¹ Kungulukenu enu esswe hamuwika, yenu vungu lize kunushi sonyi - ² shimbu kanda shimbi mwisolwesa lamba nyi tangwa lize nuuma nyi kulekuma ngwe yitemo, shimbu kanda ufwatulo wa utenu wa Yehova muwiza hali yenu, shimbu kanda tangwa lya utenu wa Yehova muliza hali yenu. ³ Teulukenu kuli mwene Yehova, yenu eswe akwa kulikehesa a mu chifuchi waze akwononokela shimbi yenyi! Lingenu usandu. likehesenu, hanga akanukingilike ha tangwa lya ufwatulo wa Mwene Yehova. ⁴ Mumu nyiumwe masala mu limbo lya Ngaza, nyi Ashikelone mulyalumuka yikulu. Kuma huma Ashindonda shimbu ya mwalwa, nawa kumahuma akwa Ekolone! ⁵ lamba kuli waze atwama ku mbumbulu ya kalunga lwiji, lifuchi lya akwa Keleti! Yehova ha hanjika hali yenu, Kenani, limbo lya akwa Afilisitiya. mungununongesa kukuchi kusala nyiumwe. ⁶ Chocho chifuchi cha akwa mbumbulu ya kalunga lwiji muchalumuka chihili kuze mukupwa mazuwo ja tufunga nyi matanga ja mapanga. ⁷ Chifuchi cha mbumbulu ya kalunga lwiji muchipwa chifuchi cha masalila a akwa Yunda, kwenako malishila yimuna yo. Atu jo kuma pomba mu zuwo lya Ashikelone mushimbu ya chingoloshi, mumu Yehova Zambi yo mapwa hamwe no mawahisa nawa. ⁸ "Hinevwa akwa yifuchi ya Moape nyi Amone chize anashililika njiza ja atu jami nyi kuchoka atu jami. ⁹ Keshika, ni mwe Yami mwene - chino che kuhanjika cha Yehova mukwa ndundo, Zambi ya Yizalele - Moape manonga ngwe chize chene limbo lya Sondome nyi Ngomola; mapwa ngwe chihela cha mena ja mungwa, keshikatwamaho mutu niumwe ndo ku myaka ya mitolo. alyoze atu jami masala ho nyi mwono maapupa, nyi kutambula chifuchi cho." ¹⁰ Chino muchilingika kuli Moape nyi Amone mumu halizata halisuta, mumu hashililika atu ja Zambi wa ndundo. ¹¹ Mba Yehova mevwisa mwongo, mumu mapupa mazambi jo eswe a hashi. Mutu mweswe mamuwayila, mweswe kuchihela chenyi, ku membo eswe a chifuchi. ¹² Yenu akwa chifuchi cha etopya nyi yenu kumakanutuwa nyi katana kami, ¹³ nyi kwoko lya Zambi kumu lika lukuka akwa note nyi kwenyeka akwa Asilya, hanga Ninive malipuzula, nyi kwalumuka puya. ¹⁴ Mba yimuna muyipomba muze, tushitu eswe a muchifuchi, eswe akwa mupuya nyi yikungulu kumatwama ha ma zuwo waze apuzuka. Mutambi ku mu utuhuka kukatuka mupenda; yikwakwalo mahanjikila ha mangazwilo ja mazuwo; mapaya a sendulu ku mazuwo machiza ko. ¹⁵ Lino lye limbo lya kusehejela lize lyapwileko kwakuhona woma, lize lyambile mu mbunge ngwo, " limbo lili linene kwakuhi limbo linene kuhyana lino" mba hilyalumuka muma mwakutwama tushitu, mutu mweswe mapalika ko matungumuka nyi mwongo.