¹ Pano mu kyoonka kya kiimye Heloda mfumu wa kwaachi bamo bamu kipwiilo pa kuuba amba ebamanyike. ² Aye waipaile Yakooba muloongo waanji Yoano na mpoko. ³ Mino byo a mweene amba akino kyatookeshele ba Yudea ku michima, aye watwajijile ne kukwaata Petelo pamo aa mooba ajiinga a bashiinkwa ba kubula mbiizho. ⁴ Byo ba mukwaachile, aye wa mubiikile mukaleeya, wamupaine ku biumbi bina bya ba shilikale na ku mulama: aye wakebeleenga ku muleeta ku baantu pakupitapo mooba a kijiilo kya lupitailo. ⁵ Ne Petelo ba mulamineenga mu kaleeya, mino ba muloombelejilenga kwi Lesa na michima yaabo yoonse kuba mu kipwiilo. ⁶ Ne bufuku Heloda mfumu sa a kyaangye ku mulupula na kumutootolwesha, Petelo walajile pakaachi ka bashilikale, sa ba mukasa na minyiilolo ibiji, balama kaleeya kulutwe ya kibelo na kulama kaleeya. ⁷ Talai, ponkapotu ne malaika wa Nkambo wiba mweekejile, kabiji ne kyeeya kyasamine mu kaleeya. Aye wamupumine Petelo ku bushiiya kabiiji ne ku mubuusha ne kwaamba amba, "Buuka bukiji," kabiiji ne minyoololo yaponeeneko ku mabooko anji. ⁸ Ne malaika wa mwaambjile amba, "Ikase mushiipi kabiiji uvwaale ne makwaabilo oobe." Petelo waubile byoonkabyo. Ne malaika wa mwaambijile amba, "Vwaala bivwaalo byoobe undoondele." ⁹ Ne Petelo wamuloondejile malaika ne kuya paangye , aye keechi wayuukile amba byaubile malaika byajiinga byakiine ne, aye walaangulukile amba wamweene kimweesho. ¹⁰ Byo ba pichile pe kalama mutaanshi ne wa bubiji, baishile ne bafikile ne kukibelo kya kyeela kyatala mu muzhi; ne akyo kine kiba shiinkukijile kine. Balupukile kabiiji ne kuuya mu mukwaakwa, kabiiji ne malaika wamushiile poonkapo. ¹¹ Ne Petelo byo a luumbulukile muchima, wa ambile amba, "Pano nayuuka kiine naamba Nkambo watumine malaika waanji ne ku mpokolola ku mfumya ku mabooko a kwa Heloda, kabiiji ne kubyoonse byo ba ketekejilenga ba Yudea." ¹² Byo a laangulukile bino, waile ku nzuubo ya kwa Maliya inaanji Yoano, jikwaabo Mako ako kwapwiijile baantu baavula na kuloomba. ¹³ Byo a koonkoshele ku kibelo kya paangye, mwanyike wa mukazhi wa jizhiina ja Loda waishile na ku mukuumbula. ¹⁴ Byo a yuukile jiiwi ja kwa Petelo, maambo a luseekelo wa kaankelwe kushiinkulako ku kibelo: wa bweelele moonka lubilo; aye wiba bujile amba Petelo waimana pa kibelo. ¹⁵ Abo ba mwaambijile amba, "Wakonya?" Mino aye wakoselepotu amba kiine. Ba ambile amba, "Ye malaika waanji." ¹⁶ Mino Petelo watwajijile na ku koonkosha, kabiiji ne byo bashinkwiileko ku kibelo, ba mumweene kabiji bakuminye. ¹⁷ Petelo wi bazhiindamikile na kuboko kwaanji, kabiiji ne kwiibabula Nkambo byo a mufuumishe mukaleeya. Wa ambile amba, "Mubuule bino biintu Yakoba kabiiji ne baloongo baanji. Poonkapo ne aye wafuminepo kabiiji ne kuuya ku mpuunzha ku kwaabo. ¹⁸ Pano byo bwakiile lukeelo, keechi kwajiinga kulukuta mukachi ka bashilikale pa bya mweekele kwi Petelo ne. ¹⁹ Heloda panyuuma ya ku mukeeba ne ku mutaana ne, watootolweshe ba kalama kabiiji ne ku kaambizha amba be beepaye. Ponkapo aye waile kufuuma ku Yudea ne kuuya ku Keselea ne kwiikala koonka. ²⁰ Pano Heloda wibazhiingijile biingi baantu ba ku Tila ne Shidona. Ne abo baile kwi aye pamo. Ba mwaambijile aye Bulashita, kalama wa mfumu kwiiba kwaashako. Ne abo baloombeleko muteende, maambo kyaalo kyaabo kyataambwilanga kajo kufuuma mu kyaalo kya yeewa mfumu. ²¹ Ne pa juuba jo a neengezhezhe Heloda wavwaajile bya kuvwaala bya bufumu kabiiji ne kwiikala pa jitaanda: aye wibabuujile byaambo. ²² Kabiiji ne baantu ba bijikiile amba, "Jino jo jiiwi ja Lesa, keechi ja muuntu ne!" ²³ Poonkapotu ne malaika wa Nkambo wamupuumine, maambo keechi wapaine lukuumo kwi Lesa ne; ne aye bamujiile ku mapila kabiiji ne kuufwa wafwiile. ²⁴ Mino byaambo bya Lesa byavujile kabiiji ne kunanuka. ²⁵ Kiimye Banabasa ne Saulo byo bapwiishishe miingilo yaabo, babweleele kufuuma ku Yelusalema, baseendele ne Yoano, jikwaabo ba muteela amba Mako.