lukabiisho pa baantu beenu. ¹³ Vulukai Abalahama ne Izaka ne Isalela, bakalume beenu kwi abo ko mwachipile anweeba beene ne kwaamba kwi abo amba, 'Nkaleenga baana beenu kuvula noobe tubaanga baanga mwiulu, kabiji nkebapa ntaanda yoonse byo naamba. Bake itaambula ke yaabo kikupu.''' ¹⁴ Keepo Yehoba walekele mulaanguluko wa kumanyika baantu baantu ye a laangulukile aye. ¹⁵ Poonkapo Mosesa wa alulukile ne ku kuunkuluka kufuma ku mutuumba, kasa a seenda mabwe abiji a lushimuno mu kubooko kwaanji. Ano mabwe aleembelwe moonse mubiji, kuluutwe ne munyuuma. ¹⁶ Ano mabwe ajiinga mwiingilo wa mwiine Lesa, ne bineembelo bya neembelwepo byajiinga bineembelo bya mwiine Lesa, a toonkawilwe pa mabwe. ¹⁷ Byonkabyo Yoshiwa byo a umvwiine kyoongo kya baantu byo babijikilenga, aye wa mwaambijile Mosesa amba, "Kuji kyoongo kya nkoondo mu kaamba." ¹⁸ Mino Mosesa wa ambile amba, "Keechi kiwoowo kya kushiinda ne, kabiji keechi kiwoowo kya kushiindwa ne, mino ke kiwoowo kya kwiimba kyo naumvwa." ¹⁹ Mosesa byo a fikile peepi na kaamba, aye wamweene mwaana ng'oombe ne baantu kasa bazha. Aye wa umvwiine bukaji bukataampe. Wataile mabwe kufuma mu mabooko anji ne kwi alalaula muunshi ya mutuumba. ²⁰ Aye washikwiile mwaana ng'oombe awa aleengele baantu wamusooka wamutwa ke buungatu ne kwitulwiila mu meema. Keepo aleeengeshe baantu beena Isalela kwiatoma. ²¹ Keepo Mosesa wa mwaambijile Alona amba, "Kiika kyo bakuubila abano baantu, pakuuba amba uleete buubi bwabaya pe abo?" ²² Alona wa ambile amba, "Keechi muleke bukaji bweenu butwe kyuuya ne, nkaambo yaami. Mwayuuka baano baantu, byo bakeelwa kuuba byatama. ²³ Abo ba ng'aambijile amba, 'Tuleengele nkishi wa kwiitutangijila atweeba. Maambo keechi twayuuka kyaubiwa kwi aye Mosesa muuntu witufumishe mu ntaanda ya Ijipita ne.' ²⁴ Byonkabyo na ambile kwi abo naamba, 'Yeense uji na golide, eileete.' Abo ba mpeele golide ne amiiwa ne itaile mu mujilo, kabiji mwalupukile uno mwaana ng'oombe." ²⁵ Mosesa byo a mweene amba, baantu bezhilulula, (maambo Alona wiibalengesha kwiizhilulula, mu kwiiletesha buumvu ku balwaanyi baabo). ²⁶ Poonkapo Mosesa waimeene pakutweela mu kaamba ne kwaamba amba, "Yeense uji ku lubaji lwa Yehoba eye kwi amiiwa." Boonse beena Levi bapwiijile ne ku muzhookoloka aye. ²⁷ Wa ambile kwi abo amba, "Yehoba, Lesa wa Isalela, wa amba bino amba: Lekai yeense muuntu akaase lupaanga waanji pa mbaavu yaanji ne kuya ku kibelo kya moonse mu kaamba, ne kwiipaya muloongo waanji, mu kwaabo naaye ekale naanji kiipi."' ²⁸ Beena Levi baubile byonkabyo a kaambizhe Mosesa. Aja juuba baantu peepi na biumbi bisatu bafwiile. ²⁹ Mosesa wa ambile ku beena Levi amba, "Anweeba mwabiikwa mu mwiingilo wa Yehoba ja leelo, maambo anweeba umo umo mwiitumpa mukuuba kibi mwanaanji wa mulume ne muloongo waanji, byonkabyo Yehoba yewakoonsha kwiimupa anweeba mapesho ja leelo." ³⁰ Juuba ja loondejilepo Mosesa wa ambile ku baantu amba, "Mwauba buubi bwaabaisha. Pano nsakuya peulu kwi Yehoba kaampe nsakukoonsha kwimufuuchila maambo enu." ³¹ Mosesa wabweelele kwi Yehoba ne kwaamba amba, "Maama! abano baantu bauba buubi bwaabaya ne kwileengela abo beene nkishi wa golide. ³² Pano mino, ne musaanshijila balekelaiko maambo abo; mino inge ke mwiibalekele ne, fuutai amiiwa mu buuku awa ye mwaneemba." ³³ Yehoba wa mwaambijile Mosesa amba, "Yeense wa ndeenga maambo amiiwa, awa muuntu nkamufuuta mu buuku waami. ³⁴ Byonkabyo pano yaanga, ukebataangijile baantu ku mpuunzha ko na amba kwi obeewa. Tala, malaika waami ukataangila kuluutwe yoobe. Mino pa juuba jo nkebamanyika abo, nke bamanyika na maambo a maambo abo." ³⁵ Yehoba watumine mwaalo pa baantu maambo baleengele mwaana ng'oombe, umo waleengele Alona.