¹ Keshika yena kushi chakulyongela , yena mutu , yena wakupatwila , mumu yize wakupatwila mukwenu walihisa yenamwene . Mumu yena wakupatwila wakulinga yma yizeyene . ² Alyoze tunanyingika upatwilo wa Zambi ku unalite nyi umwenemwene hali waze akulinga yuma ngwe yino . ³ Alyoze shinganyekenu chino yena mutu , yoze wakupatwila waze akulinga yuma yacho chipwe wakulinga yuma yoyene yimuwika . Munukakomboka ku upatwilo wa Zambi nyi? ⁴ Shina una lelesa kulumbama cha wutu wenyi , nyi uhumikizo , nyi uhomboloji? Kuwanyingikine ngwo wutu wa Zambi ku unakukoko ulikonyeke? ⁵ Alyoze nyikulita nyi kukala cha mambunge yize kwishi kulikonyeka chenacho kunwa kulitulikila utenu ha tangwa lya utenu , chocho muze masolola upatwilo wa ululi wa Zambi. ⁶ Makahana kuli eswe nyi kulita nyi itanga yo: ⁷ Kuli waze akunyongona nyi kulinga yipema nyi kufupa uhenya , nyi ulemu , nyi ungunu, makaha mwono wamutolo. ⁸ Alyoze kuli akwa pami , nyi waze keshi kwononokena ku umwenemwene alyoze ka kwononoka ku uhenge ufwatulo nyi utenu kumu ukeza. ⁹ Zambi makaneha luyinda nyi kupinda hali mutu mweswe yoze wakulinga yipi , chitangu ha;li A-Yunda nyi hali Anglesiya nawa. ¹⁰ Alyoze uhenya , nyi ulemu , nyi sambukila muyikeza hali yoze mutu nyi mutu wakulinga yipema , hali A-Yunda chitangu , nyi hali A-Ngelisiya. ¹¹ Mumu Zambi keshi katonde. ¹² Mumu waze eswe hanavulumuna kwakuhona shimbi , makatoka keshi shimbi , nyi waze hanavulumuna kushi lya shimbi , ku makapatwila nyi shimbi. ¹³ Mumu hi akwa kwivwako shimbi masamba kumeso ja Zambi , alyoze makasambisa akwa kulinga shimbi . ¹⁴ Mumu akwa mavungu , waze keshi shimbi , malinga nyi mbunge jo yuma ya shimbi , o se keshi shimbi , muyipwa shimbi kuli ayo ene chipwe keshi nyi shimbi. ¹⁵ Muli yino kakulweza yitanga ya shimbi hinasonewa mu mbunge jo. Mbunge jo nawa se hijinashindakenya hamuwika , nyi malinjikela jo kanaasumu chipwe kwasambisa hakachi ko. ¹⁶ Nyikuli Zambi . Ayo muyikalingiwa ha tangwa lize Zambi makapatwila yuma yakuhenga ya atu eswe , kulita nyi sango lyami, muli Kilishitu Yesu . ¹⁷ Alyoze nyi unalivuluka ngwe ka -Yunda wakulijikijila ha shimbi nyi kulisamba muli Zambi . ¹⁸ Wakunyingika upale wenyi nyi kulisela shindakenyo yipema ha yuma ya hyana mumu hanakufumbu mu shimbi ¹⁹ nyi unalikolela yena mwene kupwa kasongo wa tupuputa , pangu lya waze ali mu milima, ²⁰ chifumbe cha chinyingi uli nacho nyi chaumwenemwene mu shimbi , mba kuchi chakwasa utwamino wa mwono we? ²¹ Yena wakulongesa akwenu , ushi kulifumba yenamwene? yena wakwambujola ngwo mutu kanda akeya, shina yena wakwiya nyi? ²² Yena wakwamba ngwe kanda nulinga utanji , shina yena wakulinga utanji nyi? Yena wakuvwila kole mahamba, yena wakuhupa matembele nyi? ²³ Yena wakulisamba mushimbi , yena hakutangula shimbi wakusaula Zambi nyi? ²⁴ Mumu ''jina lya Zambi kakulishililika kuli akwa mavungu ha mulonga wa yena,'' ngwe chize hichinasonewa. ²⁵ Mumu ungalami chamwenemwene muufumbula nyi mufunga shimbi , alyoze kachi mopwa chitanguka cha shimbi , ungalami we hiwapwa ulima. ²⁶ Keshika , mutu chilima mazunga upatwilo wa shimbi, ulima wenyi kechi kuwalwila ha ululi nyi? ²⁷ Mba yilima kuchisemuwa kachi ma funga shimbi kechi kunupatwila nyi ? Yena uli nyi lusona wa shimbi nyi ungalami , alyoze unatangula shimbi! ²⁸ Mumu hi ka-Yunda ko yoze wapwa ka -Yunda ku mujimba ; chipwe hi ungalami ko wa kumusunya. ²⁹ Alyoze yiye ka-Yunda wayuma ya muchima , nawa ungalami wuze waku mbunge , mu shipilitu , hi wa mu lusona ko. Kuhalisa cha mutu wacho chishi kukatuka kwa atu alyoze kuli Zambi.