¹ Pano, baloongo baami, tuloobeshaipo atweeba, amba byaambo bya Nkambo bikoonshe kweendesha ne kutuumbijikwa, noobe byo kiji ne anweeba, ² kabiiji amba tukoonshe kupookolowa ku buumbulwa koloka ne ku baantu batama, pakuuba keechi boonse baji na lwiitabilo ne. ³ Mino Nkambo ye wa kishiinka, ye usa kwimukosesha anweeba ne kwi muviimbila ku aye muubi. ⁴ Atweeba tuji na luketekelo mwi Nkambo pe anweeba, amba anweeba boonse muube kabiiji ne kutwaajijila kuuba biintu byo twa kaambizhizhe. ⁵ Nkambo atangijile michima yeenu ku buteemwe bwa Lesa ne ku kukosela kwi Kilishitu. ⁶ Pano atweeba twi mukaambizha anweeba, baloongo, mu jizhiina ja Nkambo yeetu Yesu Kilishitu, amba muleke muloongo yeense waikala kyatuutu kabiiji ubula kwiikala mwaila kisemwa kyo mwataambwile kwi atweeba. ⁷ Pakuuba anweeba beene mwayuuka amba kimuwamina kwituloondela atweeba, maambo keechi twaikeletu byo twajiinga ne anweeba ne. ⁸ Atweeba keechi twajiile shiinkwa wa uji yeense kwa kubula ku muloombelela ne, mino twaingijile bufuku ne mute mu miingilo ne na bulume, byonkabyo amba tukoonshe kubula kwiikala kiseendwa kwi anweeba. ⁹ Twaubilo kino keechi na maambo a kuuba amba keechi tuji na luusa ne , mino twaubile kino mukuuba amba twiikale kya kumweenako kwi anweeba, byonkabyo amba mukoonshe kwituloondela atweeba. ¹⁰ Pakuuba byo twajiinga neenu, twi mukaambizhizhe anweeba amba, "Awa ubeena kubula kusaka kwiingila keechi wafwainwa kuja ne." ¹¹ Pakuuba tuumvwa amba bamo mukachi keenu beekalatu, keechi bateshako michima ku miingilo ne, mino bateesha michima ku biintu bya bakwaabo. ¹² Pano ba byonkabyo atweeba twakaambizhizhe ne kutuumbijika mwi Nkambo Yesu Kilishitu, amba bafwainwa kwiingila na kuzhiindama ne kuja shiinkwa waabo beene. ¹³ Mino anweeba, baloongo, keechi mukooke na kuuba buloongo ne. ¹⁴ Kabiiji inge uji yeense wabula kukookela byaamba byeetu mu ino nkalata ne, mulabijilai kabiiji ne kubula kutaanwa naanji, byonkabyo amba akoonshe kwiikala na buumvu. ¹⁵ Mino keechi mu mumone noobe mulwaanyi ne, mino mujimuna noobe muloongo. ¹⁶ Pano lekai Nkambo wa muteende aye mwiine emuupe muteende pa biimye byoonse mu mashiinda onse. Nkambo ekale ne anweeba. ¹⁷ Amiiwa, Paulo, na neemba bino na kubooko kwaami, ko kayuukilo pa nkalata yoonse yo neemba. ¹⁸ Buupe bwa Nkambo yuute Yesu Kilishitu bwiikale ne anweeba boonse. Ameena.