¹ Petelo, mutumwa wa Yesu Kilishitu, kubeenyi bo ba palaang'anya, ku basalwa, Potusa, Ngalatiya, Kapadokya, Asha ne Bitanya. ² Amuno momwaila maana a Lesa taata, kupichila mu kuzhijikwa kwa mupashi, mulukookelo ne mu kwiichila mashi a Yesu Kilishitu. Buupe bwa Lesa bwiikala kwi anweeba kabiji ne muteende amivujile. ³ Atootwe Lesa kabiji Shaanji na Nkambo yeetu Yesu Kilishit! Mu lusa lwaanji lukataampe, aye witupa kusemwa kwa luketekelo luumi kupichila mu lusaanguko lwa Yesu Kilishitu mfumu mu baafwa. ⁴ Akino kyo kya buswaanyi bukabula konaika, bukabula kutamisha, kabiji bukabula kwaaluka. Bo bemilamina mwiulu. ⁵ Anweeba mwazhookolokwa na ngovu ya Lesa kupichila mu luketekelo lwa lupulukilo alo lukasololwa ku bimye bya kupelako. ⁶ Mukino anweeba museekele biingi, naangwa luno, pa kimye kicheeche, mwakoonsha kumana ku meeseko apusana pusana. ⁷ Akino kyo kyakuluumbula lwiitabilo lweenu, kyawaamisha kukila golode aya yonaika, naangwa yaesekwa na mujilo. Pakuuba amba lwiitabilo lweenu lutaanwe kubifumaamo bya kutuumbijika, lukumo, ne muneema pa kumweeshiwa kwa Yesu kilishitu. ⁸ Keechi mwa mumona ne, mino mwamutemwa. Keechi mu mumona luno ne, mino mwaketekela mwi aye ne kusaangalala na lusekeelo lubeena kumweeka ne kabiji lwayuulwa na lukumo. ⁹ Pano mubeena kwiitambwila anweeba beene byafuma mu lwiitabilo lweenu, ne lupulukilo lwa michima yeenu. ¹⁰ Pakutala luno lupulukilo, baangauzhi ba awiile pa buupe bwajiinga na kwiiya, bwa peselwe na buteekanye ne kuteka muchima, ¹¹ Mu kwiipuzha mwajiinga muuntu ka naangwa kimye ka Mupashi wa Kilishitu mwi abo kyo a yuukanyikilwe lo a paine lushimuno kasa kuboko kwa kuyaanda kwa Kilishitu ne lukumo lukaloondela. ¹² Kyasolwewe kwi abo amba keechi be ingijilenga beene ne, mino anweeba, byo ba ambile biintu abya byo bemibuula pano, nabooba basapwiijile maambo a waama kwi anweeba na Mupashi Wazhila watuminwe kufuma mwiulu-biintu abya ba malaika byo bapeembelejilenga pa bimye byavula. ¹³ Byonkabyo nyiingishai misana yeenu ya milaangwe. Ikalai ba lukookelo. Bikishai luketekelo lweenu pa buupe abwa busa kuleetwa kwi anweeba byo akasololwa Yesu Kilishitu. ¹⁴ Noobe baana ba lukookelo, keechi mwituumpe anweeba beene mu kusaka saka abya byo mwaloodejilenga byo mwajiinga bilubi. ¹⁵ Mino umo wi mwiichile anweeba byo a zhila, anweeba ne anweeba, ikalai bazhila mu byoonse byo muuba. ¹⁶ Pakuuba kya neembwa amba, "Ikalai bazhila, maambo amiiwa na zhila." ¹⁷ Byonka byo inge mu muteela amba, "Taata" aye uchiba nakweesakanya ne mwaila miingilo ya muuntu yeense, ikalai na kwaakamwa mu bimye byo mukiji beenyi muno. ¹⁸ Anweeba mwayuuka amba keechi kyajiinga na siliva naangwa golode yo naika yo be mupulwiisheko kufuma ku byuubilo byatuutu aya yo mwafuunjile kufuma ku basheenu, ¹⁹ mino na mashi a neema a Kilishitu, noobe a mukooko wabula kaneeneno naangwa jitomya. ²⁰ Kilishitu wayuukanyikilwe kiteendekesho kya ntaanda kasa kikyaangye kwiikalako, mino pano ba mumweesha kwi anweeba mu bino bimye byapelako. ²¹ Kupichila mwi aye mwaketekela mwi Lesa, wa mubushishe aye kufuma mu baafwa ne mukupa aye lukuma, pakuuba amba lwiitabilo lweenu ne luketekelo biikale mwi Lesa. ²² Anweeba mwaleengele myeo yeenu kutooka kupichila mu bukiine bweenu. Kino kyajiinga na maambo a kishina kya butemwe bwa buloongo; byonka byo temwiishai umo ne mukwaabo kufuma mu muchima weenu. ²³ Mwasemwa jibiji, keechi kufuma ku nkuunwa ibola ne, mino ku nkunwa ibula kubola, kupichila mu byaambo bya Lesa byuumi kabiji bya ikajikwa. ²⁴ Pakuuba, "buuntunshi boonse buji noobe nsono, kabiji ne lukumo lwaayo loonse luji noobe maluba a nsono ya muungye. Nsoonso yuuma, ne maluba aponako, ²⁵ mino byaambo bya Nkambo byaikala myaaka ne myaaka."