¹ Lekai boonse baseenda kikonkoji kwikala bazha bavulukeenga amba bankaambo yaabo bafwainwa kunemekwa. Bafwainwa kuuba kino pakuuba amba jizhina ja Lesa nelufunjisho lubule kuneenwa bibi. ² Bazha baitabila bankaambo yaabo keechi bafwainwa kwibamweesha kubula mushiingi ne maambo kebaloongo baabo. Byonkaabyo, bafwainwa kwibengijilaanga boonse kukilapo. Maambo aba bekala na lubaji keebaitabila nebaji na butemwe. Funjisha nekwibabuula bino biintu. ³ Inge Muuntu keafunjishe mafunjisho angi nekukaana byaambo byabukiine bya nkaambo Yesu Kilishitu nelufunjisho lwa Lesa, ⁴ pakuuba witoota kwakubula kukwatankanya biintu. Keechi ujipo nabunoonshi mukwibakwaasha kabiji nekutoboka pa byaambo bileeta, Kichima, Lutoobo, bya Mweenga, kulangulukila bakweenu byatama, ⁵ nemapata aji pakachi ka Baantu baji namilanguluko yatama. Baela bukishiinka nekulanguluka kuuba amba jishiinda ja Lesa joojishiinda jakukebelamo Mali avula. ⁶ Jishiinda jakunemeka Lesa momwakumweena byavula, ⁷ Maambo atweeba keechi twaletelepo biintu mu Ntaanda ne, kabiji keechi twafwainwa kuseendamo biintu mu bino ne. ⁸ Byonkaabyo, lekai tusanchile nabyakuja nebivwaalo byotuji naabyo. ⁹ Maambo aba bakeba Bunoonshi baponena mulweseeko, mu Kitewa. Baponena mu biintu byabunya nebyakusaka saka bipayan'ana, kabiji nekubikwaabo bitwaala Baantu ku Lufu nekuLonaiko. ¹⁰ Maambo kutemwa Mali ke Muzhazhi wa biintu byatama tama byanshiji. Baantu bamo bakeba bino befumyaako beene kulwitabilo kabiji nekwiasaula beene na Misoongo yavula. ¹¹ Bino obewa, Muuntu wa Lesa, fumaako ku bino biintu. nekuloonda Bololoke, Muneema wakunemeka Lesa, Lwitabilo, Butemwe, Kuchinchika, nekukooka Muchima. ¹² Ulwe Bulwi bwawaama bwalwitabilo. kwachisha ku Buumi bwa myaaka ne myaaka kowaichilwe, nekwisolola kuMeeso abakamonyi bavula. ¹³ Nemipa ino Mikambizho ku Meeso a Lesa, aye upaana Buumi ku biintu byoonse, kabiji nekuMeeso a Kilishitu Yesu, yeenka washimwiine ku Meeso akwa Pontiusa Pilato ne kwisolola kwawaama, ¹⁴ mukulama Mukambizho kwakubula Biko naangwa kaneneno kufikatu neebyo nkaambo weetu Yesu Kilishitu byoakeeya. ¹⁵ Lesa ukamweesha kumweeka kwa Kilishitu pakimye kyawaama-Lesa, watookwa kabiji ye umo unengezha, Mfumu ulama Ntaanda ne nkaambo utangijila. ¹⁶ Yeenka ubula kufwa nekwikala mukyeeya kyakukankalwa kufikako. Kafwaako Muuntu wakimumonaapo naangwa kukoonsha kumweesha byoamwekana ne. Kwi aye kwikale muneema ne bulume bwa myaaka ne myaaka. Amena. ¹⁷ Kambizhai Banoonshi muno mu Ntaanda amba keechi belundumike ne kabiji keechi baketekele mubunoonshi, bwatuutu ne. Kanaatu, baketekele mwi Lesa. Aye witupa byoonse byabunoonshi bwabukiine kusekela. ¹⁸ Babulaai boonse kuuba byawaama, kwikala Noonshi mumingilo ya waama, nebampaanyi kabiji nebashila n'aana. ¹⁹ Mujoojo jishiinda bakabiika beene Kitendekesho kyawaama kubikeeya, pakuuba amba bakakwachishe ku Buumi bwakiine kiine. ²⁰ Timoti, lama akya kyobakupeele. Vundamina kubyakwaambaamba byaatu bizhilulula byazhila nekubiintu byabubela byobepachikaapo byobateela amba omaana. ²¹ Bamo Baantu bemweesha pa bino biintu ne kuya muungi kufuma mulwitabilo. Lusa lwikale peanweeba.