¹ Lamba kuli limbo lya uhenge! limbo lya kupinjisa atu lya uhulya. Kapanjikile ku liji lya Zambi, katayijile ko kufumba cha Yehova. ² Iye keshi kufulyela muli Yehova nawa kaamuhulile Zambi. ³ Akwa lutwe lyenyi kaali ngwe ndumba waze ana kololoka nyi liji linene hakachi kenyi, ngaji jenyi kaali ngwe tungunga waze keshi kuhichikaho nyichimwe chakulya chimenemene. ⁴ Tupolofeta jenyi kapwa alelu nawa akwa mafwefwe. Sasendote jenyi kakuchisa yuma yize yisandu nyi kupinjisa shimbi. ⁵ Yehova kapwa mukwa ululi hakachi kenyi. Kechi kulinga nyi chipi chimwe. Kakulinga chize chinatela tangwa ha tangwa! kechi kuchisweka mu pangu, alyoze yitanganyanyi keshi kwivwa sonyi. ⁶ "Hingunenyeka mavungu; hingunenyeka ma limbo jo. hingunenyeka majila jo, hanga wakuhi mapalika muli waze majila. Membo jo hapwa ahululu kwakuhi nyiumwe unatwamamo. ⁷ Nambile ngwami 'Chamwenemwene munungulemesa. Kutayiza longeso nyi kwakuhona kunuchiza ku mazuwo jenu kuli yeswe yize hinalulika kulinga kuli yenu.' Alyoze ayo aputukile tangwa nyi kupihisa yitanga yo yeswe. ⁸ Keshika ngushimbwilenu - chino che anambe Yehova - ndo ku tangwa lize mungukatuka nyi kusuma mavungu. Mumu hinasakula ku kungulula mafuchi, ku kungulula ma wanangana, hanga ngu ka mwangine ufwatulo wami hali ayo, weswe utenu wami; mumu chifuchi cheswe muchikawema mu kahya. ⁹ Alyoze mungutomesa mbunge ja atu, hanga eswe akatambike ha jina lya Yehova nyi kumuwayila sali nyi sali. ¹⁰ Kukatuka ku kuze ku lwiji lya Kushi akwa ku nguwayila - atu waze amwangashanyine - kumaneha milambu kuli yami. ¹¹ Hatangwa lize ku nuchi kevwa sonyi mumu wa yilinga yenu yize ya uhenge yize nwalingile hali yami, chize hayize shimbu munguchizaho hakachi kenu waze akwa kulengumuka nyi kulizata, mumu kunuchi kungukatukila nawa ha mulundu wa usandu. ¹² Alyoze munguhichika akwa kulikehesa nyi yiswale hakachi kenu, kumakawana chihela chipema mu jina lya Yehova. ¹³ Ayizalele waze masalaho nyi mwono keshi kulinga chipi chipwe kuhanjika mahuza, hanji kweseka kwonga; chocho kumayuka nyi kutwama mu uhwimino, wakuhi nyiumwe mevwisa woma." ¹⁴ Imba, mwana wa pwo wa Ziyone! Yizalela kololojoka. Wahililenu nyi mbunde jenu jeswe, mwana pwo wa Yelusaleme. ¹⁵ Yehova hachiza lamba lyenu; akwa kole jenu hawachiza! Yehova Mwe mwanangana wa Yizalele hakachi kenu. Kunuchi kachina chipi nyichimwe nawa! ¹⁶ Ha tangwa lize kumakamba kuli Yelusaleme, " Kanda wivwa woma, Ziyone. kanda nwecha moko jenu apwe kwakuhona tachi. ¹⁷ Yehova Zambi yenu kali hakachi kenu, mukwa ndundo yoze manulamwina. Kumawahilila hali yenu mu zango lyenyi; kumapwa wakuwahilila kumanwimbimbila nyi kuwahilila. ¹⁸ Mungukungulula waze akwivwa chinyengo, waze kechi kwiza ku chiwanyino, chocho kunushi kevwa sonyi nawa. ¹⁹ Talenu, tangwa kulineza lize mungumwesa lamba akwa kunupinjisa. Ha shimbu lize , mungulamwina yitonji nyi ku kunguhilwisa njize kumahyo. Munguchiza sonyi jo mungwalemesa akwa hashi eswe ma chichimyeka. ²⁰ Ha shimbu yize mungupwa tetekeli wenu; ha shimbu yize mungunukungulula hamuwika. Mungunufumanyisa nyi kunuyukisa hali atu eswe ahashi muze munguhilwisa kumahyo atu jenu amwangashanyine ku meso jenu" chino che anambe Yehova.