¹ Keepo Yehoba wa ambile kwi Mosesa amba, ² "Tala, amiiwa namwiita pa jizhina jaanji aye nsoongwalume Bezalela mwaana Uli, mwaana Hula; wa mu mukooka wa Yuda. ³ Amiiwa nayuuzha Bezalela na mupashi waami, ne kumuupa maana, ne milaangwe, ne kuyuuka mituundu yoonse ya buseendwe, ⁴ kuleenga bya buseendwe ne kwiingijila mu golide, siliva, ne lubeemba; ⁵ Kabiji ne kusoonga mabwe ne kusoonga ne kupokola mwaandalo-mituundu yoonse ya buseendwe. ⁶ Mukunuungapotu kwi aye, amiiwa nasala Oholyaba mwaana wa mulume wakwa Ahisamaka, wa mu mukooka wa Danyi. Nabiika buseendwe boonse mu ba maana bakamone kuuba amba baleenga byoonse byo na ku kaambizha. ⁷ Abye bibikwaapo teente walusaambakeno, jikwaachi ja lushimuno ne kizhilo kya kufuuchilako maambo pa jikwaachi, ne ⁸ mwakwiikala-tebulu ne bijipo, kituulwapo laampi ne biikalako bya waamisha, byakufuutumuna, bya pa bitapisho ne na bitanyiwa koonka, ⁹ kyakusookelapo milaambo ne byoonse bitanwa koonka, ne mvukuto kubiikapotu ne kitako kyaayo. ¹⁰ Ne byoonse bivwaalo byo baluka na manono-byo bivwaalo bya zhila bya kwa Alona, ng'aanga ne bivwaalo bya baana baanji, byo bafwainwa kuvwaala pa kwiingila mwiingilo wa bu ng'aanga. ¹¹ Kabiji kubiikapotu ne maanyi a kushiinga ne byakufuutumuna biji na bweema bunuunka buloongo mukuuba amba mpuunzha ikale ya zhijikwa. Bano baseendwe bafwainwa kuuba byoonse byo ne mukaambizhizhe." ¹² Keepo Yehoba wa ambijile Mosesa amba, ¹³ "Ambila beena Isalela amba: Mwafwainwa kulamaanga mooba a Yhoba a Sabaado, maambo bino bikeekala ke kayuukilo pakachi ka aye ne anweeba kufiikatu ne mu mooba a baloongo beenu ba kuluutwe pakuuba mukaye amba ke Yehoba wimupatula kwiikala baanji. ¹⁴ Byonkabyo mwafwainwa kulama juuba ja Sabaado jafwainwa kwiikala jazhijikwa, na anweeba jatuujilwa aye. Yeense ukazhilulula mukaambizho ba kamwiipaya kiine. Kabiji yeense ukeengila pa Sabaado, ukafuma ku baloongo baanji. ¹⁵ Kabiji miingilo yoonse ikeengijiwangatu mu mooba atanu ne jimo, mino juuba ja butaanu na bubiji jo juuba ja Sabaado muuntu wafwainwa kukookoloka maamba jino juuba jazhila, ku meeso a Yehoba. Yeense ukeengila mwiingilo uji yeense bakamwiipaya kiine. ¹⁶ Onkao maambo beena Isalela bafwainwa kulama juuba ja Sabaado. Bafwainwa kwiijinemeka kufikatu ne ku baansemi yaabo ba kuluutwe kwiikala ke lulayaang'ano. ¹⁷ Juuba ja Sabaado jikeekala ke kayuukilo pakachi ka beena Isalela ne Yehoba, kikupu maambo mu mooba atanu ne jimo, Yehoba waleengele jiulu ne ntaanda, ne pa juuba ja butaantu na bubiji wakookolokele ne kupemenwa." ¹⁸ Kimye kya Lesa kyo a pwiishishe kwaamba na Mosesa pa mutuumba wa Sinai, Yehoba wamupeele mabwe abiji a lulayaang'ano lwa malamuna pa mabwe apapakana paneembelwe mafuunde a lulayaang'ano, byaleengelwe na mabwe, paneembelwe na kubooko kwaanji aye mwiine.