¹ Obewa byonkaabyo, Mwaanami, Ikalaanga mu Lusa luji mwi Kilishitu Yesu. ² Biintu byowaumvwiine kwi amiwa moonka Mubakamonyi bavula, wibapaane boonse kubaantu balwitabilo bakakoonsha kufunjishaako neeba kwaabo. ³ Upiteenga mubya malwa kwi amiwa byouji Mushilikale wawaama mwi Kilishitu Yesu. ⁴ Kafwaako Mushilikale wingila aku saka ubeena kulama buumi bwaanji, pakuuba amba omvwiishe buloongo mukuluumpe wankito. ⁵ Kabiji, inge Muuntu ukaya makayo, keechi bafwainwa kumuvwiika Munchinya ne poso washiindan'ana moonka mwaila Mizhilo. ⁶ Kyaswishiwa amba awa Njimi wingila saana utambula yeutambula bukiji Bipaangwa byaanji. ⁷ Ulangulukeepo pabyo mbeena kwaamba, maambo nkaambo ukakukwaasha mu biintu byoonse. ⁸ Vuluka Yesu Kilishitu, wamukisemi kya Davida, aye wasaangukile kufuma mu Bafu. Moonka mwaila maambo awaama, ⁹ ombeena kumanamina nekukashilwaapo na Minyololo noobe Mbanzhi. Bino kyaambo kya Lesa keechi kikaswa ne. ¹⁰ Byonkaabyo chinchika na maambo a booba basalwa, pakuuba amba naabo bekale na Lupulukilo luji mwi Kilishitu Yesu, nekwikala na Lukumo lwa myaaka. ¹¹ Akwe kwaamba kookwa Kishinka:"Inge twafwiile naanji, kabiji tukekala neenaanji. ¹² Inge tuchinchike, tukataangijila naanji. Inge tumukaane, kabiji neaye uketukaana. ¹³ Inge twabula kwikala bakishiinka, aye yewakishiinka, maambo aye keechi wafwainwa kwikaana mwiine ne," ¹⁴ Saka wibavululamo bino biintu. Wibakambizhe ku Meeso a Lesa keechi bakepachike pa byaambo ne; keechi bijipo na nkito ne kabiji bizhiman'anyaatu aba bebyuunvwa. ¹⁵ Uba buloongo mukwimweesha obemwiine kwi Lesa noobe umo wakiingya, Wamwingilo ubula kumulengesha buumvu, aye ufunjisha buloongo kyaambo kyabukiine. ¹⁶ Kaana bya kwaamba amba ne kwamba kwakubula kuyuuka, kutwaala kubyavula nebyavula byakubula kutaako maana Lesa. ¹⁷ Kwaamba kwaabo kuuya nakubaya noobe Kiloonda kyabola. Mwi abo momuji ba Haiminusa neeba Filitusa, ¹⁸ baaya muungi kufuma kubukiine. Baamba amba Kusanguka kwamweeka kala, kabiji baonauna ne Bukiine ku bamo. ¹⁹ Byonkaabyo, Kiteendekesho kya Lesa kyatwajijila kwimana. kiji na kano Kateendekesho kakuuba amba:" Nkaambo wayuuka baanji,"kabiji" yeense utongola pajizhina ja nkaambo wafwainwa kuleka byabula Bololoke." ²⁰ Kabiji mu Nzubo yaabo yabunoonshi keechi mujitu Bindundu bya Golode ne Siliva ne. Kabiji muji ne Bindundu bya Bichi neebya Buchimba. Bimo pa bino bya mwingilo waneema, kabiji bimo byamwingilo wabula kuneema. ²¹ Inge Muuntu umo wafumako kumwingilo wabula kuneema, yeewa neema. Wifumyaako, wakwingijisha kwi nkaambo yaanji, kabiji nekunengezha mwingilo waawama. ²² Fuma kubyalunkuumbwa. Kebesha Bololoke, Bukiine, Butemwe, kabiji ne Muteende ku booba beeta pe nkaambo kufuma pa Muchima watooka. ²³ Bino kaana byabula maana ne Mepuzho abulubi. Wayuuka amba basemena moonka mulutoobo. ²⁴ Wamwingilo wa nkaambo keechi wafwainwa kutobokaanga. Bino wafwainwa kwikala wza Lusa ku boonse, ukoonsha kufunjisha, wakooka Muchima, ²⁵ saka afunjisha na kukooka Muchima ku booba balengulula. Apo kaampe Lesa ukebalengela kulapila amba bayuuke bukishiinka. ²⁶ Kabiji amba bakaluluke Michima nekufumako ku Kakose ka Diabola, saka baipaiwa kwi aye nakusaka kwaanji.