¹ Pano pa kwiiya kwa Nkambo yetu Yesu Kilishitu kabiji ne ku kupwiila pamo kweetu kwa kwiikala naanji aye, atweeba twaloomba kwi anweeba, baloongo, ² amba keechi be mulubaankanye bukiji ne nangwa kukatazhiwa ne, na mupashi nangwa na kyaambo ne, nangwa na nkalata aya imweeka noobe yafuma kwi atweeba ne, ku maambo a kuuba amba juuba ja Nkambo jaiya kala. ³ Keechi muleke nangwa umo e mubeepe mujishiinda jiji joonse ne. Pakuuba keechi kikeeya ne poso panyuuma ya kufumako kwafika ne muuntu wa mizhilulwiila wasololwa, mwaana wa lonaiko. ⁴ Awe ye iye ukanya ne kwituumbijika aye mwiine ku byo bya byoonse biteelwa amba Lesa nangwa abya byo bapoopwela. Panyuma yabino, aye wiikala mu tempele wa Lesa ne kwaamba aye mwiine amba Lesa. ⁵ Kechi muvuluka amba byo najiinga ne anweeba amiiwa ne mibujile bino biintu ne nyi? ⁶ Pano anweeba mwayuuka bimukaanya aye, byonkabyo amba aka sololwetu pa kimye kyafwainwa. ⁷ Pakuuba byafyamika bya mizhilulwiila byatatula kala kwiingila, kujitu muuntu umo umukanya luno kanatu aye akafumishiwemo mujishiinda. ⁸ Keepo wa mizhilulwiila aka sololwa, ao Nkambo ye akepaya na muuya wa mukanwa kaanji ne kumwaangata bulume na lumwekesho lwa kwiiya kwaanji. ⁹ Kwiiya kwa wa mizhilulwiila kukeekala na maambo a miingilo ya Satana na bulume boonse, biyuukilo, ne byakukumya bya bubela, ¹⁰ kabiiji ne na misaango yoonse ya bubi aya ibeepa aba babeena konaika, maambo bakaine kutemwa bukiine kabiiji ne kupulushiwa. ¹¹ Pakuuba na onka ano maambo Lesa ubeena kwi batumina bubela buji na bulume byonkabyo amba bakaswe bubela ¹² kabiiji byonkabyo amba boonse bakakoonshe konaunwa aba babujile kwiitabila bukiine mino abo basekelanga mu bumbulwa kooloka. ¹³ Mino atweeba twafwainwa kwimupaina saante kwi Lesa joonse, baloongo batemwa kwi Nkambo, maambo Lesa wimusajile anweeba noobe bipaangwa bitaanshi byapulushiwa kupichila mu kuzhijikwa na Mupashi ne kwiitabila mu bukishiinka. ¹⁴ Aye wimwiichile anweeba ku bino kupichila mu maambo etu awaama, byonkabyo amba anweeba mukoonshe kutaambula lukuumo lwa Nkambo yetu Yedsu Kilishitu. ¹⁵ Byonkabyo pano, baloongo, imanai ba kosa ne kukakachila ku bisemwa byo mwafuunjishiwe, na byaambo nangwa na nkalata yetu. ¹⁶ Pano Nkambo yetu Yesu Kilishitu aye mwiine ne Lesa Sheetu, aye witutemwa atweeba ne kwiitupa lutekenesho lwa myaka ne myaka ne luketekelo lwa waama kupichila mu buupe, ¹⁷ akoonshe kutekenesha ne kukosesha michima yeenu mu miingilo yawaama yoonse ne mu byaambo.