¹ Keshika ngunalyumbu kuli yenu, mandumbu , ku keke ya Zambi, nutumbikile mijimba yenu chitapo chamwono , chisandu chakupwemena chikolo kuli Zambi . uno we uvumbiko wenu . ² Kanda nulitesa nyi mwakono ,alyoze alumukenu ku kupwisa chaha cha kunyonga chenu . Nukase chinyingi chize wapwa upale upema , nyi ungunu wa Zambi , nyiuze wa mupemena. ³ Mumu kuvumbi lize anguhele ngunambe kuli mutu nyi mutu hakachikenu ngwami: kanda alinyonga kuhyana chize chamutamba kunyonga , alyoze , akanyonge nyi mana , ngwe Zambi hanapanjika kuli mutu nyi mutu njongo jenyi ya ufulyelo. ⁴ Mumu ngwe tuli nyi yihanda inji mu mujimba umuwika , nyi yihanda yeswe kuyishi mulimo umuwika. ⁵ Chocho nawa, yetu tuli anji tunapu mujimba umuwika muli Kilishitu , nyi eswe mutu nyi mutu chihanda chimwe cha mukwo nyi mukwo. ⁶ Tuli nyi yawana ya vumbi yeka nyi yeka nyi kulita nyi vumbi lize hanatwehe . Nyi umwe chawana chenyi cha upolofeto, achilinge nyi kulita nyi njongo ya ufulyelo wenyi. ⁷ Nyi umwe chawana chenyi cha kukalakalila akwo , mwechenu akalakale . Nyi umwe chawana chenyi cha kulongesa , akalongese. ⁸ Nyi umwe chawana chenyi cha kushinjila maliji , mwechenu ashinjile. Nyi umwe chawana chenyi chakuhana , mwechenu akachilinge nyi kuvungumyona . Nyi umwe chawana chenyi chakusongwe , akachilinge myi mbunge yeswe . Nyi umwe chawana chenyi chakulweza keke , akachilinge nyi kusehejela. ⁹ Zango likapwe kulishi ulembekeso . Ivwenu lwaji ha ungulungulu; lalaminyenu ku yipema. ¹⁰ Hakutwala ku zango lya mandumbu, lifwilenu nyi utu umwe kuli mukwo nyi mukwo . Ha kutwala ku ulemu , livumbikenu umwe nyi mukwo. ¹¹ Ha kulipupwisa , kanda nulengama . Hakutwala ku Shipilitu jenu , lishinjilenu . Hakutwala kuli Mwene , mulingilenu . ¹² Hakutalilila chenu , nukawahilile , ha luyinda nukanyongonone, ha kulemba nukalikoleze. ¹³ Nukalyanyine ku kuhona cha asandu . Nukalitumbikile kuzumbula ngeji. Wahisenu waze akunuhungumyona . ¹⁴ Wahisenu kanda nushingana. ¹⁵ Wahililenu hamwe nyi waze akuwahilila , lilenu hamwe nyi waze akulila. ¹⁶ Pwenu nyi kunyonga chimuwika umwe kuli mukwo nyi mukwo . Kanda nunyonga yuma ya kulengumuka , alyoze ataizenu waze akulikehesa . Kanda nukanyama nyi kutaka cha yenwene. ¹⁷ Kanda nufwetesa nyi umwe yipi ha yipi . Lingenu yuma yipema kumeso ja atu eswe. ¹⁸ Kachi muchihasa kupwa , nyi kulita nyi tachi jenu , pwenu nyi sambukila kuli atu eswe. ¹⁹ Kanda nulikalila milonga yenwene , akwetu a zango, alyoze lisekulenu ha utenu wa Zambi . Mumu chinasonewa ngwo , '' Kukala nyi chami , kumungufwetesa yami mwene, chocho anambe Mwene.'' ²⁰ Alyoze ''kachi mukwa kole we mevwa zala , mulise. Kachi mevwa pwila , mwehe ya kunwa. Mumu hakulinga chocho, mukalinjika makala a kahya ha mutwe wenyi.'' ²¹ Kanda anukumba ku yipi , alyoze kumbenu yipi ha kulinga yipema. ²² Shimbu malivuloka akwa mana , alumukine yihepuke . ²³ Alumwine uhenya wa Zambi yoze keshi kupola mukulifwa cha chizulye cha mutu wakupola , nyi watujila , nyi watushitu nyi tututu akukalala ²⁴ Keshika Zambi wakunjikile mu usolo wa mbunge jo kuluchisa , mukusaula mijimba yo yahakachi ko . ²⁵ Waze asumbakenyene umwenemwene wa Zambi nyi mahuza , nyi kuwayila nyi kulinga chuma cha kutanga mwe tangi ko , Mwenawo kafumana ndo ku myaka yamutolo .Ameni . ²⁶ Hachikuma chino , Zambi wakunjikile ku kusasaminya cha sonyi , mumu mapwo jo alumwine chize chinate nyi chisemewa mu chize kuchatele . ²⁷ Chizechene , malunga nawa nyi kuhichika chize chinate nyi mapwo asasaminyine mu usolo wo umwe kuli mukwo . Lunga nyi lunga hikulinga sonyi no nyi kutambula muli ayo ene fweto yize yinatela nyi kupyanguka cho . ²⁸ Mba chizechene ngwe katayile kupwa nyi Zambi mu kunyonga cho , Zambi wakunjikile ku manyonga a kulumbuka , mukulinga yuma yize kuyatele . ²⁹ Se azalile to nyi uhenge weswe , nyi ungulungulu nyi kuzo , nyi uhuka , a to nyi lufwachinda , nyi ungalwe , nyi vunda , nyi kalimbalimba , nyi upapwoki akwa kulinongota , ³⁰ yilamikiji , akwa kupopolola , akwa kulizelula , akwa kulizata , akwa kutomba yuma yipi yihulya kuli yisemi jo . ³¹ Keshi malinjekela , keshi kushishika ku yilakenyo , keshi zango lya atu , nawa keshi keke . ³² Wano nyi kunyingika upatwilo wa ululi wa Zambi , ngwe waze akulinga yuma ngwe yino yino kanatela kufwa . Hindu nyi hi kuyilinga wika ko , alyoze kukuwaha hamwe nyi waze akuyilinga .