¹ Byoonkabyo, kitaanshi pa byoonse, nemusanshijila nakwipuzha kwa butekanye, Milombelo, Mapesho, ne Misanshijilo bilengelwe ku Baantu boonse, ² ku Mafumu ne boonse baji mu Luusa, mukuuba amba tukoonshe kwikala mu Muteende ne Bwikalo bwazhindama mubu Lesa boonse neena mushiingi. ³ Akino kyokyawaama ne kwitabilwa ku Meeso a Lesa mupulushi weetu. ⁴ Aye wasakisha Baantu boonse kupulushiwa kabiji nekwiiya ku yuuka bu Kiine. ⁵ Maambo kujitu Lesa umo, kabiji kujitu umo witwimenaako pakachi akwe Lesa akwe Muuntu, ke Muuntu Yesu Kilishitu. ⁶ Wipaine aye mwiine kekya kufuchilako Maambo ku boonse, noobe ke Lushimuno pa kimye kyafwainwa. ⁷ Na maambo auno Mwingilo nasajilwe kwikala Musapwishi ne Mutumwa- mbeena kwaamba bya kiine, keechi mbeena kubeepe ne- nekwikala Mufunjishi waba Ngetila mulwitabilo nemubu Kiine. ⁸ Byookabyo, mbeena kusaka baana balume mu Mpuunzha yoonse kuloomba nekwimanya Maboko azhila kwakubula Bukaji nangwa Kutoboka. ⁹ Mujishiinda jimo, baana bakazhi bavwaale Bivwaalo byawaama, na Bumvu ne Butekanye, keechi na Nsuki yakwichika ne naangwa na Golode naangwa na Bamangalite nangwa Bivwalo byamuteengo ine, ¹⁰ mino namingilo ya waama ku baana bakazhi bashimuna mubu Lesa kupichila mumingilo ya waama. ¹¹ Mwaana mukazhi akoonshe kufuunda mukuzhindama kabiji ne mukukokela koonse. ¹² Keechi naswisha mwaana mukazhi kufunjisha nangwa kuuba kwikala na Luusa pawamulume ne, mino kwikala mukuzhindama. ¹³ Maambo Adamu walengelwe patanshi, mino ke Eva. ¹⁴ Adamu kechi wabepelwe ne, mino wamukazhi wabepelwe kabiji nekwikala wakuzhilulula. ¹⁵ Byoonkabyo, aye ukapulushiwa kupichila mu kusema Baana, inge batwajijila kwikala mulwitabilo nemu Butemwe kabiji ne kuzhijikwa nakwilama abo beene.