¹ Byonka byo tuulaipo buubi boonse, bujiimbijimbi, buukamfutufutu, mafika, ne byoonse bya lwaambo. ² Noobe ba lukeeke basemwa, mubaande mu mukaka wa waamisha wa ku mupashi, pakuuba amba kupichila mukino mukoonshe kukoma mu lupulukilo, ³ inge wa toompapo amba Nkaambo wa waama. ⁴ Iyai aye jiibwe ja buumi aja jo baine baantu, mino ajo bejisajile kwi Lesa noobe ja neema kwi aye. ⁵ Ne anweeba muji noobe mwaabwe omi a a abeena kushimikwa kwiikala nzuubo ya bu mupashi pakuuba amba ikale yazhila ya busapwiishi aya paana bitapisho bya bu mupashi byaitabilwa kwi Lesa kupichila mwi Yesu Kilishitu. ⁶ Bineebele biji na bino: "Talai, mbeena kulaajika mu Ziona jiibwe ja jikoonka, jasajilwe kabiji ja neema. Yeense ukeetabila mwi aye keechi ukaleengeshiwa buumvu ne." ⁷ Byonka byo, buneeme, boobwenu anweeba baitabila. Mino kubooba babula kwiitabila, "Jiibwe aja jobakaine bashika, ajo ja aluka ke jiibwe jiine jikataampe ja pa jikoonka," ⁸ kabiji, "Jiibwe ja kwiituuntulako ne mikuunko aya ibaleengela kupona." Betuuntula maambo keechi ba neemeka kyaambo ne-akya kyo bebatoongwejile kuuba. ⁹ Bino anweeba mwi baantu basalwa, mwi babu ng'aanga bwa bufumu, mukoka wazhila, baantu ba mwiine Lesa, pakuuba amba mushimune biintu bya umo wi mwiichile anweeba kufuma mufiinshi kutweela mukyeeya kyaanji ja kukumya. ¹⁰ Kimye kimo anweeba keechi mwajiinga baantu ba Lesa ne mino pano mwi baantu ba Lesa. Keechi mwaataambwile lusa ne, mino pano mwataambula lusa. ¹¹ Batemwe, ne mituumbijika anweeba noobe beenyi ne ba kang'eenda mukwi fumyaako ku bya kusakasaka bya buuntunshi, abya bilwiisha mweo weenu. ¹² Kwiikala kweenu mu ba Ngetila kwiikale kwa mushiingi, byonka byo amba byo be muneema noobe mwi babi, beekale bakumona na meeso abo miingilo yeenu ya waama ne kupaana lukumo kwi Lesa pa juuba jo a kamweeka aye. ¹³ Ikalai ba kunekenena mikaambizho yoonse ya bantu na maaba a Nkambo. Kookelai yoonse naangwa ya mfumu byo aji mwiine, ¹⁴ kabiji ne ba ndamakyaalo, naabo, batumwa kwi aye mukwibakabisha booba byatama ne kwiibatoota abo booba bya waama. ¹⁵ Maambo akino kyo kyasaka Lesa, amba mukuuba bya waama anweeba muzhiindamika ng;aambilo yo ba bula kuyuuka ya baantu bakosama. ¹⁶ Noobe baantu ba kasuluka, keechi mwiingijishe kukasuluka kweenu noobe kyakuvweeta pa buubi bweenu ne, mino mwiikale noobe bakalume ba Lesa. Nemekai ¹⁷ baantu boonse. Temwai baloongo. Chinai Lesa. Nemekai mfumu. ¹⁸ Bakalume, kookelai ba nkaambo yeenu na mushiingi yeense. Mwiikale ba kukookela ba nkaambo yeenu, keechi ku ba waamatu ne, mino ne ku bashiinta. ¹⁹ Pakuuba kyafwainwa kutuumbijikwa kwa neema inge, maambo aye wayuuka Lesa, muuntu ushiinda bya bulaanda kasa ayaanda na buumbulwa kooloka. ²⁰ Pakuuba ukamweenaka inge waleenga maambo kabiji ne kupitamo kasa ubeena kumanyikwa? Mino inge wauba bya waama kabiji ne kuyaanda kasa umanyikwa, akye kyafwainwa kutootwa kufuma kwi Lesa. ²¹ Pakuuba keechi twaichilwe ku kino ne, maambo Kilishitu naaye wa yaanjile maambo a anweeba. Aye washiile kya kumweenako amba anweeba muloondele ntaampulo yaanji. ²² "Aye keechi waleengelepo maambo ne, naangwa kutaanwa na kibi mukanwa kaanji ne." ²³ Byo ba muubile mweenga, keechi wabweezhezhe mweenga ne. Aye byo a manamine, keechi wibapiingijile ne, mino wipaine aye mwiine ku yeewa uchiba maambo mo a lolokela. ²⁴ Aye mwiine wa wiseendejile buundenga maambo bweetu mu mubiji waanji poonka pa kichi pakuuba amba tufume ku buundenga maambo ne kwiikala ku boololoke. Kokubipumo byaanji ko mwabukiwa. ²⁵ Anweeba boonse mwa endelenga noobe mukooko waeleka, mino pano mwabweela kwi kafuunga kabiji kalama wa michima yeenu.